मत्तायोस 28
28
येसुसी उज्जा चो'अना
(मर 16:1-8; लूक 24:1-12; यॊ 20:1-10)
1ख़न्न ऎख़ना उल्ला मुंजियस ती हप्ता ही मुन्द उल्ला बिज्जा गनेम मरियम मगदलेनी अरा नन्ना मरियम मसड़न ऎरा बरचर।
2आ बारी कोड़हे ख़ॆख़ेल नुक्रना मंजा, एन्देरगेका उर्बासी ओन्टा पैकस मेर्ख़ा ती इत्तियस अरा मसड़ा हेद्दे बरचस ती पखनन ताड़चस अरा अइय्या उक्कियस। 3आसी रूप बिजली लेक्खा अरा आसी किचरी कीबा लेक्खा पंडरू रहचा। 4आसी इल्चका ती ख़ापुर असरा ख़च्चियर, अरा केचका लेक्खा मंजर केरर।
5आ पैकस मुक्कारिन बाचस, “अमा एल्चा, ऎन अख़दन का नीम क्रुस नू ठोकचका नासरेत ता येसुसिन बेद्दालदर। 6आस इसन मलकस, तंग्है बाचका लेक्खम आस केचका ती उज्जा चॊचकादस, बरा, आसी कीदका अड्डन ऎरा। 7अक्कुन नीम लॆम कला ती आसी चेलारिन तेंगा का आस केचका ती उज्जा चॊचकादस। आस निमन ती मुन्द गलिलेया कालदस, असन नीम आसिन ऎरोर। ऎरा, ऎन निमन तिंका चिच्चकादन।”
8अबड़ा मुक्कर इल्चका अरा रिझ गने मसड़ा ती लॆम किर्रियर ती येसुसी चेलारिन इदन तेंगा गे बुंगनुम केरर। 9आचका येसुस आरिन भेंट मंजस अरा बाचस, “जोहार,” अबड़र हेद्दे बरचर ती आसी ख़ेड्डेन धरचर ती ऒड़ लगियर। 10ख़ने येसुस आरिन बाचस, “अमा एल्चा, एंग्है भईरिन कला ती तेंगा का गलिलेया किर्रिमबि'ओर, असन एंगन ऎरोर।”
ख़ापुर ही अरो
11अबड़ा मुक्कर काला लगियर ख़ने, ख़ापुर ती जोक्कोर नगरे नू बरचर ती मुध नैगारिन उर्मी हलन तिंगियर। 12ख़ने मुध नैगर सेयान आलर गने भेंट मंजर ती सलहा नंजर। अरा आर अबड़ा सैनर गे बग्गे ढिबा चिच्चर ती बाचर, 13“एन्ने ब'अके का, ‘माख़ा बारी ख़न्द्र'आ लिक्कम ख़ने, आसी चेलर बरचर ती आसिन ख़ड्डर होच्चर।’ 14ई कत्था राजीख़ापुस गूटी अंड़सो होले, ऎम आसिन बुझाब'ओम अरा निमन सस्ती ती बछाब'ओम।” 15औंगे आर ढिबा होच्चर ती एकासे बाचका रहचर अन्नेम नंजर। ई कत्था इन्ना गूटी यहूदी आलर नू बींड़रकी र'ई।
येसुसी ऎथ्रना अरा छेद्दे पॆसका
(मर 16:14-18; लूक 24:36-49; यॊ 20:19-23; तइ 1:6-8)
16तहाँ ग्यारा चेलर गलिलेया नू येसुस आरिन तिंकाचस आ परता नू केरर।#मत्ता 26:32; मर 14:28 17आर येसुसिन इरियर ख़ने, आर आसिन ऒड़ नंजर, लिकिन नॆका नॆका धुक-पुक मंजा। 18तहाँ येसुस आर ही हेद्दे बरचस ती बाचस, “मेर्ख़ा अरा ख़ॆख़ेल नू उर्मी अदिया एंगा चीरकी र'ई। 19औंगे नीम कला अरा उर्मी राजी ता आलारिन चेला कम'आ अरा आर गे धर्मे बबस अरा ख़द्दस अरा नेम्हा बॊलतासी नामे ती नॊड़रत'आ,#तइ 1:8 20अरा आरिन उर्मी कत्था एकदन ऎन निमा पॆसकादन, मन'आ गे सिखाब'आ। अरा ऎरा, ऎन उर्मी उल्ला ख़ॆख़ेल ही मुंज्रना गूटी निम्है गने र'अदन।”
Sélection en cours:
मत्तायोस 28: KURUXBSI
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
