مَتّا 13

تُهم چَنڈگئے مِسال

(مَرکاس 4‏:1‏–9؛ لوکا 8‏:4‏–8)

1هما رۆچا، ایسّا چه لۆگا در آتک و مَزَن‌گوَرمئے کِرّا شت و نِشت. 2مردمانی اَنچێن مزنێن رُمبے آتک و آییئے گوَرا مُچّ بوت که آ بۆجیگێا سوار بوت و نِشت. سجّهێن مردم گوَرمئے لَمبا اۆشتاتگ‌اَتنت. 3گڑا آییا مردمانا گۆن دَروَر#13‏:3 دروَر، بزان مَٹّ، مِسال، پئیم، ڈئول. و مِسالان بازێن درس و سَبکّے دات. گوَشتی: ”دِهکانے تُهمئے چَنڈگا شت. 4تُهمانی چَنڈگئے وهدا کَمّے تُهم راهئے سرا رِتک و بالی مُرگ آتکنت و وارتنتِش. 5کمّے تُهم ڈَل و ڈۆکانی تها رِتک که اۆدا هاک کمّ اَت. زوتّ رُستنت، چێا که هاک تنَکّ اَت. 6بله چه رۆچئے تْرندێن گرمیا گیمُّرت#13‏:6 گیمُّرگ، بزان هُشک تَرّگ، نپَسگیر بئیگ. و هُشک بوتنت، چێا که آیانی ریشّگ و وَنڈال#13‏:6 وَنڈال، بزان هُنڈال، ریشّگ و رۆتگ. جُهل نشُتگ‌اَتنت. 7کمّے تُهم چِرِکّ و ڈَنگرانی تها هم رِتک و چِرِکّ رُستنت و تُهمِش رُدَگا نه‌اِشتنت. 8اے دگه تُهم شَرّێن زمینا رِتکنت، رُستنت و هۆشگ و بَرِش دات، جاهے سَد سَری#13‏:8 سَد سَری، بزان سَد برابر.، جاهے شست سری و جاهے سی سری. 9هرکَسا گۆش پِر، بِشکنت.“

هُدائے بادشاهیئے راز

(مَرکاس 4‏:10‏–12؛ لوکا 8‏:9‏–10)

10مُرید آییئے کِرّا آتکنت و جُستِش کرت: ”تئو چێا گۆن مردمان په دَروَر و مِسال هبرَ کنئے؟“ 11آیانی پَسّئوا گوَشتی: ”پرچا که هُدایا اے زانت شمارا داتگ که آسمانی بادشاهیئے رازان سرپد ببێت، بله آیانا نداتگی. 12هماییا که چیزّے هست، آییا گێشتر دئیگَ بیت، تانکه آییا باز ببیت، بله کَسێا که نێست، هما که هست‌اِنتی هم، پَچ گِرگَ بیت. 13من پمێشکا په دَروَر و مِسال گۆن آیان هبرَ کنان که آ چارنت بله نگندنت، گۆشِش پَچ اَنت بله نه‌اِشکننت و سَرپد هم نبنت. 14اِشئیا نبیئے پێشگۆیی اے مردمانی بارئوا راست و سَرجم بئیگا اِنت که گوَشیت:

شما اِشکنێت، بله سَرپدَ نبێت،

چارێت، بله نگندێت.

15 چێا که اے کئومئے دل سِنگ ترّتگ،

گۆشِش گران اَنت،

وتی چمِّش بستگ‌اَنت

اگن اِشانی چمان بدیستێن و

گۆشان بِشکتێن،

اگن اِشانی دلا بزانتێن و

سرپد بوتێننت و دێم په من بیاتکێننت،

من دْراه کرتگ‌اَتنت. # 13‏:15 اِشئیا نبیئے کتاب 6‏:9‏–10.

16بله بَهتاور اَنت شمئے چمّ که گِندنت و شمئے گۆش که اِشکننت. 17شمارا راستێنَ گوَشان، بازێن پئیگمبر و پهرێزکارێا لۆٹتگ که هرچے شما گِندگا اێت، ما هم بدیستێن بله ندیستِش و هرچے شما اِشکنگا اێت، ما هم بِشکُتێن بله نه‌اِشکتِش.

