Lu-ka 6
6
Panôic pađao ka harei Sa-ƀat
(Ma-thi-ơ 12:1-8; Mag 2:23-28)
1Dalam harei Sa-ƀat, Pô Yê-su nao thrang tapa along hamu padai abei, dôm anưk xêh Bhô catek hadôm tangi padai, mưk tangin rapao bloh ƀang. 2Hu hadôm mưnuix Pha-ri-si đôm: “Habar dôm xaai ngak kabha ôh bihu idin ngak dalam harei Sa-ƀat?” 3Pô Yê-su thuuk: “Khol hư ô ka pôic kabha patao Đa-vit krung hu ngak tuk ong mưthong dôm ra nao tui ong gok lipa ô? 4Ong tamư thang Pô Lingik mưk tapei limah piêh ƀang bloh brei dôm urang nao tui ƀang gêk, kanê tapei nan ciêt gru mưliêng mưng bihu idin ƀang.” 5Bloh Bhô bican thong khol nhu: “Anưk Mưnuix nạn Pô harei Sa-ƀat.”
Pô Yê-su pajru rwak dalam harei Sa-ƀat
(Ma-thi-ơ 12:9-14; Mag 3:1-6)
6Tha harei Sa-ƀat pakan, Pô Yê-su tamư thang nhom pato pakai. Tak nan, hu tha urang gok iop palāk tangin hanuk. 7Dôm gru pato adat thong mưnuix Pha-ri-si tui iơk Bhô hu pajru rwak dalam harei Sa-ƀat kaic, piêh dwah gilong palek palam Bhô. 8Bhô thau thangka khol nhu, nan yơ bican thong mưnuix iop tangin laic: “Xang dang tagôk tabiak di krưh sani.” Urang nan dang tagôk bloh mưrai. 9Pô Yê-su bican thong khol nhu: “Ita tanhi khol hư: Dalam harei Sa-ƀat, bihu idin ngak bruk siam ngan bruk jhak, hajiơng dong mưnuix ngan pamưtai mưnuix?” 10Hadei di tuk mong yơng dôm urang tom dar, Bhô bican thong urang rwak: “Xang yêr tangin tabiak.” Urang nan yêr tabiak yơ tangin bihu dhit. 11Min khol nhu biak dangih bloh biai thong gaup iơk hu mưda ngak haget thong Pô Yê-su.
Pô rwah Tha Pluh Dwa Xêh Pachai
(Ma-thi-ơ 10:1-4; Mag 3:13-19)
12Dalam dôm harei nan, Pô Yê-su nao tagôk cơk piêh lang kar; Bhô mưdơh taluic mưlam lang kar thong Pô Lingik. 13Tal hadah harei hadei, Bhô iêu dôm anưk xêh mưrai bloh rwah tha pluh dwa urang dalam thanôn khol nhu, iêu nạn Xêh Pachai: 14Si-môn, Bhô patah angan nạn Phi-e-rơ, thong Ar-rê adei Phi-e-rơ; Ya-kơ thong Yâng; Phi-lip thong Ƀa-thê-lê-mi; 15Ma-thi-ơ thong Thô-ma; Ya-kơ anưk A-phê, thong Si-môn iêu nạn Xê-lôt#6:15 Xê-lôt: Sani nạn tha radak anưd mưnuix Yo Thaic anit diya, mưradhag vơk jakar Rô-ma. ; 16Yu-đa anưk Ya-kơ, thong Yu-đa Ic-ka-ri-ôt, hadei gilaic jiơng ra lambil Bhô.
Dôm gruk pato pakai pakan
17Bhô trun nao mưthong dôm xêh pachai bloh dang tak tha libik đaup. Hu ralô anưk xêh Bhô mưthong tapôr bôl biak ralô mưng graup nưgar Yu-đê, dhan Yê-ru-sa-lem, thong nưgar rah tathik Ti-rơ, Si-đôn mưrai piêh pang Bhô pato thong piêh bihu pajru dhit rwak. 18Dôm urang gok tan ok yang bingal jang bihu pajru dhit. 19Abih tapôr bôl jang dwah ganap ravơk Bhô, kaywa gon xagta mưng Bhô papar tabiak bloh pajru dhit ka abih drei.
