Эстер 7
7
Аман буруздикк ккерхуб
1Эстерин демраз паччагь ва Аман гъафнийи. 2ЦӀийикӀултӀан дурари, улихьганси, чяхир убхъуру ва паччагьди Эстериз кӀуру: «Фу тӀалаб апӀурава, Эстер? Вари тамам апӀурза. ТӀалаб фу вуяв? ГьацӀ паччагьлугъ тӀалаб гъапӀишра – вари тувдизавуз».
3Паччагьдин хпир Эстери жаваб тувру: «Эгер узу яв рягьимлуваликк ккаш, эгер паччагьдиз гьаци лазим вуш, йиз уьмур пуч дарапӀри – магьа йиз тӀалаб! Гъит йиз халкь пуч дарапӀри – магьа йиз аьрза! Гьаз гъапиш учу масу тувна – узура, йиз халкьра – урччвура, терг апӀура! 4Эгер учу лукӀвализ туврайиш, учкан лукӀар апӀурайиш, узу ккебехъуйза – гьятта гьациб бедбахтвалиъра узу паччагь сикинсуз апӀдайза!»
5Паччагь Ахашʼверушди Эстерихьан гьерхбар-хъерхбар апӀуз хъюгъру: «Шли? Фуж ву думу дициб ляхин гъапӀур? Наан а думу?» 6Эстери жаваб тувру: «Думу къаршу душман – магьа гьаму инсафсуз Аман ву!» Паччагьдин ва дугъан хпирин улихь Амандик къурху кабхъру.
7Хъял гъафи паччагьди чяхрин дем гъибтру, ва думу дараматдин багъдиз удучӀвуру, хъа Аман паччагьдин хпир Эстерикан, чан уьмур пуч дарапӀуб тавакъу апӀуз гъузру: дугъаз паччагьди чан кьисмат гьял гъапӀуб гъябкънийи.
8Паччагь дараматдин багъдиан дем айишваз кьяляхъ гъафиган, дугъаз Аман, Эстер дуснайишвак унтӀ кабсну, рякъюру. Паччагьди чӀигъ апӀуру: «Йиз хулаъ, йиз улихь паччагьдин хпириина алжагъуб гьапӀруб ву!»
Паччагьди гьаци гъапнийи – ва Амандин маш гъебкнийи#7:8 ЙикӀуз жаза адабтӀнайидарин маш гъебкри гъахьну.. 9Гьадмуган паччагьдин гъаравашарикан сар вуйи Харвонайи гъапну: «Гьякьикьатдиъра, Аманди чан гафариинди паччагь хатӀайихьан гъюрхю Мярдягьяйиз буруз гьязур апӀурайи, магьа гьамус думу къанна хьуб метр али буруз Амандин хуларин багахь дубсну!»
Паччагьди амур гъапӀу: «Думу гьадушваъ буруздикк ккерхай!» 10Мярдягьяйиз гьязур гъапӀу гьадму буруздикк Аман ккерхнийи. Ва паччагьдин хъял илцифнийи.
Sélection en cours:
Эстер 7: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023