Matye 19
19
Zyezu tamani ceyaʔari kéele na
(Mar 10:1-12)
1A Zyezu ga syɛ́ɛnri bee joo n kwɔ́ɔ, a wi yiri Galile tári ni n kári Zyude tári màʔama na, Zyuridɛnw jelige na. 2A syɛɛnnɛʔɛmɛ taʔa wi na, a wi sáà be pɔʔɔ.
3A Farisibèle nùuni wi na bi wi nyɔ́ɔgi pye wéle níì wi pye: «A gi yɛlɛ lé nàɔn í wi cɔɔ̀ yaʔa keelaa faala na?» 4#Sél 1:27; 5:2 A wi be yari: «Yele ga kɔ́ɔ̀ gi nyaa sɛ́bɛw ni ì, àmɛɛ pe Faanfɔw be faan lè ki sélimi na nàɔn ní cɔlɔɔ ì?» 5#Sél 2:24 Ní wɔ́ɔ̀ jo: « ‹Koro na nàɔn n yɛlɛ wi wi tóow ní wi nɔ́ɔw yaʔa si tan wi céw na. Pe siinw a pye cere nibin.› 6Koro na pe ní o nyɛ siin í, fwɔɔ cere nibin. Gee si Kolocɔlɔɔ kpéʔele a gi bɛ̀ɛ lè, ki ga yɛlɛ syɔɔn í gi láʔa kiyɛɛ na í.»
7 #
Làlw 24:1-4; Mat 5:31 A be wi yari: «Nyàʔá na si Mowizi da jo, syɔɔn n yɛlɛ wi ceyaʔa-sɛ́bɛ kaan céw ma si wi yaʔa?» 8A wi be pye: «Yele fungbanyi kéele na Mowizi da fɔ̀lɔ yele í da yele cébèle yaari, kàjáa nlaa ki sélimi na, ki da pye ànbée í. 9#Mat 5:32; 1Kor 7:10-11 Mii si a gi joo yele ma si jo, wàa ga wi cɔɔ̀ yaʔa, kapye kanɔnʔɔrɔ kéele na ban í, ní sáà wàa nikwɔɔ pɔri, wee bee n ceyuugo kpéʔele.»
10A wi pìitamabèle wi pye: «Ki ga pye ànbée nàɔn ma wi céw kàbaan na, nyùngo o nyɛ cèpɔrigi kpéʔelele na í.» 11A wi be pye: «Pe myɛ a gbǎn syɛ́ɛnri naa cò í, fwɔɔ bele má Kolocɔlɔɔ fànʔa kaan lè pe gbǎn di cò. 12Níì cán nìgbɛɛnbèle pèle i yaà, a be be see kánmi bee na, nànjaliya. Nìgbɛɛnbèle pèle si wɔ́ɔ i yaà, a syɛ́ɛnbèle be kàriga nìgbɛɛnbēle, nìgbɛɛnbèle pèle si ní wɔ́ɔ i yaà n peyɛɛ bye nìgbɛɛnbēle nyɛ̀ʔɛni fànʔa kéele na. Wee wi a gbǎn syɛ́ɛnri naa cò lè, ki n yɛlɛ wi di cò.»
Zyezu n dùbaw kpéʔele pìíbèle pèle ma
(Mar 10:13-16; Luk 18:15-17)
13Lǎli bee ni a pèle pan ní pìíbèle pèle ní Zyezu ma, jàngó wi ba kɔ́yi taʔa be na si nyɛ́ɛri be kéeli na. Kàjáa a wi pìitamabèle fúlo be na. 14A Zyezu be pye: «Ye pìíbèle yaʔa paa maa mii ma, ki ga yɛlɛ ye be lúrugo í. Níì cán nyɛ̀ʔɛni fànʔa i nyɛ pèle wóʔo, bele be nyɛ àmɛɛ pìíbèle naa nyɛ lè.» 15A wi ga wi kɔ́yi taʔa be na n kwɔ́ɔ, a wi núngo nɛɛ bee.
