Паччагьлугъар-4 22
22
Ягьудайин паччагь Юшия
1Паччагь шлуган, Юшияйин миржид йис яш вуйи. Дугъу Ерусалимдиъ сумчӀурна сад йисан паччагьвал гъапӀнийи. Дугъан дадайиз Едида кӀуйи, думу тухумдиинди Буцкьат шагьриан вуйи Адаяйин риш вуйи. 2Юшияйи РАББИЙИН улариъ дюзиб вуйиб апӀуйи. Думу чан арха Давуддин вари рякъяриъди, я арччлахъинди, я гагвлахъинди улдудучӀври, гъягъюйи.
3Юшия паччагьдин бикӀрур вуйи Шафан айи. Думу Ацалияйин бай, Мешуламдин худул вуйи. Чан паччагьвалин йицӀимиржидпи йисан Юшия паччагьди Шафан РАББИЙИН Хулаз, гьамци дупну, гьаънийи:
4– Заанурин аьхюну гъуллугъчи Хилкияйихьна гъарах. РАББИЙИН Хулаз халкьди гъабхи ва урнарихъ хъайидари уч гъапӀу пул гьисаб апӀри. 5Гъит думу пул РАББИЙИН Хулаъ ляхнар апӀрудариин гюзчивал гъабхуз тяйин дапӀнайидарихьна туври. Хъа дурари РАББИЙИН Хал рас апӀру 6харатчйириз, тикилишчйириз ва гъвандин устйириз туври. Гъит дурари думу пулихъ гьацира Хал цӀийи алапӀуз гакӀул ва ктау гъванар масу гъадагъри. 7Дурариз ихтибар дапӀнайи пулин гьякь-гьисаб дурарихьан тӀалаб апӀуб лазим дар, гьаз гъапиш дугъриди ляхин апӀуру.
РАББИЙИН Къанундин китаб Заанурин Хулаъ бихъуб
8Заанурин аьхюну гъуллугъчи Хилкияйи бикӀрур Шафандиз гъапнийи:
– Узуз РАББИЙИН Хулаъ Къанундин китаб гъибихъунзуз.
Дугъу думу Шафандихьна тувнийи, ва Шафанди думу гъурхнийи. 9БикӀрур Шафан хъасин паччагьдихьна гъафнийи ва дугъаз гъапнийи:
– Яв гъаравашари РАББИЙИН Хулаъ айи вари пул гъадабгъну ва ляхнариин гюзчивал гъабхрударихьна тувну.
10БикӀрур Шафанди хъасин паччагьдиз гъапнийи:
– Заанурин гъуллугъчи Хилкияйи узуз саб китаб тувну.
Ва Шафанди думу китаб паччагьдиз урхуз хъюгънийи.
11Къанундин китабдиан гафар деерхьну, паччагь пашман гъахьнийи, ва дугъу чан палтар гъячӀяргънийи. 12Паччагьди Заанурин гъуллугъчи Хилкияйиз, Шафандин бай Ахикамдиз, Михайин бай Ахбуриз, бикӀрур Шафандиз ва паччагьдин гъараваш Асаяйиз амур гъапӀнийи:
13– Гъарахай, гъибихъу китабдиъ узкан, халкьдикан ва вари Ягьудайикан дибикӀнайибдин гьякьнаан РАББИЙИХЬАН гьерхай. Ихь абйир гьаму китабдин гафарихъ хъпебехъри хьпаз, дидик ухьуз дибикӀнайиганси ляхнар дарапӀри хьпаз лигну, ухьʼин алабхънайи РАББИЙИН хъял гизаф зурбаб ву.
14Заанурин гъуллугъчи Хилкия, Ахикам, Ахбур, Шафан ва Асая Хулдайихьна гъушнийи. Думу Тиквайин бай, Хархасдин худул, палтар уьрхрур вуйи Шалумдин хпир вуйи. Хулда пайгъамбар вуйи. Думу Ерусалимдин кьюбпи мягьялиъ яшамиш шулайи. Дурари дугъаз вари ктибтнийи. 15Хулдайи гъапнийи:
– Учву узухьна гьау инсандиз йипай. Гьамци кӀура Израилин Заанур вуйи РАББИЙИ: 16«Узу му жилиина ва мушвʼин яшамиш шулайидариина бала гьапӀдиза. Ягьудайин паччагьди гъурху китабдиъ дибикӀнайиб вари тамам хьибди. 17Дурар Узхьан гьудучӀвбаз, бутариз ицциб ниъ хъайи шейʼар ургбаз ва дурари чпин вари хяви ляхнар апӀбаз лигну, Узук хъял капӀну. Гьаддиз Йиз хъял му жилиин кабхьиди ва кутӀубшвидар. 18РАББИЙИКАН ккун апӀуз учву гьау Ягьудайин паччагьдиз йипай: „Израилин Заанур вуйи РАББИЙИ гьамци кӀура: увуз думу китабдиъ дибикӀнайиб гьамус аьгъявуз. 19Узу му жилиз ва мушвʼин яшамиш шулайидариз къаршуди гъапиб, дурариз барбатӀвал ва агь кьисмат шлувал гъеебхьунвуз. Думуган яв юкӀв гъюдли гъабхьну ва уву Йиз улихь мютӀюгъ гъахьунва, уву яв палтар гъячӀяргъюнва ва Йиз улихь гъишунва. Гьаддиз Узуз уву кӀуруб гъеебхьунзуз. 20Гьаддиз Узу уву яв архйирихьна гъадагъидиза, ва уву ислягьвалиинди накьвдик кивди. Узу му жилиин алапӀру бала яв улариз рябкъидар“».
Дурари Хулдайин жаваб паччагьдихьна гъурубкьнийи.
Sélection en cours:
Паччагьлугъар-4 22: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023
