Matthew 3
3
Johan-dzülukhaküsüo kümütha
1Süze sütüce sü John dzülukhaküsüoe Judea nhatsalümütha die; 2Nieko thülü küdeyite, tüyo küde münoto ba küta na. 3Süze hiohi Isaiah sadzühküseo pu dzüh po die; mipüh nhatsalü se die; neko Nyepoo sho küsühyite, Pu shopriko thi kümüziyite; zi küta khüo sü pu zo. 4Mo John hi Utma püh pu khüne thi, thigi shepha püh pu shepha, süze kopre mo mükhizü püh pu co thi. 5Sücesü Jerusalem, Judea, cejü mütü mo Jordan kümütu rüna mütü lüno mi puce vori. 6Sidie u küphomako phra sü die pupo Jordan lüno puko püh dzülu püyi. 7Eli, pu Phariseeko mo Sadduceeko kükro pu dzülu khaküsülü vori küba ngo küyice puko yisü, Yhie! Nyhibüpü shüyieko, sopühno neko po vori küzü lükhuo mhuzülü tayi no die neko ce po sü-a? 8Süna thülü küde küyi se-o po rüthi pariyite. 9Sidie nelüno hari Abraham sü hapo zo; süzi küti lüta hite, I neko ce po süto, Jihova-e kütsü hiko yori Abraham nuneko mülhü süyi vezo. 10Mo tsüri sühdorü-o püh sühbo phelü müzüzo. Süna sühbo kühopüri u se zhiyi kümokhü ve va die kügü püh melü sü vato. 11I-e dzülüno thülü küde küyi dzülu püh neko prüyo küti zo. Eli, asa vori küzüo aceri zhoku, I pu pheku rhiri phrüyi shümo pühyi sümo, 12Pue Kümüsa Rüpü mo melü neko püh dzülu püto. Pu lhahüri Pubelü ba, Pu atalha münu die hü kümüsa to, sidie atalhako püh Pu khilü künguyito; eli sabühko püh mhü tayi külho melü müto vato.
Jisu dzülu pü küyi
13Sücesü Jisu Galilee lüno tasü Jordan rülü John po Pu püh dzülu pü tozu vori. 14Eli, John-e Pu kha die Pu yisü, I npo apüh dzülu küpü müsüh-o lü No ace vori zü me? zita. 15Süri Jisu pu zü küla die, tsüzo na a kha hite, kükrenamoli, süzi küsü lüno avü künanyi yono kümatho zho mütü thitsüh sü tozu ba küta na; zita. Süsa John ri thisü toli zita. 16Süsa Jisu dzülu pü küyi sa dzülüno ta mha parita; sücesü, Yhie tüko khri Pu prü mo John-e Jihova Rüpüo mükhro püh bi die vekrüzo Pu yo kiri küti ngo. 17Sücesü Yhie, Tüyono mhakhü püh; Hihi anu a khrü-o zo, I Pungo a künü thoo zo, zi kiri.
Sélection en cours:
Matthew 3: NAG5BSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Chakhesang Chokri Naga New Testament © Bible Society of India, 2015. Used by permission. All rights reserved worldwide.