Phôl thong lihin din
(Ma-thi-ơ 5:1-12)
20Pô Yê-su talāk mưta mong anưk xêh bloh bican:
“Phôl ka khol hư nạn dôm urang kathot raƀah,
Kaywa Dit Biya Pô Lingik bha di khol hư!
21Phôl ka khol hư nạn dôm urang urak ni krưh ơk,
Kaywa mưca bihu trei tian!
Phôl ka khol hư nạn dôm urang urak ni krưh hia cok,
Kaywa mưca bihu bui klao!
22 #
I Phi 4:14. Phôl ka khol hư tuk kaywa di Anưk Mưnuix bloh gok mưnuix urang mưbai limuk, jhul tiaup, pôic laic, klāk angan khol hư tabiak yau ra xag mưjưy. 23#Bruk 7:52.Dalam harei nan, khol hư xang ôt mưnôt plong ôn, kaywa dêh, kaya alin khol hư dok ngok thôr riga nạn biak prong; kaywa muk kei khol nhu lijang dok dang thong dôm pakat hôr yau nan.
24Min lihin din ka khol hư nạn dôm ra ginup mưda,
Kaywa krung bihu pajiông pajơ!
25Lihin din ka khol hư nạn dôm ra urak ni krưh trei,
Kaywa mưca ơk!
Lihin din ka khol hư nạn dôm ra urak ni krưh dok klao,
Kaywa mưca patak parai thong hia cok!
26Lihin din ka khol hư, tuk bihu abih drei pôk mưyom,
Kaywa muk kei khol nhu lijang dok dang thong dôm hôr baniai yau nan!
Anit ranam dôm ra thutruh
(Ma-thi-ơ 5:38-48; 7:12a)
27Min Ita bican thong khol hư nạn mưnuix pang Ita: Xang anit ranam ra thutruh drei, ngak karun ka ra limuk di drei, 28tadhau phôl ka ra hatam xap drei, thong lang kar ka ra jhơk jhel drei. 29Thei pah ƀok khol hư gah ni, xang yêr takung ƀok gah dêh vơk ka khol nhu; dok mưyah thei mưk ao lingiu hư, lijang jôi kađah khol nhu mưk takung ao dalam. 30Thei likau, xang brei; thei mưblah mưk drap ar khol hư, jôi đôk vơk. 31#Mat 7:12.Khol hư ưng mưnuix urang ngak ka drei yau halei, xang ngak ka mưnuix urang yau nan. 32Mưyah khol hư anit ranam dôm urang halei anit ranam drei yơ hu karun phôl haget? Bahkan ra danuh glaic lijang anit ranam dôm urang halei anit ranam khol nhu. 33Mưyah khol hư ngak karun ka urang ngak karun ka drei, yơ hu karun phôl haget? Bahkan urang danuh glaic lijang ngak yau nan. 34Mưyah khol hư brei thei nhim bloh cong khol nhu biyar vơk, yơ hu karun phôl haget? Bahkan ra danuh glaic lijang brei ka urang danuh glaic nhim, piêh bihu mưk vơk tal thanôn. 35Min khol hư xang anit ra thutruh drei, xang ngak karun, thong xang brei nhim bloh jôi cong biyar vơk. Yau nan, kaya alin anưd khol hư mưca prong, thong khol hư mưca nạn anưk Dê Glong Yatha, kaywa Bhô mưk tung siam tian dok dang thong ra lihik karun, thong ra xag mưjưy. 36Xang athur alim yau Amư khol hư bhian athur alim.
