Matye 18
18
Wìí wi kpɔ́ʔɔ n sɔ̀lɔ pe myɛ na?
(Mar 9:33-37; Luk 9:46-48)
1 #
Luk 22:24
Lǎli bee ni a pìitamabèle nùuni Zyezu na n baa wi yíbe níì jo: «Wìí wi kpɔ́ʔɔ n sɔ̀lɔ pe myɛ na nyɛ̀ʔɛni fànʔa ni?»
2A wi fala n pìiwaa yeri n baa yérige be níngi ni, 3#Mar 10:15; Luk 18:17 níì be yari: «Mii a gi joo yele ma kányɛʔɛ ni, yele ga pye yele ga kàri n pye àmɛɛ pìíbèle nyɛ lè í, yele a gbǎn jée nyɛ̀ʔɛni fànʔa ni nyáana í. 4Koro na, wee wi ga ni màama kpéʔele àmɛɛ pìíw naa nyɛ lè, wee bee wi kpɔ́ʔɔ n sɔ̀lɔ pe myɛ na nyɛ̀ʔɛni fànʔa ni. 5Syɔ́ɔnwee faala wi ga pìíw naa wàa láa mii mɛ́ɛgi na lè, mii tiimaa wi láa.
Kapeeli gbànganma kéele
(Mar 9:42-48; Luk 17:1-2)
6«Kàjáa pìipiigèle ge tága mii na lè, syɔ́ɔnwee faala wi ga lee bee làa nibin kaan a li lúru kàdoʔo ma lè, syɔ́ɔnw bee n yɛlɛ pe tírekpɔʔɔ pwɔɔ wi yátiigi ni pé wi wáa sólomi lòkpɔʔɔ tɛɛcùrugo ni. 7Wɔʔɔli a pye dulunyanw ni kérigèle báriga ni ge syɛ́ɛnbèle pùuní lè! Níì cán fwɔɔ kérigèle kèle í pye beè, gele ke a ra syɛ́ɛnbèle pùuní lè. Kàjáa wɔʔɔli a pye syɔ́ɔnw bee na wee báriga ni syɛ́ɛnbèle a pùuni lè.
8 #
Mat 5:30
Mɔ kɔ́gi ga ni mɔ légi kapeegèle ni, wàlá mɔ tɔ́lɔgi, mi gi ceri mi wáa. Mɔ ga jée sìíw ni ní kɔjerigi ní, wàlá ní tɔjerigi ní, koro a pɔ́rɔ mɔ ma sáni lè mɔ í kòro ní mɔ kɔ́yi siin ní, wàlá ní tɔ́lɔyi siin ní, pe sa mɔ wáa bànvigi náagi ni. 9#Mat 5:29 Mɔ nyapili ga ni mɔ légi kapeegèle ni, mi li lòʔori mi wáa. Mɔ ga jée sìíw ni ní nyapile nibin ní, koro a pɔ́rɔ mɔ ma sáni lè nyapiigèlē siin í pye mɔ na pé sa mɔ wáa tɛɛwɔʔɔgi ni, beè náagi nyɛ lè.
Bàpuuniw kàseele, ní wi nyaani
(Luk 15:3-7)
10«Yaa kɔ̀rɔsíi, yele a kɔ́ pìipiigèle naa làa nibin faʔa í, níì cán mii a gi joo yele ma kányɛʔɛ ni, pe nyɛ̀ʔɛni tundunbéle i yaà ni mii Tóow yɛ́ʔɛ nyaagi làla o làla, wi lè nyɛ̀ʔɛni na. [ 11#Luk 19:10 Níì cán wee wi pùuni lè, Syɔɔn-pya n pan ba wi syɔɔ.]
12Nyàʔá yele sɔ̀ngí? Bàala dabata ga pye syɔɔnwaa ma, á wàa nibin pùuni, wi a bele dabata nibin fɔ̀n yaʔa nyanbelegi na si sa wobuuniw caa ì? 13Wi ga sáà wi caa n nyaa, mii a gi joo yele ma kányɛʔɛ ni, wi a ra fundaanra kpéʔele wee bee kéele na bi sɔ̀lɔ bele togoye sicɛrɛ ní kpɔrigɔ ní kpanjɛrɛ kéele na, bele be nyɛ lè pe ga pùuni í. 14Anbée si gi wɔ́ɔ̄ nyɛ yele Tóow ma wi lè nyɛ̀ʔɛni na, wi o caa pìipiigèle naa làa nibin í pùuni í.
Senyɛnwaa ga kapeele pye
15 #
Luk 17:3
«Mɔ senyɛnnɛ ga kapeele kpéʔele mɔ na, mi kári mi sa joo ní wi ní yele yagwɔɔlɔ. Wi ga mɔ wóri lóʔo, mɔ n mɔ ní mɔ senyɛnw bɛ̀ɛ. 16#Làlw 19:15 Kàjáa wi ga pye wi ga sáà yére di ni í, mi ní mi sa wàa láa, a be i nyɛ siin yoo, jàngó ‹séerafɔbèle siin, wàlá taanri í syɛ́ɛnri myɛ fílige.› 17Wi ga sáà poro wóri cée, mi sa gi joo Egiliziw ma. Wi ga sèʔê Egiliziw wóro cée, mi wi córo syɛɛnfelegaa ní wálisyɔɔɔ.
