माथ 19
19
बापाग बाबोतते सिखा़उना
(मा़र १०:१-१२)
1आदो जिसु नोवाको काथाय मेनकेत् खान गा़लिल खोन मोहंडाकाते जोरदान गाडा पारोम सेच्ते जिहुदा़ टोठातेये हेच् एना। 2आर आ़डि गादेल होड़को पाँजाकेदेया, आर उनि दो ओंडेये बोगेकेत्कोवा।
3आर फा़रिसिको उनि ठेनको हेच्एना आर बिडा़वेया मेनतेको मेनकेदा, “होड़ दो आच् ओड़ाक् होड़ जाहान कारोनतेगे बा़गिये गानोक्ताया से बाङ?” 4उनिये रोड़ रुवा़ड़ात्कोवा, “सोसतोररे बापे पाड़हाव आकादा, सिसिरजा़विच् दो एतोहोप्रे हेरेल आर मायजिवे सिरजा़उकेत्किना? 5आरे मेनकेदा, ओना इया़ते हेरेल दो एङगात आपात बा़गिकिनते आच् रिनिच् तुलुच् लाता आकाने ताहेना, आर उनकिन दो मित् होड़मोकिन होयोक्आ। 6ओना इया़ते आरदो बारया दोकिन बाङ काना, बिचकोम मित् होड़मोगे। ओनाते ओकाटाक् इसोरे जोड़ाव मित् आकात् ओना दो मानवा आलोय तोपागमा।”
7“मेतादेयाको चेदाक् एनडेखान मोसे दो बापाग दोलेल ओलायते बा़गिये रेयाक् ए हुकुम आकात्आ?” 8उनिये मेतात्कोवा, “मोसे दो आपेयाक् केटेच् मोन इया़ते आपेरेन ओड़ाक् होड़ बा़क्गिये आड़ाक्आत्पेया, मेनखान एतोहोप् खोन नोनका दो बाङ होय हेच् आकाना। 9मेतापेकानाञ, जाहाँयगे लाटघाट इया़ते छाडा रिनिच्तेत् ए बा़गिये आर एटागिच् ए बापलाये, उनि दोए लोटघुटिया, आर ओकोय बा़गिआकादेयिच् ए बापलाये खान उनि होंए लोटघुटिया।” 10चेलाकोको मेतादेया, “ओड़ाक् होड़ सेलेत् हेरेल रेयाक् नोनकान जोपोड़ाव मेनाक् खान, एनडेखान बापलाक्गे बाङ बोगेया।” 11मेनखाने मेतात्कोवा, “सानाम होड़ दो नोवा काथा बाको गाछाव दाड़ेयाक्आ, मेनखान एमआकावात्को होड़ मोतोगे। 12एनते आदोम चा़करा़ मेनाक्कोवा, ओकोय एङगात कुखि खोन ओनकागेको जानामलेना आर आदोम चा़करा़ मेनाक्कोवा ओकोय होड़गेको चा़करा़ आकात्कोवा; आर आदोम चा़करा़ मेनाक्कोवा, ओकोय सेरमा राज ला़गित् आकोतेगेको चा़करा़ आकाना। गाछाव दाड़ेयाक्इच् दोए गाछावमा।”
जिसु का़टिच् गिदरा़कोय भोराकोकान
(मा़र १०:१३-१६; लु १८:१५-१७)
13उनरे का़टिच् गिदरा़को उनि ठेनको आ़गु सोरकेत्कोवा जेमोने चापोको आरे कोयाको, मेनखान चेलाको दोको धोमकावकेत्कोवा। 14मेनखान जिसुइ मेतात्कोवा, “का़टिच् गिदरा़को आड़ाक्आकोपे आर इञ ठेन हिजुक् आलोपे मानाकोवा, एनते सेरमा राज दो नोनकानकोवाक् कानगेया।” 15आदोए चापोवात्कोवा, आर ओंडे खोने चालावेना।
किसा़ँड़ जुवा़न कोड़ा रेयाङ
(मा़र १०:१७-३१; लु १८:१८-३०)
16आर ञेलपे, मित् होड़ उनि ठेन हेच्कातेये मेनकेदा, “हेंदा गुरु, चेत् भागेयाक् इञ का़मिया जेमोन जायजुग जियोन इञ ञाम?” 17जिसु दो उनिये मेतादेया, “भागेयाक् रेयाक् दो चेदाक्एम कुलिएदिञ काना? मित् गोटेनगेयाय भागेयिच् दो, मेनखान जियोनते बोलोक्एम मेनजोङकान खान, हुकुमको दोहोयमे।”
18मेताय कानाय, “चेत्लेकानाक् हुकुमको?” जिसुइ मेनकेदा, “नोंक्ओंय नोवाको, आलोम खुना, आलोम लाटघा़टिया, आलोम कोमबड़ोया, एड़े आलोम गोहाक्आ, 19एङगाम आ़पुम गानावकिनमे, आर आम आडेपासेरेन होड़ आपनार लेका दुला़ड़ेम।”
20उनि कोड़ा दोए मेतादेया, “नोवाको दो जोतोञ दोहो आ़गुवाकादा, आदो चेत्कोञ बा़किआकादा?”
21जिसु दो उनिये मेतादेया, “सा़बित उता़रोक्एम मेनजोङकान खान, दो सेनकाते मेनाक्तामाक्को आ़खरिञमे आर रेङगेच् ओरेच्को एमाकोम, खान सेरमारे धोन होयोक्तामा, आर देला पाँजाञमे।” 22मेनखान उनि कोड़ा दो ओना आँजोमकाते भाबनायेनतेये चालावेना, एनते आ़डि उता़र धोन ताहेंकानताया।
23आदो जिसु आच्रेन चेलाकोय मेतात्कोवा, “सा़रिगेञ मेतापेकाना, किसा़ँड़ होड़ दो सेरमा राजरे आ़डि मुसकिलतेको बोलोक्आ। 24आरहोंञ मेतापेकाना, किसा़ँड़ होड़ इसोराक् राजरे बोलोक् खोन सुइ भुगा़क्रे उँटए बोलो ताबोक् दो आलगागेया।” 25चेलाको दो ओना आँजोमकाते भाड़ो चाबायेनतेको मेनकेदा, “एनडेखान ओकोये बाञचाव दाड़ेकोक्आ?” 26जिसु दो ओनको सेच् बेङगेत्आतेये मेतात्कोवा, “मानवा होतेते नोवा दो बाङ होय दाड़ेयाक्आ, मेनखान इसोर होतेते दो सानामाक्गे होय दाड़ेयाक्आ।”
27खानगे पातरासे रोड़ रुवा़ड़केदा, “ञेलमे आले दो जोतोवाक्को बा़गिकातेले पाँजाआकात्मेया; चेत् एनडेखान होयोक्तालेया?” 28जिसुइ मेतात्कोवा, “सा़रिगेञ मेतापेकाना, आपे इञपे पाँजा आ़गुवाकादिञको दो, नावाँ सिरजोनरे मानवा होपोन आयाक् ठोनोक रेयाक् सिङघा़सोनरेये दुड़ुप्लेनरे, आपे हों गेलबार सिङघा़सोनरे दुड़ुप्काते इसराएलरेन गेलबार खुँटकोपे बिचा़रताकोवा। 29आर जाहाँयगे इञ ञुतुमते ओड़ाक् दुवा़र, से बोयहाको, से मिसराको, से एङगात से आपात, से आच् ओड़ाक् होड़ से गिदरा़को, से ओत बाड़गेकोय बा़गिआकावात् खान, उनि दो साय दोबोड़े ञामा, आर जायजुग जियोने आ़इदा़रिजोङा। 30मेनखान लाहातेनको आयमा दोको तायोमोक्आ आर तायोमतेनको दोको लाहाक्आ।”
Actualmente seleccionado:
माथ 19: NTSPt25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Santhali Language © The Word for the World International and Santhali Translation Project, Nepal, 2025