SASĚBANG 2
2
Kal᷊aiwantelʼi Musa
1Su tempo ene sěngkatau esẹ bọu hěnton Lewi, nẹ̌kawingu sěngkatau wawine wọu pohọ i sire ene lai. 2#MMR. 7:20; Ibr. 11:23 Tangú tau wawine naiwanteleng sěngkatau anạ esẹ. Sarạeng i sie nakasilo u rariọ ene kai mal᷊ěnggi-l᷊ěnggihẹ̌, tangu niwuni rariọ e ghěnangu těllu wul᷊ang karěngụ e. 3Kaiso rariọ ene tawe ikawunin sie riọ marěngụ. Tangú i mamạ u rariọ ene něngal᷊ạ e karanjang sěmbaụ bọu nanaiang kụ nilaburang u terẹ̌ tadeạu kumbahangbe su měga. Kụ dariọ ene nitahọ e su ral᷊ungu hiang ene, wọu e niwawane sol᷊ong Sal᷊ụ u Nil su wěllạ u gahundungu nanaiang su wiwihu sal᷊ụ ene. 4Arawe wawinen dariọ ene ute rụdarisị pai maghea wọu ene tụtatingang měnsang apạ e mariadi su mahuanene.
5Ené narěntạ e sangiangu ratu. I sie riměsungke sol᷊ong sal᷊ụ měndenọ, kutẹu nạung manga sanggele měmpẹ̌dẹ̌daral᷊eng su wiwihu sal᷊ụ. Sangiangu ratu sěngkianụ e nakasilo hiang ene su wěllạu ghahundungu nanaiang bọu e i sie rimolohʼu sěngkatau babụ e wawine niapěngal᷊ạ. 6Ené sangiangu ratu němukạ e hiang ene, kinasilone kai piạ dariọ su ral᷊unge, kụ dariọ ene kạsangị e. Sangiang u ratu e timal᷊ěntụ e si sie kụ nẹ̌bera, ”Ini e kai anạ u tau Ibrani.”
7Mase tuhangu rariọ ene nakiwal᷊ọ e su sangiangu ratu, ”Mapulu i wawụ iạ deng mědeạ sěngkatau marehokang u tau Ibrani kụ deng apasusun dariọ ene?”
8”Kerenẹ e,” sasimbangu sangiangu ratu. Tangu rariọ ene natamai e nẹ̌kui si mamane něngědihẹ̌. 9Angkuěng u sangiang ratu si ninange ene, ”Bawạ e rariọ ini, kụ apasusuko i sie waugu iạ; arawe tau wawine e hědon takụ gěllirangu wawaehẹ̌.” Tangu niwawạ e rariọ kụ niapasusune. 10#MMR. 7:21 Ene rariọ sen diọ gẹ̌guwạ, imamane něnarakang i sie su sangiang u ratu. Bọu ene kahian sangiangu ratu dariọ e nikoạ e anạ niaku. ”I sie takụ isẹ̌ba si Musa,#2:10: Musa: Areng ini raringihang kere werang Ibrani kụ mangal᷊ene ”měmol᷊eng sarang likude”. u kai takụ nilẹ̌ke wọu akẹ,” angkuěngu sangiangu ratu.
I Musa timal᷊ang sol᷊ong Midian
11 #
Ibr. 11:24
#MMR. 7:23-28 Ene i Musa natělangke, i sie nẹ̌těngkatodẹ su kawanuane. I sie nakasilo kakakoạ u i sire sẹ̌sihasaěng pẹ̌kẹ̌koạ hal᷊ẹ̌ mawawěhạ. Kinasilone lai tau Misirẹ̌ sěngkatau němate sěngkatau Ibrani. 12I Musa e mẹ̌pẹ̌panda tamai-ramahi, kutẹu kinasilone tawẹ u sarang sěngkatau nakasilo si sie, ute nịpapatene tau Misirẹ̌ ene bọu e maiete nilěbinge pinakawuni su ral᷊ungu ěnne. 13Sěngkariọěllone i Musa e saụewe natamai, kụ sěngkakěllane piạ i rẹ̌dua tau Ibrani kapẹ̌kẹ̌kakokane. ”Kawe unụe i kau něngoka hapịu?” angkuěng i Musa su tau ěndaị piạ sal᷊ane.