Jamrah urang pakan
(Ma-thi-ơ 7:1-5)
37Jôi jamrah thei yơ mưca khol hư ôh gok jamrah. Jôi padok an thei yơ mưca khol hư ôh gok padok an. Xang ampun urang yơ mưca khol hư bihu ampun. 38Khol hư xang brei yơ mưca bihu brei gilaic; tha jāk prong tuh bak, daum trun, yuh tal tuk ƀo dro, mưca bihu tuh tamư nung ao khol hư; kaywa khol hư hakak ka mưnuix urang nưm halei, yơ khol hư mưca tôk vơk nưm nan.”
39 #
Mat 15:14. Bhô lijang bican thong khol nhu tha arkatê: “Mưnuix tagloh hu mưda dui mưnuix tagloh bihu halei? Ôh njaup bih dwa mưthong lek trun gôk ô? 40#Mat 10:24,25; Yâ 13:16; Yâ 15:20.Anưk xêh ôh hơl gru, min mưyah anưk xêh bihu pathram tal abih, yơ mưca drơh yau gru drei. 41Habar khol hư ƀôh tahla dalam mưta dei ai, bloh gilaic ôh ƀôh gai nư dalam mưta drei? 42Habar hư hu mưda đôm thong dei ai: ‘Xaai lơy, lôi ka dahlak mưk tahla dalam mưta xaai tabiak,’ dok hư, yơ ôh ƀôh gai nư dalam mưta drei? Hơic ra jalan adat baniai, dahlau yatha xang mưk gai nư tabiak truh di mưta drei mek, bloh mưng ƀôh pajip piêh mưk tahla truh di mưta dei ai bihu.
Phun thong boh nhu
(Ma-thi-ơ 7:16-20; 12:33-35)
43Ôh hu phun siam halei gilaic pajiơng boh jhak; ôh hu phun jhak halei gilaic pajiơng boh siam; 44#Mat 12:33.kaywa iơk boh yơ thau phun. Ôh thei pek boh hara libik rôm darôi, hai nạn pek boh nho libik rôm darôi nhal. 45#Mat 12:34.Mưnuix siam kaywa tian đung kabha siam mưng mưnưk kabha siam; ra jhak kaywa tian đung kabha ag bloh pajiơng kabha ag; kaywa bak lamak dalam tian nan ka pabah mưng đôm tabiak.
Dwa urang darap thang
(Ma-thi-ơ 7:24-27)
46Habar khol hư iêu Ita: ‘Pô, Pô!’ bloh ôh ngak tui panôic Ita bican? 47Mưca Ita brei ka khol hư thau urang halei mưrai tom Ita, pang kadha Ita thong ngak tui yơ drơh yau thei. 48Urang nan drơh yau tha urang dêh darap thang, kôic trun biak jalam bloh darap canar var ngok patau. Tuk ia xwa jêh tagôk, ghol ia đôic har drak tamư thang nan lijang ôh yuh mưgei bihu, kaywa thang krung hu darap biak kardak. 49Min thei pang panôic Ita bloh ôh ngak tui yơ drơh yau tha urang dêh darap thang ngok tanưh bloh ôh hu canar var. Tuk ghol ia đôic har drak tamư, thang nạn binhêt gok jalơh thong rugi trak damak.”
Actualmente seleccionado:
Lu-ka 6: CJM2024
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.
Lu-ka 6
6
Panôic pađao ka harei Sa-ƀat
(Ma-thi-ơ 12:1-8; Mag 2:23-28)
1Dalam harei Sa-ƀat, Pô Yê-su nao thrang tapa along hamu padai abei, dôm anưk xêh Bhô catek hadôm tangi padai, mưk tangin rapao bloh ƀang. 2Hu hadôm mưnuix Pha-ri-si đôm: “Habar dôm xaai ngak kabha ôh bihu idin ngak dalam harei Sa-ƀat?” 3Pô Yê-su thuuk: “Khol hư ô ka pôic kabha patao Đa-vit krung hu ngak tuk ong mưthong dôm ra nao tui ong gok lipa ô? 4Ong tamư thang Pô Lingik mưk tapei limah piêh ƀang bloh brei dôm urang nao tui ƀang gêk, kanê tapei nan ciêt gru mưliêng mưng bihu idin ƀang.” 5Bloh Bhô bican thong khol nhu: “Anưk Mưnuix nạn Pô harei Sa-ƀat.”
