Zyonasi 3
3
Zyonasi n sa ni nyuu Niniivi ni
1A Yawe syɛ́ɛnri nan Zyonasi na tɔziin, wi n jo: 2«Yìri maa syée Niniivi ma, ki lè kèkpɔɔgi, mi sa syɛ́ɛnri joo yaà, dee mii joo mɔ ma lè.»
3A Zyonasi yìri n kári Niniivi ma n yɛlɛ ní Yawe syɛ́ɛnri ní. Niniivi si maa pye Kolocɔlɔɔ yɛ́ʔɛ ma kèkpɔʔɔ. Canya taanri tánʔana li da ni gi forogi. 4#Mat 12:41; Luk 11:32 A Zyonasi sáà jée kěgi ni níì canʔa nibin tánʔana kpéʔele gi ni, ní i yákpoli wáa ni gi nyuu níì jo: «Canya togoye siin níjanʔa kàdoʔo ma, Niniivi a kálagi.» 5A Niniivi syɛ́ɛnbèle tága Kolocɔlɔɔ na. A be súnlere kéele jáari, níì gɔ̀nvaʔaya le búroyo n séli yaà wogbolobèle na n baa nan wobiigèle na. 6A syɛ́ɛnri bee sáà nan Niniivi fànʔafɔw na. A wi yìri wi fàngoli na n wi burogbɔɔgi wòlo, níì gɔ̀nvaʔaga tɔ́n wiyɛɛ na n tɛ́ɛn cɔ́ɔngi ni. 7A wi gi yaʔa a be yákpoli wáa n kéeli naa jáari Niniivi ni níì jo: «N yɛlɛ ní fànʔafɔw, ní wi syɛɛnkpolobèle kajoo-mí-cerile ní:
Ki ga yɛlɛ syɛ́ɛnbèle,
ní yaweeri, ti lè wogbolori,
ní woyiliri í kɔ́ yarigaa faala laala wéle í.
Pe a kɔ́ lìi í.
Pe a kɔ́ lɔ̀ʔɔ gbaa í!
8Gɔ̀nvaʔaya n yɛlɛ yi tɔ́n syɛ́ɛnbèle,
ní yaweeri na,
páā yákpogèle wáa ní fànʔa ní Kolocɔlɔɔ kurugo,
syɔɔn o syɔɔn si láʔa wi tánʔaganbeemi,
ní wi péemi kapyere na,
dee wi tiimaa kɔ́yi kpéʔele lè.
9 #
Zyow 2:14
Wìí wi gi cán kapye Kolocɔlɔɔ a wiyɛɛ fúngi kàriga í,
kapye wi a wi fúngi kàriga bi wi fundanʔagbɔɔri yaʔa í,
koro ga pye wolo a kɔ́ kùu í?»
10A Kolocɔlɔɔ ga gi nyaa, gee pe da ni kpéʔele lè bi kàdoʔo wáa be tánʔaganbeemi ma, a Kolocɔlɔɔ wɔ́ɔ̀ kapeegi yaʔa, gee wi da tímana bi pye be na lè, wi ga gi kpéʔele í.
Tällä hetkellä valittuna:
Zyonasi 3: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.