14Sasimbangu tau ěndaị ene, ”I sai něnduị i kau nakoạ pangahạ dingangu měmamutuse pěkarang kami tangu? Arau i kau mapulu měmate lai si siạ, kere tau Misirẹ̌ nipatenu ene?” Tangú i Musa měngkatewe matakụ kụ měngẹ̌ngěnna, ”Silakạ bue! Kakanoạku e seng kinasingkateng.” 15-16#MMR. 7:29; Ibr. 11:27 Sarạeng datu e seng nakaringihẹ̌ hal᷊ẹ̌ ene, i sie tangu mědẹ̌deạ měmate si Musa. Kaiso i Musa e timal᷊ang kụ bọu ene nẹ̌tanạ su wanuang Midian.
Imang bọu Midian isẹ̌sẹ̌bạ si Yitro e piạ anạ e wawine i sire pitu. Piạ sěhěllo, piạ i Musa kụkaiang su rěduhu pahighi, narěntạ e manga anạ i Yitro wawine i sire pitu měmpẹ̌nimbạ akẹ dingangu měmpẹ̌loho pěnganginumangu gopol᷊angu kambing dingangu dombang amang i sire.
17Kaiso pirang katau měndariagạ domba e něnokol᷊ẹ̌ manga rariọ bawine ene. Tangu i Musa e himaung nẹ̌tul᷊ung i sire kụ napěnginung u binatang i sire. 18Piạ i sire napul᷊ẹ e, i amang i sire e nakiwal᷊o, ”Unụe kawe kal᷊ighạ e i kamene napul᷊ẹ sěhěllo ini?”
19Angkuěng i sire, ”Piạ tau Misirẹ̌ sěngkatau nẹ̌tul᷊ung i kami wọu katatingkaị měndal᷊ukadẹ̌ bal᷊ine. I sie kawe nẹ̌tul᷊ung něnimbạ u akẹ baugʼi kami, ringangu napěnginung u binatang i kitẹ.”
20”Suapa i sie ini e?” Kakiwal᷊ong Yitro su manga anạ e. ”Kawe unụe nitěntang i kamene tau ene? Dakọko reake, kụ gause i sie tadeạu kumaěng sěngkakaěng dingang i kitẹ.”
21I Musa e mal᷊uasẹ̌ baugu mẹ̌tanạ sene. Mase i Yitro napẹ̌kawingu anạ e i Zipora ringang i Musa. 22I Zipora namantelʼu anạ e esẹ. Dariọ ene nisěbạ e si Gersom#2:22: Gersom: Areng ini e raringihang kere su werang Ibrani kụ mangal᷊ene ”taumata raghị”. batụu i Musa mạngěnna u, ”Iạ e kai sěngkatau taumata raghị sini.”
23Pira-pira taung samuring ene datung Misirẹ̌ e nairị. Arawe tau Israelẹ̌ e wẹ̌dang kụkakindoạ ual᷊ingu i sire ipẹ̌tẹ̌tahuěllang, hakịu i sire mẹ̌kẹ̌kiạ u makitul᷊ung. Kakiạ i sire nahumpạ u anun Duata. 24#Pěnd. 15:13-14 Duata e rimaringihẹ̌ si sire kụ i Sie nakatahěndung riandinʼE si Abraham, Ishak dingang i Yakub. 25I Sie nakasilo kal᷊awọu taumatang Israel nipẹ̌tahuěllang, kụ i Sie němutusʼu mědeạu mẹ̌tul᷊ung i sire.#2:25: Mẹ̌tul᷊ung i sire: tumuhụ sěmbaụ tungkangu nạung kal᷊imona ute mel᷊ẹ̌habaru watangeng si sire.
Tällä hetkellä valittuna:
SASĚBANG 2: SXN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään