माथ 18
18
ओकोय कानाय सानाम खोन माराङिच्?
(मा़र ९:३३-३७; लु ९:४६-४८)
1ओना घा़ड़िच्रेगे चेलाको जिसु ठेन हेच्कातेको कुलिकेदेया, “ओकोय एनडेखान सेरमा राजरे दोए माराङा?” 2आदो मित्टेन का़टिच् गिदरा़ होहो सोरकाते ओनको तालारेये तेङगोकेदेया, 3आरे मेनकेदा, “सा़रिगेञ मेतापेकाना, का़टिच् गिदरा़ लेका बेगोर होयोक्ते सेरमा राजरे दो ओहोगेपे बोलोलेना। 4ओनाते जाहाँयगे उनि का़टिच् गिदरा़ लेका आच्तेये निंधा़नोक् उनिगे सेरमा राजरे दोए माराङा। 5आर जाहाँयगे इञ ञुतुमते नोनकान का़टिच् गिदरा़इ आताङे, उनि दो इञगेये आताङिञा।”
का़इ रेयाक् कुड़ा़इ बाबोतते जिसुवाक् चेतावना
(मा़र ९:४२-४८; लु १७:१,२)
6“मेनखान इञरेको पा़तिया़उक् कान नोको का़टिच्को मोदरेन मित्गोटेन जाहाँयगेये ता़किच् ओचोये, उनि ला़गित् नोवागे भागेकोक्आ, उनियाक् होटोक्रे माराङ उता़र जानति धिरि आकावायते जालापुरि रेयाक् खा़न्दरिञरेको उनुमकाय।”
7“हाय हाय धा़रतिरे ता़क्किच्आक्को इया़ते, ता़क्किच्आक्को मा जा़रुड़गे हिजुक् मेनखान ओकोय होतेते ता़क्किच्आक् हिजुक्, उनि होड़रे दो हाय हाय। 8जुदि आमाक् ति आर जाङगाय ता़किच् ओचोमे खान, सामाक् गिडिकाक्मे, बानार ति से बानार जाङगा ताहेनताम तुलुच् जायजुग सेङगेलरेम खादले ओचोक् खोन बिचकोम ठुनटा़ से लेडहागे जायजुग जियोनरेम बोलोक् दो आम ला़गित् बेसा। 9आर जुदि आमाक् मेंत् ए ता़किच् ओचोमे खान, ओना दो होटोर तोत्काते गिडिकाक्मे, बानार मेंत् ताहेन तुलुच् नोरोक सेङगेलरेम खादले ओचोक् खोन मित् मेंत्तेगे जायजुग जियोनरेम बोलोक् दो आम ला़गित् बेसा।”
आत्लेन भिडि रेयाङ फेन
(लु १५:३-७)
10“मेन सोनतोरोक्पे नोको का़टिच्को मोदरेन मित् गोटेन हों आलोपे निहा़ँतकोवा, एनतेञ मेतापेकाना, सेरमारे नोकोरेन दुतको दो सेरमारे मेनाय आ़पुञाक् मेंत्हाँ सिञ सा़टुप्को ञेल एदा। 11एनते मानवा होपोन दो आत् आकानको बाबाञचावगेये हेच् आकाना।”#18:11 मुल ओलाक् नोवा का़लि रेयाक् काथा बा़नुक्आ, मेनखान लुक19:10 रे नोवा मेनाक्आ
12“चेत्लेकापे हुदिस एदा, जाहाँय होड़रेन मित् साय भिडिको ताहेनताय आर ओनको मोदरेन मित्गोटेच् ए छिनगा़उलेन खान, चेत् ओनको आरे गेल आरे दो बुरुरे बा़गियाकोते सेनकाते उनि छिनगा़विच् बाय ञामबाड़ायेया? 13आर उनिये ञामले खान, सा़रिगेञ मेतापेकाना, ओनको बाको छिनगा़उलेन आरेगेल आरेको खोन उनि निया़तेगे बा़ड़तिये रा़सका़क्आ। 14ओनकागे सेरमारे मेनाय आपेरेन बाबावाक् मोने बा़नुक् ताया जे नोको का़टिच्को मोदरेन मित्गोटेच्ए आदोक्।”
घा़टि आकात्को तुलुच् बेवहार
15आर आमरेन बोयहाय का़इले खान सेनकाते आबेन एसकाररे ला़इ बुजहा़वायमे, जुदि आमाक् ए आँजोमले खान आमरेन बोयहाम लाबकेदेगे।#लुक 17:3 16मेनखान बाय आँजोमले खान मित् से बार होड़ सोङगेतोरा जोङमे, जेमोन बारया से पेया गोहाकोवाक् मोचाते मिमित् काथा टारहावक्।#देउतरोनोमि 19:15 17आर जुदि ओनकोवाक् हों बाय आँजोमले खान मान्डेररेन ला़इयाकोमे, आर मान्डेररेनकोवाक् हों बाय आँजोमले खान जिहुदि बाहरेरेन होड़ आर मा़सुल उक्ठा़उ होड़ लेका बुजहा़वेम। 18सा़रिगेञ मेतापेकान धा़रतिरे ओकाकोपे तोला ओना दो सेरमारे हों तोल आकान ताहेना, आर धा़रतिरे ओकाकोपे राड़ाय ओना दो सेरमारे हों राड़ागे ताहेना।#माथाय 16:19; लुक 20:23