تُهم چَنڈگئے مِسالئے مکسد

(مَرکاس 4‏:13‏–20؛ لوکا 8‏:11‏–15)

18نون دِهکانئے مِسالئے مانایا گۆش بدارێت. 19وهدے کَسے هُدائے بادشاهیئے هبرا اِشکنت بله سَرپدَ نبیت، گڑا شئیتانَ کئیت و هرچے که آییئے دلا کِشَگ بوتگ، آیان درَ کنت و بارت. اِش اَت راهئے سرا رِتکگێن تُهمانی مِسالئے مانا. 20آ تُهم که ڈَل و ڈۆکانی تها رِتکنت، هما مردمئے مِسال اِنت که هُدائے هبرا اِشکنت و هما دمانا په گَل و شادِهَ مَنّیت، 21بله اے سئوَبا که ریشّگ و وَنڈالی نجتگ، هُدائے هبر آییئے دلا تان دێرا نمانیت. وهدے هُدائے هبرئے سئوَبا سَکّی و سۆریانَ کپیت یا آزارے رسیتی، هما دمانا چه راها ٹَگلیت و کپیت. 22آ تُهم که چِرِکّ و ڈَنگرانی تها رِتکنت، هما مردمئے مِسال اِنت که هُدائے هبرا اِشکُنت، بله دنیایی پرێشانی و مال و زَرّئے دِلکَشّی و پرێب آییا رَدَ دئینت و نئیلنت که هُدائے هبر بسَبزیت و بَر و سَمر بدنت. 23بله آ تُهم که شَرّێن زمینا رِتکنت، هما مردمئے مِسال اِنت که هُدائے هبرا گۆشَ داریت و سرپدَ بیت و بَر و سمرَ دنت، بازێنے سَد سری، بازێنے شست سری و بازێنے سی سری.“

زَهریچکئے مِسال

24ایسّایا آیانا دگه مِسالے دات. گوَشتی: ”آسمانی بادشاهی، هما مردمئے پئیما اِنت که وتی ڈگارا شَرّێن تُهمی کِشتگ‌اَت، 25بله وهدے مردم واب اَتنت، دژمنے آتک و گندمانی تها زَهریچکئے#13‏:25 زَهریچک یکّ کاهے که زَهری مان. تُهمی رێتک و شت. 26وهدے گندم رُستنت و هۆشگِش آورت، زَهریچک هم رُست و مزن بوتنت. 27نون نئوکر آتکنت و گۆن وتی واجها گوَشتِش: ’او واجه! تئو وتی ڈگارا شَرّێن تُهم نکِشتگ‌اَت؟ گڑا اے زَهریچک چه کجا آتکنت؟‘ 28گوَشتی: ’دژمنێا اے کار کرتگ.‘ نئوکران جُست کرت: ’تئو لۆٹئے که ما برئوێن و آیان بگوَجێن؟‘ 29پَسّئوی دات: ’نه، چۆ مبیت که زَهریچکانی گوَجگئے وهدا شما گندمان هم بگْوجێت. 30تان رُنَگئے وهدا بِلّی هۆریگا رُدنت، رُنَگئے وهدا گۆن رُنۆکانَ گوَشان: ”پێسرا زَهریچکان بگْوَجێت و په سۆچگا گْرامبَند بکنێت، رَندا گندمان بیارێت و منی اَمبارا اێر کنێت.“‘“

کَسترێن تُهمئے مِسال

(مَرکاس 4‏:30‏–32؛ لوکا 13‏:18‏–19)

31ایسّایا آیانا دگه مِسالے دات. گوَشتی: ”آسمانی بادشاهی، ٹێلکاهئے تُهمئے ڈئولا اِنت که کَسێا زرت و وتی ڈگارا کِشت. 32چۆناها آییئے تُهم چه اے دگه تُهمان کَستر اِنت، بله وهدے رُدیت، چه اے دگه سبزگان#13‏:32 سبزگ، بزان کاه. بُرزتر، درچکێئے کدّآ بیت و بالی مُرگ آییئے تاک و ٹالانی#13‏:32 ٹال، بزان شاهَڑ، شاهَل. سرا کُدۆهَ بندنت.“

هُمیرئے مِسال

(لوکا 13‏:20‏–21)

33ایسّایا آیانا دگه یکّ مِسالے دات. گوَشتی: ”آسمانی بادشاهی هما هُمیرئے پئیما اِنت که جنێنێا زرت و گۆن بازێن آرتێا#13‏:33 اَسلیگێن یونانی نبشتانکَ گوَشیت: ”سئے ساتا“، بزان 15 کیلووا گێش. هئوار کرت و کمّ کمّا سجّهێن آرت گوات گپت.“

34ایسّایا گۆن مردمانی مُچّیا اے سجّهێن هبر گۆن دَروَر و مِسالان کُرتنت، بے مِسالا گۆن آیان هچّی نگْوَشت. 35اے ڈئولا نبیئے کُرتگێن اے هبر راست و سَرجم بوت:

”من گۆن دَروَر و مِسالان وتی دپا پَچَ کنان و

اَنچێن هبرَ کنان

که چه دنیائے پێدائِشا بگر تان انّون

چێر و اَندێم بوتگ‌اَنت.“ # 13‏:35 زَبور 78‏:2.

