Рут 2
2
Рутна Вуаз чиб-чпиз алахьуб
1Наумийихъ чан жилир Элималикдин тухмиан бегьем гьюрмат айи девлетлу кас хъайи. Дугъан ччвур Вуаз вуйи. 2Муав миллетдикан вуйи Рутди Наумийиз кӀуру:
– Узу, хутӀлариина душну, узуз чӀалра даркӀрурин кьяляхъди мухан кӀулар уч апӀидикӀана?
Дугъу:
– Гъарах, йиз риш, – гъапи.
3Думу гъушу ва иган убгрударин кьяляхъди кӀулар дюхюз хъюгъю.
Гьаци гъабхьнуки, му хутӀил Элималикдин багахьлу Вуаздинуб вуйи. 4Магьа, Вифлеемдиан Вуаз гъюру ва иган убгрудариз:
– РАББИ учвухъди ишри! – пну салам тувру.
Дурари дугъаз:
– РАББИЙИ увуз ужʼвал апӀри! – пну жаваб тувру.
5Дугъу иган убгрударин аьхюрихьан гьерхру:
– Гьатму жигьил дишагьли шлинур ву?
6Иган убгрударин аьхюри жаваб туву:
– Му жигьил муав дишагьли Наумийихъди Муав уьлкейиан дуфнайир ву. 7Дугъу: „Иган убгрударин кьяляхъди мухан кӀулар уч апӀуз хай шулин?“, пну, гьерхнийи. Ва, гвачӀнианмина хъюгъну гьамусдиз гьамшваъ а; сирниккнакьан гъяри шулдар.
8Хъа Вуазди Рутдиз гъапи:
– Хъебехъ узухъ, йиз риш, кӀулар дюхюз жара хутӀлиина мягъян, мушвлан муулдучӀван, йиз гъуллугънаъ айи дишагьлийирихъди гьамшваъ гъуз; 9дурар фуну хутӀлизди гъягъюруш лиг ва гьадрарихъди гъарах. Магьа, увук мукучанай кӀури, узу йиз иган убгрудариризра дупназа. Увуз шид ккун гъабхьиган, йиз иган убгрудари ацӀу гварарихьна гъарах ва увура убхъ.
10Дугъу ис духьну, жилиинакьан икрам апӀури гъапи:
– Узу жара миллетдинур вушра, узу кьабул апӀузкьан яв улихь фтиинди ужувлаз лайикь гъахьну?
11Вуазди жаваб туву:
– Узуз, яв жилир йикӀбан кьяляхъ уву яв сижариз гъапӀу варибдикан, уву яв адаш, яв дада, яв ватан дипну, увуз гьамусдиз аьгъдру халкьдихьна гъюбкан, деебхьназуз. 12Гъит РАББИЙИ увуз, яв гьадму ляхниз дилигну, туври! Уву Израилин Аллагь РАББИЙИХЬНА, Дугъан хлинццарикк архаин хьпан бадали, дуфнайир вува. Гъит увуз Дугъхьан гьубкӀну вуйи кьимат ибшри!
13Дугъу гъапи:
– Йиз аьхюр, узуз гьамциб ужʼвал улупваки! Уву узу ккаарцунва. Яв гъуллугънаъ айи дишагьлийирин гьич саринра ккайир даршра, йиз, яв лукӀран, кӀваъ айиси гъапунва.
14Лисундин вахтна Вуазди дугъаз гъапи:
– Уьл ипӀуз мина гъач. Кубсри ипӀин.
Думу иган убгрударин багахь деъру. Вуазди дугъаз кӀурицӀ тувру, дугъу ипӀуру, ацӀру, ва хъирибгънура гъубзру. 15Хъа мухан кӀулар уч апӀуз хъюгъру. Вуазди чан иган убгрудариз гьамциб буйругъ тувру: «Шиларин арйиригъра уч апӀуз гъитай. Дугъаз гиран макадапӀанай. 16Шиларигъянра гъядахьруси апӀинай, гьадгъаз гъитай, гъит уч апӀри, люкьнар мапӀанай».
17Гьамци дугъу хябяхъдиз уч апӀури гъахьну, хъа уч гъапӀдар гьадушвʼин ктӀишуру, ва йирхьуб сеъкьан мух шулу. 18Думу мух хулаз хуру, ва гъабхиб сижариз рябкъюру. Ва Рутди, лисундин вахтна чав гъипӀубдикан дубхну, дугъазра тувру. 19Сижари дугъхьан гьерхру:
– Гъи уву наан кӀулар уч гъапӀунва, наан гъилихунва? Уву кьабул гъапӀур ужувлакк ккахъривучв!
Рутди чан сижариз, чав наан ляхин гъапӀнуш, ктибтуру:
– Узу гъи гъилиху адмийин ччвур Вуаз вуйи.
20Хъа Наумийи чан швушваз гъапи:
– Ужʼвал ибшри дугъаз РАББИЙИХЬАН! Думу чӀивидаризра, гъийихдаризра вафалу ву.
Хъасин Наумийи дугъаз кӀуру:
– Думу адми ихь багахьлу, ихь гъайгъу зигрударикан #2:20 Мусайин Къанундиинди гьарсар касдихъ гъайгъу зигру багахьлу духьну ккундийи. Эгер бицӀидар хъадру кас гъакӀиш, гъайгъу зигру багахьлуйи дугъан тум давам дапӀну ккундийи. Думу ачӀни гъахьи хпир чаз дитуз буржлу вуйи. Думу дишагьлийикан гъахьи сарпи бай гъакӀирин бай вуди гьисаб апӀуйи. Хъа эгерки сар кас чан хутӀил касибвалиан масу тувуз мажбур шули гъабхьиш, гъайгъу зигру багахьлуйи думу гъадабгъну ккундийи. сар ву.
21Муав Рутди чан сижариз кӀуру:
– Гьеле дугъу узуз гъапнура ву: „Игнар ккудукӀайизкьан, йиз гъуллугънаъ айидарихъди гъуз“.
22Хъа Наумийи чан швушваз гъапи:
– Дугъан гъуллугънаъ айидарихъди гъягъюб ужуб апӀурава, йиз риш, жарадарин хутӀлариин увуз гиран ктапӀуб мумкин ву.
23Дугъу Вуаздин гъуллугънаъ айи дишагьлийирихъди, муханна дяхнин игнар ккудукӀайизкьан, кӀулар уч апӀуру. Дидхъан думу сижарихъди хулаъ гъузру.
Sélection en cours:
Рут 2: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023