Pô Yê-su pajru rwak dalam harei Sa-ƀat
(Ma-thi-ơ 12:9-14; Mag 3:1-6)
6Tha harei Sa-ƀat pakan, Pô Yê-su tamư thang nhom pato pakai. Tak nan, hu tha urang gok iop palāk tangin hanuk. 7Dôm gru pato adat thong mưnuix Pha-ri-si tui iơk Bhô hu pajru rwak dalam harei Sa-ƀat kaic, piêh dwah gilong palek palam Bhô. 8Bhô thau thangka khol nhu, nan yơ bican thong mưnuix iop tangin laic: “Xang dang tagôk tabiak di krưh sani.” Urang nan dang tagôk bloh mưrai. 9Pô Yê-su bican thong khol nhu: “Ita tanhi khol hư: Dalam harei Sa-ƀat, bihu idin ngak bruk siam ngan bruk jhak, hajiơng dong mưnuix ngan pamưtai mưnuix?” 10Hadei di tuk mong yơng dôm urang tom dar, Bhô bican thong urang rwak: “Xang yêr tangin tabiak.” Urang nan yêr tabiak yơ tangin bihu dhit. 11Min khol nhu biak dangih bloh biai thong gaup iơk hu mưda ngak haget thong Pô Yê-su.
Pô rwah Tha Pluh Dwa Xêh Pachai
(Ma-thi-ơ 10:1-4; Mag 3:13-19)
12Dalam dôm harei nan, Pô Yê-su nao tagôk cơk piêh lang kar; Bhô mưdơh taluic mưlam lang kar thong Pô Lingik. 13Tal hadah harei hadei, Bhô iêu dôm anưk xêh mưrai bloh rwah tha pluh dwa urang dalam thanôn khol nhu, iêu nạn Xêh Pachai: 14Si-môn, Bhô patah angan nạn Phi-e-rơ, thong Ar-rê adei Phi-e-rơ; Ya-kơ thong Yâng; Phi-lip thong Ƀa-thê-lê-mi; 15Ma-thi-ơ thong Thô-ma; Ya-kơ anưk A-phê, thong Si-môn iêu nạn Xê-lôt#6:15 Xê-lôt: Sani nạn tha radak anưd mưnuix Yo Thaic anit diya, mưradhag vơk jakar Rô-ma. ; 16Yu-đa anưk Ya-kơ, thong Yu-đa Ic-ka-ri-ôt, hadei gilaic jiơng ra lambil Bhô.
Dôm gruk pato pakai pakan
17Bhô trun nao mưthong dôm xêh pachai bloh dang tak tha libik đaup. Hu ralô anưk xêh Bhô mưthong tapôr bôl biak ralô mưng graup nưgar Yu-đê, dhan Yê-ru-sa-lem, thong nưgar rah tathik Ti-rơ, Si-đôn mưrai piêh pang Bhô pato thong piêh bihu pajru dhit rwak. 18Dôm urang gok tan ok yang bingal jang bihu pajru dhit. 19Abih tapôr bôl jang dwah ganap ravơk Bhô, kaywa gon xagta mưng Bhô papar tabiak bloh pajru dhit ka abih drei.
Phôl thong lihin din
(Ma-thi-ơ 5:1-12)
20Pô Yê-su talāk mưta mong anưk xêh bloh bican:
“Phôl ka khol hư nạn dôm urang kathot raƀah,
Kaywa Dit Biya Pô Lingik bha di khol hư!