زَهریچکئے مِسالئے مانا

36نون ایسّایا مردم رُکست کرتنت و لۆگئے تها شت. اۆدا مُرید آییئے گوَرا آتکنت و گوَشتِش: ”مارا ڈگارئے زَهریچکئے مِسالئے مانایا سرپد کن.“ 37گوَشتی: ”هما که شَرّێن تُهمَ کِشیت، انسانئے چُکّ اِنت. 38ڈگار دنیا اِنت. شَرّێن تُهم آسمانی بادشاهیئے چُکّ اَنت و زَهریچکئے تُهم شئیتانئے چُکّ اَنت. 39هما دژمن که زَهریچکئے تُهمی ڈگارا رێتکنت، شئیتان اِنت. کِشارئے رۆنئے وهد آهِرتئے رۆچ اِنت و کِشارئے رُنۆک#13‏:39 رُنۆک، بزان هما که کشارا بُرّیت و مُچَّ کنت. پرێشتگ اَنت. 40اَنچُش که زَهریچک مُچّ کنگ و آسا سۆچگَ بنت، آهِرتئے رۆچا هم همے ڈئولا بیت. 41انسانئے چُکّ وتی پرێشتگان راهَ دنت تانکه سجّهێن رَدکاران و همایان که دگران دێم په گُناها برنت، یکجاه بکننت و چه آییئے بادشاهیا در بکننت. 42آیان آسئے کورَها#13‏:42 کورَه، مزنێن چُلّے که اۆدا آسئے تها کونزگ، مَٹّ و دگه چیزَّ پچنت. دئورَ دئینت که اۆدا گِرێوگ و پریات و زاریَ بیت. 43آ وهدا پهرێزکار وتی پتئے بادشاهیا رۆچئے پئیما دْرپشنت.#13‏:43 دْرپشگ، بزان شهم جنَگ، جلشکگ. هرکَسا گۆش پِر، بِشکنت.“

آسمانی بادشاهیئے دگه سئے مِسال

44”آسمانی بادشاهی گنجێئے پئیما اِنت که ڈگارێا چێر دئیگ بوتگ‌اَت. وهدے کَسێا در گێتک، گل بوت و پدا چێری دات و شت و هرچے که آییا هست‌اَت، بهایی کرتنت و هما ڈگاری په بها زُرت.

45همے ڈئولا، آسمانی بادشاهی سئوداگرێئے پئیما اِنت که ڈئولدارێن مُرواردانی شۆهازا اَت. 46وهدے آییا گران‌کیمتێن مُرواردے دست کپت، شُت و هرچے که آییا هست‌اَت، بهایی کرتنت و هما مُرواردی گپت.

47همے ڈئولا آسمانی بادشاهی هما دام و ماهۆرئے ڈئولا اِنت که گوَرما دئورِش دات و داما هر پئیمێن ماهیگ گپت. 48وهدے دام چه ماهیگا پُرّ بوت، چه گوَرما درِش کرت. پدا نِشتنت و شَرّێن ماهیگِش در چتنت و سَپْتان#13‏:48 سَپْت، بزان سَبَد، مزنێن چَلّی، ساچی. کرتنت و هرابێنِش دئور داتنت. 49آهِرتئے رۆچا هم اَنچُشَ بیت. پرێشتگَ کاینت و بدکاران چه پهرێزکاران جتا کننت. 50بدکاران آسئے کورَها دئورَ دئینت که اۆدا گِرێوگ و پریات و زاریَ بیت. 51شما اے سجّهێن هبران سرپد بوتێت؟“ آیان پَسّئو دات: ”جی هئو.“ 52گۆن آیان گوَشتی: ”پمێشکا شَریَتئے هر زانۆگر که آسمانی بادشاهیئے مُریدے بیت، هما لۆگ‌واهُندئے ڈئولا اِنت که چه وتی گنج و هَزانگا هر پئیمێن نۆک و کوَهنێن چیزَّ کشّیت و کاریت.“

ایسّا پدا ناسِرَها پِرَ ترّیت

(مَرکاس 6‏:1‏–6؛ لوکا 4‏:16‏–30)

53وهدے ایسّایا اے مِسال هلاس کرتنت، چه اۆدا در کپت. 54وتی جِندئے شهرا آتک و اۆدئے کَنیسَها مردمان تالیم دئیگا لگّت. مردمان په هئیرانی گوَشت: ”اِشیا اے دانایی و مۆجزه کنگئے واک و توان چه کجا رَستگ؟“ 55اے هما دارتراشئے چُکّ نه‌اِنت؟ اِشیئے مات مَریَم اِنت و برات آکوب و ایسُّپ و شَمون و یَهودا اَنت. 56اِشیئے سجّهێن گهار همِدا مئے کِرّا جَهمنند اَنت. گڑا اے سجّهێن چیزّی چه کجا آورتگ‌اَنت؟ 57مردم ایسائے سرا نئوَشّ بوتنت. ایسّایا گوَشت: ”نبیا هر جاگه اِزّتَ رسیت، بله وتی مێتگ و لۆگا اِزّتیَ نرسیت.“ 58گڑا آیانی بێباوریئے سئوَبا اۆدا بازێن مۆجزهے پێشی نداشت.

Sélection en cours:

مَتّا 13: HPKB

Surbrillance

Copier

Comparer