Genesis 2
2
1Kho likulu nende eshibala biamalilisibwa nende ebiamwo biosi shinga amahe. 2Mana khunyanga yomusaafu Nyasaye yali namalile emilimochie echia yali nakholile, nahuluushila khunyanga yomusaafu khumilimochie chiosi echia yali nakholile. 3Nyasaye nachiheelesia ikhabi inyanga yomusaafu, nachiahula; shichila khunyanga yeneyo niyo eya yahuluushilamwo khumilimochie chiosi echia Nyasaye yali nalonjile nende okhukhola.
4Shino nishio eshinoko shielikulu nende shieshibala olwa bialongwa.
Khunyanga eya OMWAMI Nyasaye yakholeIamwo eshibala nende likulu, 5shiali nishishili okhubakhwo eshimela shiosi eshianabulimo khushibala, kata emiani chiosi echianabulimo chiali nichishili okhumelakhwo tawe; okhuba OMWAMI Nyasaye yali nashili okhukwisia ifula khushibala, kata shiyaliho omundu owokhulima liloba ta; 6ne linang'ong'we liabuukha khushialo nilinyisia liloba liosi. 7OMWAMI Nyasaye nalonga omundu olufu lweliloba, nafuuramwo mumooluke emiuyachie chiobulamu, omundu naba omwoyo okuli nobulamu.
Omukunda kwaEdeni
8OMWAMI Nyasaye naraaka omukunda enabukwe, eEdeni; ne mubwenomwo naramwo omundu owa yali nalonjile. 9OMWAMI Nyasaye yamesia khwiloba shia omusaala omukaasu okhulolekha khwakwo, khandi omulayi khulwa ebiokhulia; omusaala kwobulamu nakwo khandi hakari mumukunda, nende omusaala kwokhumanya obulayi nende obubii.
10Omwalo kwarula muEdeni okhunyisia omukunda; nokhurula yaho kwakabukhana, nikwikhola emiombe chine. 11Eliira liokwambeli niPishoni; nikwo okwabotokhana eshibala eshilamba shiaHawila, eshilimwo itsahaabu, 12ne itsahaabu yeshibala eshio neindayi; yiliho nende ibetolaS nende oruchina rwaonikisi. 13Eliira liomuchela kwakhabili niGihoni; nikwo okwabotokhana eshibala eshilamba shiaEtiopia. 14Neliira liomuchela kwakhataru niHidekela; nikwo okwabira imbeli waAshuru. Nomuchela kwakhane niEufurate.
15OMWAMI Nyasaye nabukulu omundu oyo, namura mumukunda kwaEdeni, okhukulima nokhukulinda. 16OMWAMI Nyasaye nalaka omundu oyo ari Khushia omusaala okwomumukunda, olie shinga olwa wenyile; 17ne khumusaala okwokhumanya obulayi nende obubii, oraliakhwo tawe; shichila khunyanga eya olaliakhwo, okhuula ofwe.
18OMWAMI Nyasaye naboola ari Shibuli bulayi omundu uno okhuba yenyene ta; ndalamukholela omukhoonyi oumukhoyeele. 19Nokhurula mwiloba OMWAMI Nyasaye yakhola shia eshilamu eshiomushitsiimi, nende shia linyonyi eliokhwikulu, naleerela omundu oyo alole shinga olwa yakhabikulikha ameera; mana eliira liosi elia omundu oyo yakulikha shia eshilimwoyo shiosi, lienelo niliba eliira liashio. 20Omundu oyo nakulikha tsisolo tsiosi ameera, nende amanyonyi akokhwikulu, nende shia eshilamu eshiomushitsiimi; ne shiyanyoolekhamwo omukhoonyi oumukhoyela Adamu ta. 21OMWAMI Nyasaye naheelesia Adamu tsindoolo tsinyinji, nitsimuyila; mana nayinia olubafulwe lulala nakalusiaho inyama habundu hatsana; 22nolubafu olwa OMWAMI Nyasaye yali nayiniye muAdamu, nalulonga omukhasi, namuleerela Adamu. 23Naye Adamu naboola ari Uno bulaano nelikumba eliokhumakumba akomubili kwanje, khandi inyama eyokhunyama yomubili kwanje; akulikhwe mbu Omukhasi, shichila yayinibwa mu Omusaatsa. 24Khulweshio omusaatsa alalekhanga samwana nende nyina, ahambaane nende omukhasiwe; nabo balabeetsanga omubili mulala. 25Ne bali eshihechenye bombi, Adamu nende omukhasiwe, ne shibalolakhwo tsisoni tawe.
Actualmente seleccionado:
Genesis 2: OUV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Oluluyia Union Version © Bible Society of Kenya 1975