GÉNESIS Qelqaq qallariynin
Qelqaq qallariynin
“Génesis” simiqa “qallariy” ninantan nin. Diospa simin qelqapi ñawpaqkaq libroqa willakun imaynatachus teqsimuyuntinpa qallarisqanta, runaq kay pachapi kamasqa kasqanta, runaq huchallikusqantawan. Chaymantataq willakun imakunatachus runapaq Diospa ruwasqantawan.
Kay qelqaqa iskaymanmi t'aqakunman:
1) Capítulo nisqakuna 1-11: Kay t'aqan willakun imaynatachus teqsimuyuntinpa kamasqa kasqanta, runaq kamasqa kasqanta, huchapas muchuypas rikhurisqantawan. Willakullantaq ñawpa tayta Adanmanta Noekama, hinallataq hallp'ata unuq millp'usqanta, Babel nisqa torre perqasqatawan.
2) Capítulo nisqakuna 12-50: Kay t'aqan willakun Israel runakunaq ñawpa taytan Abrahammanta, Isaacmanta, Jacobmantawan. Willakullantaq Jacobpa churin Josemanta wawqenkunamantawan. Willakullantaq Egipto suyuman Jacobpa aylluntin tiyakuq risqanta, hinaspa chay suyupi askhayapusqankuta.
Kay willakuypa sapanka t'aqanpin Diosmanta uyarinchis. Paymi runakunata juzgan hinaspan millay kawsaqkunata muchuchin, munakuspa kasukuqninkunatataq ichaqa waqaychan, pusan, yanapan.
Chay hinan, kay libroqa teqsimuyuntinta Diospa kamasqan kasqanta willakuspa qallarin, hinaspan Diosqa llaqtanta mana qonqaspa watukushanallanpaq prometekusqanta willakuspa tukupun.
Kay libropin kaykunamanta willakun:
1.1—2.25 Teqsimuyuntinpa kamasqa kasqan, runaq kamasqa kasqanpiwan.
3.1-24 Huchaq rikhurisqan, imaymana muchuypa qallarisqanpiwan.
4.1—5.32 Adanmanta Noekama.
6.1—10.32 Noemantawan hallp'ata unuq millp'usqanmantawan.
11.1-9 Babel nisqa torremanta.
11.10-32 Semmanta Abramkama.
12.1—35.29 Abrahammanta, Isaacmanta, Jacobmantawan.
36.1-43 Esaupa mirayninmanta.
37.1—45.28 Josemanta wawqenkunamantawan.
46.1—50.26 Israel nisqa Jacobpa mirayninkunaq Egipto suyupi kasqan.
Sélection en cours:
GÉNESIS Qelqaq qallariynin: QC88
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Biblia en Quechua de Cuzco © Sociedades Bíblicas Unidas, 1988.