Versets bibliques populaires de Maraco 13

Partager

Occa madirra tiquerrenarrarorrinepe madirra bazima tiadeniza nacasseraqquiri nauitoui. Naraha tiadenipe dacoco tirrirarri! Narraro uadie tinauanemana-zanapozape tirriqueraha ticassiuaueranitoui. Timadimanaccaza zama rricani bacco tiqueneza naqui ticassiuaueranitoui −naui nade Zeso.

—Nema nezape tetideni uatonissa tarri. Occaronapomaniuarrinecca uada ssamoqquiri tiqueneraha otoui tinarroremanehe timadimanarri.

Nazapa taminedeniuarri tiadeni touaqquezima-baqquimanazapa pouadeniza ticcadeni uima tecomeremananiuarrinepe nerrecoma onapazerre? tiquenerrerana. Ticappinemana terrerana, onarraro. Taminedeniza uima uatide nauatoqquiri tiquenaniuarrine Deo Poua Corimena tiadeni acco tocanabaqquiuitoui. Deo Corimerrine tiadeniza uima auato tezape narraro uimara uati tiquenarri. Uati tiquenezape tettideniraha Deo Corimerrinena uati tiquenarraro.

Meme, nami naqui rricarizanissa tanitoui. Naraha ouattipe rriquerreranitoui. Arri uati uati onarrarope narrarossa nanitoui −naui nade Zeso.

—Occaronapomanicca uada, marri naco madirra bazima ssamoqquiri naui. Deocca zozosse tabaqqui memeuarricca naco ssamoqquiri naui. Deo Bedi oua naqui narraro uima ssamo onani. Naraha Abi Deo Pouana nauato taui orrariui −naui nade.

Uima onihi naqui: “Rrazire torrarizani” timittemananitoui. Naraha ticappinemana terrerana. Rrazirepe peperri torraponitoui. Naraha zamape rriquerreraccanitoui.

Oza cacauadedeni bazimapa rrinede ccaniuicca uada ssamoqquiri nazapa narroremanaha madimanarrari. “Marri toccaza ccaniuitide, zome nocconi nitide, tacara uaua naza uitide, ssiuarreza nitide” quenarrari. Tiadeni naqui occaronapomanicca uadatoui tinarroremanehe timadimanarri, onarraro. Arrana, rridacca oza cacauadedeni rrinedetoui narroremana-rrarazapa naza cauadirraza bacco naninarra. Tiadeni naqui oua occaronapomezape tinarroremane-rreraza bacco onanirana. Nezape tiadeniza ouattipe arrima onarraro: Occaronapomanicca uadatoui tinarroremanehe timadimanarri. Madirra bazima naco nama quenana, onarraro −naui nade Zeso.

Nazama madirra zama onihicca, zama onihicca tezerre rrazire inanemana-rizanitoui. Tamine ouahacca madirra, tamine ouahacca madirra tezerre cauadire-rizerauitoui. Nami zarotarizani naqui torrarizanitoui. Pemi naqui carririzanitoui. Narraro ocasserehe taide torraporaha denima ocasserehe torrazanaponitoui −naui nade.

Zama rriquerreraccazama otauimari madirra tocassiuauerauiuarrinecca zama bazimaza ecomerarize-manaccanitoui.

Niza madirra uapi taha pouama oua oniza maizemanazapa: “Ouape Cristo-Mesia orrani” quequenanauitoui. Nazapa madirra uapi taha icamaizabaqqui-manauitoui.

—Parri, tetideni uatomanarri! Madirra uadiqquiri narrari carririzaui. Narraridenipa tiadeni tadamemanazapa zodeodenicca taminedeniuarri ticcadeni uima mittemanauiuarrine tiadeni touaqquezimabaqqui-manauitoui. Zodeodenicca Deo Atti mamariuarri naqui tiadeni itauaqquemananitoui. Otauimari tiadeniza torrarraro acconi uadimanaza zama cacauadedeni baccodeniza tidomo uaniuarrine tiadeni touaqquezimabaqqui-manauitoui. Zama onihicca zama onihicca madirra tamine deni toquerrenarrari baccodeniuarri naqui tidomo uaniuarrine tiadeni touaqquezimabaqqui-manauitoui. Nanizana ticcadeni uima tecomeremanezape taminedenipa otauimari mittemanauiuarrine.

Madirra mamaizadedeni naco tiadeniza rrauirronauitoui. Pouadenipa: “Ouape Cristo-Mesia orrani” quenauitoui. Ouahadeni naco: “Ouape Deocca zossenirri orrani, Poua Atti ouacomeraniuarrine” quenaraha maizemanarrari. Pouadeni bodipa: “Deo icatterriza-baqquirrarideni icamaizabaqquina” quenaza poccadeni maizehe canauatorimana canarizauitoui. Madirra pouadeniza: “Parrissa Deocca zossenirri” quenauiuarrine touini quenaraha Deo Poua icatterriza-baqquirrarideni motapa pouadeniza parrissa quena-rrarauitoui.

Zesopa uima denima uati uati tarrari: —Naraha ocasserehe inauanemanani nattinipe marri ouiuitoui. Abazico naco ouiui toui. Memecca amouadeni naco catorrauitoui. Rridapanapa memecca bazima dacoraqquiri naccaui naraha zotodepa meme zaroro nezape rrenene canauitoui.