Lɔrɔfɔ-nǎnw kéele
(Mar 10:17-31; Luk 18:18-30)
16Koro kàdoʔo ma a nànwaa nùuni wi na n baa wi pye: «Tamafɔw, nyàʔá kacàn-vélile mii yɛlɛ mii í kpéʔele, koro ga pye mii í sìibangwɔɔw taa?» 17A wi wi yari: «Nyàʔá na mɔ mii yíbe kacànna kéele na? Wàa nibin wi nyɛ wojanw. Kàjáa mɔ ga ni caa bi jée sìíw ni, ki n yɛlɛ mɔ í tundunri cò.» 18#Yir 20:13-16; Làlw 5:17-20 A wi wi pye: «Dìí dii toro?»
A Zyezu wi yari:
«Mɔ a kɔ́ syɔɔn kpóo í.
Mɔ a kɔ́ kanɔnʔɔrɔ kpéʔele í.
Mɔ a kɔ́ yùu í.
Mɔ a kɔ́ jànvaa séera kpéʔele í.
19 #
Yir 20:12; Làlw 5:16; Lev 19:18 Máā mɔ tóow ní mɔ nɔ́ɔw kpɔ̀ʔɔrɔ́.
Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.»
20A nǎnw wi yari: «Mii maa téè tundunri bee myɛ cò. Keelìí si li níì kòro mii ma?» 21A Zyezu wi pye: «Mɔ ga ni caa bi pye syɛɛnsindeleo, maa syée mi sa mɔ kɔ́lɔ yáriri myɛ pára mi kaan foomɔfɔbèle ma, máā maa mi ba taʔa mii na, lɔrɔ saʔa a pye mɔ ma nyɛ̀ʔɛni na.» 22A nǎnw ga syɛ́ɛnri bee lóʔo, a wi lúru n kári funbɛɛnrɛ na, ncan wi kɔlɔ̀ yáriri maa nɛʔɛ.
23A Zyezu gi joo wi pìitamabèle ma níì jo: «Mii a gi joo yele ma kányɛʔɛ ni lɔrɔfɔlɔ jéeganmi n tɔ̀nɔ n gbàn nyɛ̀ʔɛni fànʔa ni. 24Mii a ní gi joo yele ma si yele pye, fàlibaʔa jéevorolo n wɛ́ʔɛri sàriweele ni lɔrɔfɔlɔ jéeganmi na Kolocɔlɔɔ fǎngi ni.» 25A pìitamabèle ga gee bee lóʔo a be i káama gi na gbanʔama níì jo: «Wìí si wi a gbǎn syɔɔ?» 26A Zyezu i be wéle ní kɔ́ɔ̀ be pye: «Gee bee a gbǎn kpéʔele syɔɔn báriga ni í, kàjáa Kolocɔlɔɔ fánʔa i nyɛ kérigèle myɛ na.»
27Lǎli bee ni a Pyɛri gi joo wi ma níì jo: «Wéle, wolo n wolo yáriri myɛ yaʔa níì taʔa mɔ na, nyàʔá si wolo a ba taa?» 28#Mat 25:31; Luk 22:30 A Zyezu be pye: «Mii a gi joo yele ma kányɛʔɛ ni, yele bele ye taʔa mii na lè, Syɔɔn-pya ga baa tɛ́ɛn wi nìjangbɔɔri fàngolo na kúbèle cânnyán-yìrige na, yele a wɔ́ɔ tɛ́ɛn fàngorigèle kèle kɛɛ ní siin na bi Isirayɛli syɛɛnfeleyi kɛɛ ní siin kútii ceri. 29Syɔ́ɔnwee faala si ga wi kpáayi, ní wi senyɛnnǎnbèle, ní wi senyɛnjebèle, ní wi tóow, ní wi nɔ́ɔw, ní wi pìíbèle, ní wi séyi yaʔa lè mii mɛ́ɛgi kéele na, wee bee a di feleye saʔa taa bi fàra sìibangwɔɔw na. 30#Mat 20:16; Luk 13:30 Kàjáa yɛʔɛ̀ ma syɛ́ɛnbèle pèle saʔa a ba pye kàdoʔo ma, kàdoʔo ma wóbèle pèle saʔa si ba pye yɛʔɛ̀ ma.
Tällä hetkellä valittuna:
Matye 19: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.
