Zyonasi 2
2
Zyonasi nyɛ́ɛrigi kéele
1 #
Mat 12:40
A Yawe gi yaʔa a fákpɔʔɔ Zyonasi jɔ́ɔ. A Zyonasi canya taanri ní yébiliye taanri kwɔ́ɔ fáw láʔa ni. 2N Zyonasi yaʔa fáw láʔa ni, a wi Yawe wi Kolocɔlɔw nyɛ́ɛri. 3Wi n jo:
«N mii yaʔa mii wɔʔɔgi ni
a mii Yawe yeri,
a wi syɔɔ mii ma.
N mii yaʔa kúbèle tɛɛkòrogo ni,
a mii yeri, a mɔ lóʔo mii ma.
4Mɔ maa mii wáa tɛɛcùrugi ni,
sólomi lɔ̀ʔɔ fúngo ni,
lómɛɛngèle maa ni mii máari.
Mɔ lógi kùngurupiigéle ní kùngurukpoloyi myɛ n sɔ̀lɔ
mii ǹjogi ni.
5Mii si maa ni gi nyuu níì jo:
‹Mii n nɛnɛ n yirige mɔ yɛ́ʔɛ ma n tórigo léelige.
Mii si a ní mɔ kpɔʔɔrɔli kpaacanga sámaga wéle.›
6 #
Ŋún 18:5; 69:2 Lǒgi maa mii tɔ́n fwɔɔ n nan yákpoli na,
weecurugi maa kiyɛɛ kpóʔoro n tɔ́n mii na,
lǒgi fúngo nyàā maa mígele mii nyúngi na.
7Mii n tìgi fwɔɔ n sáà nan nyanbeleyi nɔ́yɔ na,
tári gbóʔoroyo maa sɔ̀ʔɔ n wáa mii na bi kòro nya.
Kàjáa mɔ n mii lúrugo n yirige weekpɔɔ-cùrugi ni woweeo ní,
ee Yawe mii Kolocɔlɔw.
8Lǎli ni mii fúngi báriga kwɔ́ɔ mii ni lè,
a mii sɔ̀ngi n taa Yawe na,
a mii nyɛ́ɛrigi kári fwɔɔ n sáà nan mɔ na
fwɔɔ mɔ kpɔʔɔrɔli kpaacanga ni.
9Bele be peyɛɛ daʔa lè
yasunyi na,
yi lè gbanzan yáriri,
pe i funjǎngi léeli peyɛɛ na.
10Mii si na,
mii a ra sáriga wóo mɔ ma
ní bariga kaanna yákpolo ní,
nyɔɔfaliyi mii kpéʔele lè,
mii a yi foro.
Yawe má syɔɔli yìrigí.»
11A Yawe gi joo n gbàn fáw ma, a wi Zyonasi tùgu n cáan táfàaw na.
Tällä hetkellä valittuna:
Zyonasi 2: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.