SASĚBANG 3
3
Duata e kimui si Musa
1Su tempo ene i Musa kai nạung mẹ̌děndiagạ manga domba ringangu manga kambing i Yitro binatang i empone, imang su ěntanang Midian. Piạ i sie kapẹ̌ngẹ̌ngahạ e binatang ene su sěmběkang banua l᷊inggi, nahumpạ e i sie su Wul᷊udu Sinai, wul᷊ude kụ susi. 2#MMR. 7:30-34 Sene malaekatʼu Mawu e nẹ̌tengkal᷊ahẹ̌ u watangenge si sie su ral᷊ungu rěllị u putung kụ sụsěbang bọu tal᷊oarang manga rěmpugẹ̌. I Musa e nakạsilo rěmpugẹ̌ ene rụděllị kaiso tawe nahěngisẹ̌. 3”Makạdal᷊inaụ,” bue su tiněnnane. ”Děmpugẹ̌ ene tawe nahěngisẹ̌! Kụ mạpiangbe takụ kakěllaěng bọu maranine.”
4 Mawu e nakasilo si Musa mạdanin tampạ ene, kụ i Sie něhengetang bọu tal᷊oaran děmpugẹ̌ ene, ”Musa! Musa!”
”Ěndaung ěllangu,” angkuěng i Musa.
5Mase Mawu něhengetang, ”Abe rarani. Luạko sandalẹ̌ u, batụu ěntana rẹ̌darisikangu e kai tampạ susi. 6Iạ ini e kai Ruatang i upungu i Abraham, Ishak, dingangu i Yakub.” Tangu i Musa e něhěmbung gatine, u i sie kai matakụ měmanda Mawu Kasěllahenge.
7Bọu e Mawu něhengetang, ”Iạ e seng nakasilo sigěsạ u umatẹ̌-Ku su Misirẹ̌, kụ seng nakaringihẹ̌ si sire sụsangị u mẹ̌dorong ipakal᷊iwirẹ̌ bọu taumata apang měmpẹ̌tahuěllang i sire. Mamben těngadẹ̌ Iạ e masingkạ u kal᷊awọu sigěsạ i sire. 8Ual᷊ingu ene Iạ tanaẹ měliwirʼi sire wọu l᷊iman tau Misirẹ̌ kụ mẹ̌bawa si sire apasěbang bọu wanua ene mẹ̌timona wanua sěmbaụ kụ mal᷊oahẹ̌. Ěntanane kalạ dingangu matawa, kụ orasẹ̌ ini e pẹ̌tẹ̌tanakengu tau Kanaan, tau Het, Amori, Feris, Hewi ringangu i Yebus. 9Sasangị u tau Israel sen Takụ kinaringihẹ̌, dingangu Takụ kinasilo lai kereapa i sire sẹ̌sigěsakengu tau Misirẹ̌. 10Tangú ini e i kau Takụ irolohẹ̌ ipẹ̌těngon datung Misirẹ̌ tadeạu i kau makaahạ u umatẹ̌-Ku apasěbang bọu wanua ene.”
11Arawe i Musa e nẹ̌bera su Mawu Kasěllahenge, ”Kai i sai tangu iạ ini, hakịu mẹ̌tẹ̌ngon datu mẹ̌bawa tau Israel apasěbang bọu Misirẹ̌ e?”
12Duata e simimbang, ”Iạ e sarung mẹ̌tul᷊ung i kau. Kụ kereu wansa ene e seng niwawanu pinakasěbang bọu Misirẹ̌, i kamene e sarung mẹ̌tahamawu si Siạ su wul᷊ude ini. Ene e kai tatialane u Iạ e něndolohʼi kau.”
13 #
Sas. 6:2-3
I Musa e simimbang, ”Kereu iạ e mẹ̌sombang u taumatang Israel dingangu mẹ̌bera si sire: ’Duatang upung i kamene e dimolohu iạ e sol᷊ong anung kamene,’ i sire nal᷊ahẹ u sarung makiwal᷊o, ’I sai arenge?’ Mase apạ e hinong takụ isimbahẹ̌ si sire?”
