Рут 3
3
Рутна Вуаз раццаъ
1Наумийи Рутдиз кӀуру: – Йиз риш, увуз рягьят хьпан бадали, яв бин ккебгънийиш, ужу даршлийин? 2Магьа Вуаз, дугъан гъуллугънаъ айи дишагьлийирихъди уву гъахьунва, думу ихь гъайгъу зигрур даринхъа? Хябяхъди дугъу раццаъ чан мух микӀлахь гьипра. 3ДижикӀну, ицци ниар кадатну, яв уччвудар палтар алахьну, раццʼина кудучӀв, аммаки ипӀуб-убхъуб апӀайиз дугъаз уву рякъруси мапӀан. 4Думу дахърушв аьгъю апӀин ва, ахуз дахъиган, душну, дугъан ликариин илипнайиб алдабгъну, увура дахъ. Хъасин уву гьапӀну ккундуш, дугъу пидивуз.
5Рутди дугъаз:
– Уву гъапибси вари апӀидиза, – кӀуру.
6Рут раццʼина гъушу ва вари чаз сижари гъапибси апӀуру. 7Вуазди гъипӀу, гъубхъу, гьялар ачухъ гъахьи, хъа гъушу ва таяйихъ ахуз дахъу. Ихтиятди Рутра дина гъафи. Дугъу дугъан ликарилан алдабгъу, учвра дахъу. 8ГьацӀишваринган думу хъиргру, илдицуру, фу лигурва, чан ликарихъ дишагьли дахъна. 9Хъа Вуазди гьерхру:
– Фуж вува?
Дугъу гъапи:
– Рут вуза, яв лукӀ, узу яв хлинцциккна гъадагъ, фицики уву йиз гъайгъу зигру багахьлу вува.
10Вуазди кӀуру:
– РАББИЙИХЬАН ужʼвал дурубкьнайир вува, йиз риш! Гьаму яв вафалувал, мугагьназтӀан хъа мюгькам шлуси гъапӀунва, фицики уву, касиб вушра, девлетлу вушра, жигьил агури гъахьундарва; 11гьаци вуйиган, йиз риш, гучӀ мапӀан, уву тӀалаб гъапӀуб вари апӀидиза. Йиз халкьдин варидарин мелзниин уву абурлу дишагьли вуди алва. 12Дюз ву, узу яв гъайгъу зигру багахьлу вуза. Амма узутӀан багахь вуйир а. 13Ахъли гъуз, закур, эгер уву дугъу кьабул гъапӀиш, ужу ву, гъит кьабул апӀри, хъа эгер уву кьабул апӀуз ккун дархьиш, узу кьабул апӀарзаву. Гаф тувраза, РАББИ чӀивир вуйирси, йиз гафарра кӀулиз адагъидиза! ГвачӀиндизкьан ах.
14Думу дугъан ликарихъ даахну гъузу, хъа чиб-чпи рякъюри-дярякъри акв хьайиз, гъудужвуру.
Вуазди фикир гъапӀу: „Гъит раццʼина дишагьли гъюбкан саризра аьгъю дарибшри“. 15Хъа кӀуру:
– Яв зиълан илипнайи шал ча, ккибис.
Дугъу ккибису ва Вуазди душвазди йицӀикьюб сеъ мух аьху ва дугъан кьялʼин иливу, шагьриз гъушу. 16Хъа Рут чан сижарихьна гъюру. Сижари: «Фу гъабхьи, йиз риш?» – пну, гьерхру. Дугъу, Вуазди чаз фу гъапӀнуш, вари ктибтуру. 17Хъа кӀуру:
– Дугъу гьаму йицӀикьюб сеъ мух тувунзуз ва: «Яв сижарихьна ичӀи хилди мягъян», – гъапунзуз.
18Сижари гъапи:
– СацӀиб дийигъ, йиз риш, му ляхин фици ккудубкӀуруш, лигарва, фицики гъи му ляхин гьял дарапӀди думу сикин хьидар.
Sélection en cours:
Рут 3: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
