دانیال 10
10
کئورئے کَشئے شُبێن
1پارسئے بادشاه کورشئے دئورئے سئیمی سالا دانیالا، که بِلْتِشازَرئے ناما هم زانگَ بوت، اِلهام رسِت. اِلهامئے پئیگام راست اَت و بلاهێن جنگێئے بارئوا اَت. اے پئیگامئے مانا آییا شُبێنێئے تها رست.
2آ رۆچان، منِ دانیال تان پورهێن سئے هپتگا پُرسیگ اَتان. 3من هچّ وشّێن وراکَ نئوارت. گۆشت و شراب دپ پِرَ نکرت، رۆگن پِرَ نمُشت تانکه اے سئیێن هپتگ گوَستنت. 4ائولی ماهئے بیست و چارمی رۆچا وهدے من مزنێن کئور، دِجلَهئے لمبا اَتان، 5من وتی چمّ چست کرتنت، تَه دیست مردے لیلُمێن#10:5 لیلُم، گُدئے تَهرے که اِنگرێزیا ”linen“ گوَشگَ بیت. گُدی گوَرا و لانکا چه اوپازی#10:5 اوپاز، جاگهئے نامے. تلاها اَڈّ کرتگێن کمربندے بستگی. 6آییئے بدن پوره تلاهرنگێن آکوتے اَت و دێمی چۆ گِرۆکا شَهم دئیگا اَت. چمّی گوَشئے رۆکێن مَشَل اَتنت. دست و پادی مُشتگێن بْرنجئے ڈئولا دْرپشگا اَتنت و تئواری چۆ مردمانی مزنێن رُمبێئے تئوارا اَت.
7تهنا منِ دانیالا اے شُبێن دیست، منی همراهان ندیست، بله بلاهێن ترسے آیانی جانا کپت و په وتی چێر دئیگا تتکنت. 8گڑا من تهنا بوتان و اے مزنێن شُبێنا چارگا اَتان، منی واک و توان هلاس بوت، منی دێمئے رنگ زرد ترِّت و منی تها هچّ واک و توانے پَشت نکپت. 9نون من آییئے تئوار اِشکت و اَنچۆ که من اے تئوار اِشکت، دێم په چێر وَپت و سکّ واب کَپتان. 10پدا دستێا منا دست جت، چستی کرت و منا لرزۆکێن دست و کۆنڈانی سرا اۆشتارێنتی. 11منا گوَشتی: ”او دانیال! او شَرَپمندێن مرد! هرچے که گوَشان، منی هبرا سرپد بئے. پاد آ، چێا که من نون په تئو دێم دئیگ بوتگان.“ وهدے آییا اے هبر کرتنت، من لرزانا پاد آتکان.
دانیالا مدتَ رسیت
12پدا مردا منا گوَشت: ”متُرس، دانیال! هما ائولی رۆچا که تئو وتی دل په سرپد بئیگ و وتی هُدائے درگاها بێکِبر بئیگا داتگ، تئیی دْوا گۆش دارگ بوتگ و من تئیی هبرانی سئوبا آتکگان. 13بله پارسئے بادشاهیئے شهزادگا تان بیست و یکّ رۆچا منی دێم داشت. بله رَندا، میکاییل که چه مسترێن پرێشتگان#10:13 اسلیگێن اِبرانی نبشتانکَ گوَشیت: شهزادگ. یکّے، منی کُمَکّا آتک چێا که من اۆدا پارسئے بادشاهانی کِرّا گَٹِّتگاَتان. 14نون من تئیی سرپد کنگا آتکگان که گۆن تئیی کئوما دێمترا چے بیت، چێا که شُبێن آیۆکێن وهدئے بارئوا اِنت.“
15وهدے آ گۆن من اے هبران کنگا اَت، من وتی سر جَهل کرت و هچّ گوَشت نکرت. 16پوره انسانئے ڈئولێنێا منی لُنٹ دست پِر کرتنت. گڑا من وتی دپ پَچ کرت و گۆن هماییا که منی دێما اۆشتاتگاَت، هبر کنگا لگِّتان. گوَشتُن: ”او منی واجه! اے شُبێنا منا سکّ پَدَرد کرتگ و هچّ زۆر و واکُن نێست. 17من، تئیی هِزمتکار، چۆن گۆن تئو هبر کرتَ کنان، منی واجه؟ منی واک و توان شُتگ و په زۆرے دَم کشّگا آن.“
18هما که انسانێئے ڈئولا اَت، منا پدا دستی جت و زۆرمندی کرت. 19گوَشتی: ”متُرس، شَرَپمندێن مرد! اێمن باتئے. ڈَڈّ بئے. مُهکم بئے.“ اَنچۆ که آ گۆن من هبر کنگا اَت، من ڈڈتر بوتان و گوَشت: ”منی واجه! گۆن من هبر کن، چێا که تئو منا زۆر بَکشاتگ.“ 20گڑا گوَشتی: ”تئو زانئے من چێا تئیی کرّا آتکگان؟ من زوتّ پِرَ تَرّان که گۆن پارسئے شهزادگا جنْگ بکنان و وهدے منَ رئوان، یونانئے شهزادگَ کئیت. 21بله ائولا ترا گوَشان که راستیئے کتابا چے نبشته اِنت. شمئے شهزادگ میکاییلا ابێد، دگه کسّ نێست که اِشانی دێما منا زۆرمند بکنت.
Sélection en cours:
دانیال 10: HPKB
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2016-22 Wycliffe Bible Translators, Inc.