14 #
Pěl. 1:4, 8 Angkuěngu Mawu Ruata, ”Iạ e mambeng IẠ ENE. Ini e hinong iweranu su tau Israel, i Sie kụ isẹ̌sẹ̌bạ IẠ ENE,#3:14: IẠ ENE: Daringihang kere werang Ibrani ”Yahweh” kụ nitungkang u wawera ”Mawu”. seng něndolohu iạ apạkakoạ sol᷊ong anung kamene. 15Apakasingkạko l᷊ai si sire u Iạ, Mawu Ruatang i upung i sire, Ruatang Abraham, Ishak, dingangu i Yakub něndolohʼi kau sol᷊ong anun sire. Iạ e kai Mawu, kụ kai ene areng-Ku sarang marěngụ-děngụ. Ene kai sasěbạ si Siạ baugu patikụ bansa bọu hěnto sarang hěnto. 16Dakọ e komol᷊ẹ̌ko patikụ těmbonangu Israel. Apakasingkạko si sire u Iạ e kai Mawu Ruatang i upung i sire, Ruatang Abraham, Ishak dingangu i Yakub seng nẹ̌těngkal᷊ahẹ u watangenge si kamene. Paul᷊ikeko i sire u Iạ seng diměnta su anun sire kụ seng bọu nakasilo kereapa kakakoạ i sire kinahian tau Misirẹ̌. 17Kụ Iạ e němutusẹ̌ u mẹ̌bawa si sire apasěbang bọu Misirẹ̌ tampạ i sire nipẹ̌tahuěllang, dingangu měnonda si sire sol᷊ong banua sěmbaụ kalạ dingangu matawa, banuan tau Kanaan, tau Het, Amori, Feris, Hewi dingangu Yebus.
18Umatẹ̌-Ku e sarung mahimang apan niweranu. Bọu ene i kau e sarung mẹ̌dingangu apan těmbonangu Israel kụ harusẹ̌ tamai mẹ̌těngon datum Misirẹ̌ kụ pẹ̌bera si sie: ’Mawu Ruatang Ibrani e seng diměnta nẹ̌těngkatodẹ si kami. Kụ orasẹ̌ ini e apakawalako i kami reng matamai karaun dal᷊engang gěnnangu těllu ěllo su wanua l᷊inggi tadeạu makapěnarakangu sasěmba su Mawu Ruatang kami.’ ” 19Bọu ene Mawu Ruata saụ něhengetang kạpia, ”Iạ masingkạ u ratung Misirẹ̌ mamben tawe mapakawalang kamene tabeạu katewe i sie sihasang. 20Arawe Iạ e sarung mẹ̌pakẹ u kawasa-Ku, kụ měhukungu tau Misirẹ̌ dingangu kal᷊awọu haghing hombang masaria kụ Takụ iaparěnta paị sene. Bọu ene i sie sarung mapakawalang kamene mẹ̌buạ.
21 #
Sas. 12:35-36
Iạ e sarung mapakariadin naungu tau Misirẹ̌ e napenẹ u karal᷊ondo si kamene, hakịu su tempong umatẹ̌-Ku e měbuạ i kamene e tawe rumal᷊eng u lima matagẹ̌. 22Apạeweng manga wawineng Israel sarung mědorong bọu lampunge tau Misirẹ̌ dingangu wọu manga wawinen tau Misirẹ̌ kụ matanạ su wal᷊e sěmbaụ, pakeange ringangu ral᷊ěgahe sal᷊aka ringangu wul᷊aeng. I kamene sarung mapěluheng ene su manga anạ i kamene: Kụ dingangu kakakoạ e kerene tangu i kamene sarung měmpěhampasẹ̌ tau Misirẹ̌.”
Tällä hetkellä valittuna:
SASĚBANG 3: SXN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään