Akisy. 1
1
Tosub Akuj akwap
(Akisy. 2:4b-9; Yob 38:4-11; Yoa. 1:1-5)
1Anakisyakinet, abu Akuj tosub kidiama ka akwap. 2Arae akwap ŋina amam iborekitamet ka amam ibore ayai tooma keŋ ka arapuwarit akiryonut kidiama nenicukul daadaŋ, aryakiryaki Etau ŋolo ka Akuj alokidiama ŋakipi.
3Tema nai Akuj, “Toyakaun akica;” ido abu akica toyakaun. 4Toanyu Akuj atemar ajok akica; totyaka Akuj akica anakiryonut. 5Tolimok Akuj ekiro ka akica “Apaaran” ka ekiro ka akiryonut “Akuwar.” Toyakaun ataboŋ ka toyakaun ataparacu, arae ŋin akoloŋit ŋina esyakinan.
6Tema Akuj, “Toyakaun ariwo kidiŋ ŋakipi, ikotere totyakite ŋakipi alokidiŋ.” 7Tosub Akuj ariwo, totyak ŋakipi, ŋace kwap ariwo ka ŋace kidiama ariwo. Apotu ŋun kitiyakin. 8Tolimok Akuj ariwo kidiama. Toyakaun ataboŋ ka toyakaun ataparacu, arae ŋin akoloŋit ŋina a ŋaarei.
9Tema Akuj, “Tocunakinos nakibois apei ŋakipi daadaŋ ŋuna eyakasi kwap ariwo, ido totakanu akwap neni aonon.” Apotu ŋun kitiyakin. 10Tolimok Akuj neni aonon alokwap “Akwap” ka tolimok neni ecunanakina ŋakipi “Ŋanamyo”, toanyu Akuj atemar ajokak ŋun. 11Tema Akuj, “Kitolomu akwap ŋikito ka ŋinya, ŋinya ŋulu erayete ŋicok a ŋikabilae kec ka ŋikito ŋulu erayete ŋaraito ŋuna eya ŋicok a ŋikabilae kec.” Apotu ŋun Kitiyakin. 12Kitolomu akwap ŋikito ka ŋinya, ŋinya ŋulu erayete ŋicok a ŋikabilae kec ka ŋikito ŋulu erayete ŋaraito ŋuna eya ŋicok a ŋikabilae kec. Toanyu Akuj atemar ajokak ŋun. 13Toyakaun ataboŋ ka toyakaun ataparacu, arae ŋin akoloŋit ŋina a ŋauni.
14Tema Akuj, “Toyakaun ŋiboorei ŋulu ecayete nariwo ŋina alokidiama, totyaka apaaran ka akuwar; toruworos ikes igyerito ŋatubeta ŋuna ke ekaru, ŋirwa ka ŋikaru. 15Toruwor ikes akica anariwo a ŋina alokidiama, kinwak akica kec akwap.” Apotu ŋun kitiyakin. 16Tosub Akuj ŋiboorei ŋulu ecayete ŋuluarei ŋulu apolok, kipuka ŋini epol akica keŋ apaaran ka ŋini edit akica keŋ kipuka akuwar; tosub daŋ Akuj ŋikacer. 17Kiwuak Akuj ikes nariwo kidiama, kinwak akica kec akwap, 18kipukata ikes apaaran ka akuwar, totyaka ikes akica ka akiryonut. Toanyu Akuj atemar ejokak ŋun. 19Toyakaun ataboŋ ka toyakaun ataparacu, arae ŋin akoloŋit ŋina a ŋaomwon.
20Tema Akuj, “Toyakaun nakipi ŋityaŋ ŋulu elyato, ŋulu eyarete ka toporo ŋikyeny anariwo a ŋina alokidiama akwap.” 21Tosub Akuj ŋityaŋ ŋulu apolok ŋulu eya nanamyo ka ŋisubuna ŋulu elyato anakipi, ŋulutyaŋ a ŋikabilae kec; ka ŋulukyeny ŋulu a ŋabebenuk a ŋikabilae kec. Toanyu Akuj atemar ejokak ŋun. 22Kiterereŋ Akuj ikes tema, “Touryata, topita, kilelebunos nakipi ŋuna a ŋanamyo; topita ŋikyeny daŋ anakwap.” 23Toyakaun ataboŋ ka toyakaun ataparacu, arae ŋin akoloŋit ŋina a ŋakan.
24Tema nabo Akuj, “Toyakaun nakwap ŋisubuna ŋulu eyarete ŋulu a ŋolokabila: Ŋibaren, ŋityaŋ ŋulu elyato ka ŋityaŋ ŋulu ka ariet ŋulu a ŋolokabila.” Apotu ŋun kitiyakin. 25Tosub Akuj ŋityaŋ ŋulu anakwap a ŋikabilae kec: Ŋibaren a ŋikabilae kec, ŋityaŋ adaŋ ŋulu elyato alokwap a ŋikabilae kec. Toanyu Akuj atemar ejokak ŋul.
26Tema nai Akuj, “Osubutu ŋituŋa eyakatar ŋasima yok, ikikwaan ka iwon; kipukata ikes ŋityaŋ ŋulu ka anam, ŋikyeny ŋulu alokidiama, ŋibaren ka ŋityaŋ daadaŋ ŋulu ka akwap ta ibore daadaŋ ŋini elyat alokwap.”
27Tosub Akuj ŋituŋa eyakatar ŋasima keŋ,
alopite a ŋolo eyakatar ŋasima keŋ, abu tosub ikes.
Tosub ekile ka aberu.
28Kiterereŋ Akuj ikes; tolimok tema, “Touryata, topita, kilelebun nakwap kipukata iŋes; kipukata ŋityaŋ ŋulu ka anam, ŋikyeny daadaŋ ka ŋityaŋ daadaŋ ŋulu elosete ta ŋulu elyato.” 29Tema Akuj, “Kiŋolikisi, akainak ayoŋ iyes ŋikito daadaŋ ka ŋinya daadaŋ ŋulu erayete ŋicok anakwap, ŋolokitoe eraii daadaŋ, eruwor ŋaraito keŋ akimuj kus. 30Akainak ayoŋ iyes ŋityaŋ daadaŋ ŋulu ka akwap, ŋikyeny daadaŋ, ŋiboorei daadaŋ ŋulu elyato ka ŋinibore eyari alokwap daadaŋ ta ŋikito ka ŋinya ŋulu alibak daadaŋ, akainak iyes toruworos akimuj kus.” Apotu ŋun kitiyakin. 31Toanyu Akuj ibore daadaŋ ŋini abu iŋes tosub, toryamu kire ejokak nooi. Toyakaun ataboŋ ka toyakaun ataparacu, arae ŋin akoloŋit ŋina a ŋakanikapei.
Sélection en cours:
Akisy. 1: NIB2008
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Ngakarimojong Interconfessional Bible © Bible Society of Uganda, 2008.