Паччагьлугъар-4 21
21
Ягьудайин паччагь Манаше
1Манашейин, паччагь шлуган, йицӀикьюд йис яш вуйи. Дугъу Ерусалимдиъ хьцӀурна хьуд йисан паччагьвал гъапӀнийи. Дугъан дадайиз Хефцибах кӀуйи. 2РАББИЙИ израиларихьан гьутӀуркку халкьарин хяви аьдатарихъди гъягъюри, дугъу РАББИЙИН улариъ писвал апӀуйи. 3Чан адаш Хизкьийи гъадаргъу тепйириин али гирамишвар дугъу цӀийикӀултӀан тикмиш гъапӀнийи. Израилин паччагь Ахавдихъан мисал гъадабгъну, Баализ гъурбан апӀрушвар гъапӀнийи ва Ашерайин мурхьул дубснийи. Дугъу вари завун кьушум вуйи ригъдиз, вазлиз ва хядариз ибадат ва гъуллугъ апӀуйи. 4Гьятта РАББИЙИ чакан «Ерусалимдиъ Йиз ччвурназ гьюрмат апӀиди» гъапи РАББИЙИН Хулаъра дугъу гъурбан апӀрушвар тикмиш гъапӀнийи. 5РАББИЙИН Хулан кьюбиб гьяятариъ дугъу вари завун кьушум вуйи ригъдиз, вазлиз ва хядариз гъурбан апӀрушвар тикмиш гъапӀнийи. 6Дугъу чан бай цӀигъ гъурбан гъапӀнийи, фал кипуйи, изитӀ апӀуйи, гъийихдариз дих апӀрударихъди ва сюгьюрчйирихъди гаф-чӀал апӀуйи. Дугъу РАББИЙИН улариъ, Дугъак хъял капӀри, гизаф писвал гъапӀнийи.
7Дугъу Ашерайин мурхьул ктапӀуз амур гъапӀнийи ва думу РАББИЙИН Хулаъ дивнийи. Думу Хулкан РАББИЙИ Давуддиз ва дугъан бай Сулеймандиз гъапнийи: «Му Хулаъ ва Израилин вари тухмаригъян Узу гъядябгъю Ерусалимдиъ Йиз ччвурназ даимайиз гьюрмат апӀиди. 8Узу гьамусдихъантина израилар Узу чпин абйириз туву жилилан улдучӀвуз гъитидарза. Анжагъ дурари Узу чпиз амур гъапӀуб вари тамам дапӀну ва дурариз Йиз лукӀ Мусайи туву Къанун дюбхну ккунду».
9Амма халкь хъпехъундайи. Манашейи дурар рякълан алдаънийи. Дурар РАББИЙИ израиларин улихь терг гъапӀу халкьаритӀан артухъ писвал апӀуз хъюгънийи. 10РАББИЙИ Чан гъаравашар вуйи пайгъамбрарин мелзналан кӀуйи:
11– Ягьудайин паччагь Манашейи хяви гунгьар гъапӀну. Дугъу чпин улихьна вуйи амореяритӀан артухъ писвал гъапӀну ва чан бутариинди Ягьудайиз гунгьиз ял гъапӀну. 12Гьаддиз Израилин Заанур вуйи РАББИЙИ гьамци кӀура: «Узу Ерусалимдиин ва Ягьудайиин гьациб бала алапӀидиза, шлиз дидкан гъеебхьиш, дугъан юкӀв тӀубкӀиди. 13Узу Ерусалимдиз жаза, Самарияйиз гьадабтӀганси, гьадабтӀидиза ва уьлчме Ахавдин тухумдизси ишлетмиш апӀидиза. Узу Ерусалим, зах марцц апӀруганси, марцц ва маш кӀанакк апӀидиза. 14Узу ктабгъу халкьдихъан гъуздарихьан гьудучӀвидиза ва дурар душмнарин хилариз тувидиза. Ягьудайин вари душмнари дурар тӀараш апӀиди. 15Гьаз гъапиш дурари Йиз улариъ писвал апӀуйи, чпин абйир Египетдиан удучӀвхъамина гъийин йигъазкьан Узук хъял капӀуйи».
16Манашейи Ягьудайин агьалйириз гунгьихьна ял гъапӀнийи ва дурари РАББИЙИН улариъ писвал апӀуз гъитнийи. Дидланна савайи, дугъу тахсир ктру ифи гьадмукьан удубзнийики, Ерусалим саб гъирагъдихъан тмунуб гъирагъдихъна дидихъди абцӀнийи.
17Манашейи паччагьвал гъапӀу вахтнан жара гьядисйирикан, дугъу гъапӀу вари ляхнарикан ва дугъу гъапӀу гунгьикан «Ягьудайин паччгьарин тарихарин китабдиъ» дибикӀна. 18Манаше чан архйирихъди архаин гъахьнийи ва чан гъалайиъ айи Уззайин багъдиъ накьвдик кивнийи. Хъа дугъан бай Амон дугъан кьяляхъ паччагь гъахьнийи.
Ягьудайин паччагь Амон
19Паччагь шлуган, Амондин къанна кьюд йис яш вуйи. Дугъу Ерусалимдиъ кьюд йисан паччагьвал гъапӀнийи. Дугъан дадайиз Мешулемет кӀуйи, думу тухмиинди Ютба шагьриан вуйи Харуцдин риш вуйи. 20Чан адаш Манашейиси, Амондира РАББИЙИН улариъ писвал апӀуйи. 21Думу чан адашдин вари рякъяриъди гъягъюйи. Дугъу чан адашди гъуллугъ апӀури гъахьи бутариз гъуллугъ ва ибадат апӀуйи. 22Думу чан абйирин Заанур вуйи РАББИЙИХЬАН гьидицнийи ва РАББИЙИН рякъюъди гъягъюрдайи.
23Амон паччагьдин багахь гъуллугъ апӀурайидари дугъаз къаршуди жини йикьрар гъапӀнийи ва паччагь чан гъалайиъ йивну гъакӀнийи. 24Хъа уьлкейин халкьди Амон паччагьдиз къаршуди жини йикьрариъ гъахьидар вари гъийихнийи ва Амондин бай Юшия паччагь гъапӀнийи.
25Амонди паччагьвал гъапӀу вахтнан жара гьядисйирикан «Ягьудайин паччгьарин тарихарин китабдиъ» дибикӀна. 26Думу Уззайин багъдиъ чан гюмбтиъ кивнийи. Ва дугъан бай Юшия дугъахъна паччагь гъахьнийи.
Sélection en cours:
Паччагьлугъар-4 21: ТабГК
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Институт перевода Библии, 2010, 2013, 2016, 2018, 2023