Bi gi pwɔɔ, ní bi gi sánʔa
18 #
Mat 16:19; Zyan 20:23 «Mii a gi joo yele ma kányɛʔɛ ni, yele ga yárigee faala pwɔɔ lè tári na, ki n wɔ́ɔ̀ pwɔɔ nyɛ̀ʔɛni na, yele si ga wɔ́ɔ̀ yárigee faala sánʔa lè tári na, ki n wɔ́ɔ̀ sánʔa nyɛ̀ʔɛni na.
19Mii a ní gi joo yele ma kányɛʔɛ ni, syɛ̀ɛnnɛ siin ga wɔ́ɔ yariga o yariga na tári na yele níngi ni, níì gi nyɛ́ɛri mii Tóow ma wi lè nyɛ̀ʔɛni na, wi a gi kaan be ma. 20Níì cán syɛ̀ɛnnɛ siin, wàlá syɛ̀ɛnnɛ taanri ga peyɛɛ gbóʔoro tɛ́ɛgee ni lè mii mɛ́ɛgi na, mii i nyɛ be níngi ni.»
Falipyew wi kùsulugi syɔɔlɔ cée lè woro kàseeli
21 #
Luk 17:3-4
Lǎli bee ni a Pyɛri nùuni Zyezu na n baa wi yíbe níì jo: «Kàfɔw, mii senyɛnwaa ga kòro ni kapeegèle kpéʔele mii na, tɔlɔyɔ jòorí mii yɛlɛ mii í wi kùsulugi syɔɔ? Tɔlɔyɔ kɔrɔsiin lé láà?» 22A Zyezu wi yari: «Mii ga jo tɔlɔyɔ kɔrɔsiin í, fwɔɔ maa gi kpéʔele bi taa ba nan tɔlɔyɔ togoye taanri ní kpɔrigɔ tɛɛyɛ kɔrɔsiin na. 23Koro na nyɛ̀ʔɛni fànʔa i nyɛ àmɛɛ fànʔafɔwaa nyɛ lè, wee wi da ni caa bi wi fwɔ́ɔgèle jáari wi falipyebèle na lè. 24Lǎli ni wi gi séli lè, a be pan ní wàa ní wi ma, wee na wi sirakamayɛ sirakama fwɔ́ɔlɔ da pye lè. 25Yafyɛn si da pye wi ma bi fwɔ́ɔli bee tɔ́n í. A wi kàfɔw be pye be sa wi pára ní wi céw, ní wi pìíbèle, ní wi kɔlɔ̀ yáriri myɛ ní jàngó woro fwɔ́ɔli í tɔ́n. 26A falipyew tìgi n kpùmɔnɔ wi taana níì wi nyɛ́ɛri níì jo: ‹Mi mii kpàraco, mii a mɔ fwɔ́ɔli myɛ tɔ́n.› 27A falipyew bee nyínimɛ wi taa, a wi wi yaʔa ní wɔ́ɔ̀ fwɔ́ɔli bee yaʔa wi ma.
28A falipyew bee ga yiri ni syée, a wi sáà fàra ní wi falipyenyɛnwaa ní, wee na woro fwɔ́ɔlɔ nyɛ lè selebinnɛ. A wi wi cò níì wi còri yákpoli ni níì jo: ‹Mi mii fwɔ́ɔli tɔ́n.› 29A wi falipyenyɛnw tìgi n kpùmɔnɔ wi taana níì wi nyɛ́ɛri níì jo: ‹Mi mii kpàraco, mii a mɔ fwɔ́ɔli tɔ́n.› 30Kàjáa wi ga fɔ̀lɔ í, níì wi cò n sáà le kàsow ni fwɔɔ bi taa wi woro fwɔ́ɔli tɔ́n. 31A wi falipyenyɛnbèle ga gi nyaa gee wi kpéʔele lè, a gi i be yáa gbanʔama, a be pan n baa gi joo be kàfɔw ma gee myɛ wi kpéʔele lè. 32Lǎli bee ni a wi kàfɔw wi yeri ní baa wi pye: ‹Mɔ i nyɛ falipyepeeo, ncan mɔ maa mii nyɛ́ɛri, a mii mɔ fwɔ́ɔli myɛ yaʔa mɔ ma. 33Ki da wɔ́ɔ̀ yɛlɛ mɔ í nyinimɛ taa mɔ falipyenyɛnw na, àmɛɛ mii nyinimɛ taa mɔ na lè ì?› 34A wi kàfɔw wi cò fundanʔara na n sáà le kàsow ni, jàngó paa wi wɔʔɔ bi taa wi woro fwɔ́ɔli myɛ tɔ́n.
35Yele myɛ nibin nibin ga pye yele o yele senyɛnbèle kapeegéle kusulugo syoo ní fundaanra ní í, ànbée mii Tóow a wɔ́ɔ gi kpéʔele yele na wi lè nyɛ̀ʔɛni na.»
Tällä hetkellä valittuna:
Matye 18: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.