19“आरहों सा़रिगेञ मेतापेकाना, आपेको मोदरे बार होड़ धा़रतिरे जाहानाक् रेयाक् मित् मोनतेकिन कोयले खान सेरमारे मेनाय आ़पुञ सेच् खोन होयोक्गेताकिना। 20एनते ओकारे बार से पे होड़ इञ ञुतुमतेको जारवाक्, ओंडे इञगे ओनको तालारे मिना़ञा।”
बाय इक्का़ गुति रेयाङ फेन
21उनरे पातरास हेच्सोरकातेये मेतादेया, “हेंदा प्रोभु बोयहाञ इञ रेयाक्ए का़इलेरे तिना़क् धाविञ इका़इताया? एयाय धाव हा़बिच्?”#लुक 17:3-4 22जिसुइ मेतादेया, “बा़ञ मेताम काना एयाय धाव हा़बिच् दो, मेनखान एयाय गेल दोबोड़ एयाय धाव हा़बिच्।”#जेनेसिस 4:24
23ओना इया़ते सेरमा राज दो मित्टेन राजोक् होड़ लेकाना, ओने उनि आच्रेन गुति तुलुच् लेखा जोखाय मेनवान। 24आदो लेखा जोखाय एहोप्केत् खान गेल हाजार सोना सिकि धारावलेत्इच् उनि ठेनको आ़गुकेदेया। 25आदो हाक्ला तेयाक् चेत् हों बाङ ताहेंकानतायते किसा़ँड़ दो उनि आर उनिरेन एरा होपोन आर ताहेंकानताय जोतोवाक्को आ़खरिञोक् आर हालाक्ए हुकुमकेदा। 26उनि गुति दो ति जाङगारे गिडियेनते ओमबाक्एनतेये मेनकेदा, “मा जिवि हाताड़मे, आदो जोतोञ हालाकातामा।” 27आदो उनि गुतिरेन किसा़ँड़ माँयाँ हेच् आदेतेये आड़ाक्कादेया, आर रिन खोने खालासकादेया। 28मेनखान उनि गुति दो ओडोक सेनकाते मित्टेन साँवतेन गुतिये ञामकेदेया ओने उनि मित् साय सिकिये धारावलेत्ताय, आर साप्कातेये लिमबा़त्केदेया आरे मेतादेया, “धारावाक् हालाका़तिञमे।” 29आदो उनि साँवतेन गुति दो ति जाङगारे गिडिकाते नेहोंर नेहोंरादेतेये मेतादेया, “मा जिवि हाताड़मे, आदोञ हालाकातामा।” 30उनि दो बाय रेबेन लेना, मेनखान सेनकाते हाजोतरेये भोरावकादेया, धारावाक् आ़उरिये हालाय हा़बिच्। 31आदो उनिरेन साँवतेन गुतिको ओना होयेनाक् ञेलकाते आ़डिको मोन दुक एना, आर आकोरेन किसा़ँड़ ठेन सेनकाते होयलेनाक् जोतोवाक्को खुला़उआदेया। 32खानगे उनिरेन किसा़ँड़ दो आच् ठेन होहो आ़गु ओचोकेदेतेये मेतादेया, “एया बा़ड़िच् गुति, आमेम नेहोंरादिञते जोतो धारावाक्को खोन इञ खालासकात्मेया, 33आदो आमरेन साँवतेन गुति हों माँयाँवाय लेक बाङ ताहेंकानतामा, इञ हों आमिञ माँयाँवात्मे लेका?” 34आर उनिरेन किसा़ँड़ दो राङगावेनते साक्सेतको ठेने सोपरोतकादेया जोतो धारावाक् आ़उरिये हालाय हा़बिच्। 35“आदो आपे मिमित् होड़ आपेरेन बोयहाको आपेयाक् ओनतोररे बापे इका़लेताको खान, सेरमारेन आ़पुञ हों आपेये ओनकावापेया।”
Actualmente seleccionado:
माथ 18: NTSPt25
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament Books in Santhali Language © The Word for the World International and Santhali Translation Project, Nepal, 2025