21Phôl ka khol hư nạn dôm urang urak ni krưh ơk,
Kaywa mưca bihu trei tian!
Phôl ka khol hư nạn dôm urang urak ni krưh hia cok,
Kaywa mưca bihu bui klao!
22 #
I Phi 4:14. Phôl ka khol hư tuk kaywa di Anưk Mưnuix bloh gok mưnuix urang mưbai limuk, jhul tiaup, pôic laic, klāk angan khol hư tabiak yau ra xag mưjưy. 23#Bruk 7:52.Dalam harei nan, khol hư xang ôt mưnôt plong ôn, kaywa dêh, kaya alin khol hư dok ngok thôr riga nạn biak prong; kaywa muk kei khol nhu lijang dok dang thong dôm pakat hôr yau nan.
24Min lihin din ka khol hư nạn dôm ra ginup mưda,
Kaywa krung bihu pajiông pajơ!
25Lihin din ka khol hư nạn dôm ra urak ni krưh trei,
Kaywa mưca ơk!
Lihin din ka khol hư nạn dôm ra urak ni krưh dok klao,
Kaywa mưca patak parai thong hia cok!
26Lihin din ka khol hư, tuk bihu abih drei pôk mưyom,
Kaywa muk kei khol nhu lijang dok dang thong dôm hôr baniai yau nan!
Anit ranam dôm ra thutruh
(Ma-thi-ơ 5:38-48; 7:12a)
27Min Ita bican thong khol hư nạn mưnuix pang Ita: Xang anit ranam ra thutruh drei, ngak karun ka ra limuk di drei, 28tadhau phôl ka ra hatam xap drei, thong lang kar ka ra jhơk jhel drei. 29Thei pah ƀok khol hư gah ni, xang yêr takung ƀok gah dêh vơk ka khol nhu; dok mưyah thei mưk ao lingiu hư, lijang jôi kađah khol nhu mưk takung ao dalam. 30Thei likau, xang brei; thei mưblah mưk drap ar khol hư, jôi đôk vơk. 31#Mat 7:12.Khol hư ưng mưnuix urang ngak ka drei yau halei, xang ngak ka mưnuix urang yau nan. 32Mưyah khol hư anit ranam dôm urang halei anit ranam drei yơ hu karun phôl haget? Bahkan ra danuh glaic lijang anit ranam dôm urang halei anit ranam khol nhu. 33Mưyah khol hư ngak karun ka urang ngak karun ka drei, yơ hu karun phôl haget? Bahkan urang danuh glaic lijang ngak yau nan. 34Mưyah khol hư brei thei nhim bloh cong khol nhu biyar vơk, yơ hu karun phôl haget? Bahkan ra danuh glaic lijang brei ka urang danuh glaic nhim, piêh bihu mưk vơk tal thanôn. 35Min khol hư xang anit ra thutruh drei, xang ngak karun, thong xang brei nhim bloh jôi cong biyar vơk. Yau nan, kaya alin anưd khol hư mưca prong, thong khol hư mưca nạn anưk Dê Glong Yatha, kaywa Bhô mưk tung siam tian dok dang thong ra lihik karun, thong ra xag mưjưy. 36Xang athur alim yau Amư khol hư bhian athur alim.
Jamrah urang pakan
(Ma-thi-ơ 7:1-5)
37Jôi jamrah thei yơ mưca khol hư ôh gok jamrah. Jôi padok an thei yơ mưca khol hư ôh gok padok an. Xang ampun urang yơ mưca khol hư bihu ampun. 38Khol hư xang brei yơ mưca bihu brei gilaic; tha jāk prong tuh bak, daum trun, yuh tal tuk ƀo dro, mưca bihu tuh tamư nung ao khol hư; kaywa khol hư hakak ka mưnuix urang nưm halei, yơ khol hư mưca tôk vơk nưm nan.”
39 #
Mat 15:14. Bhô lijang bican thong khol nhu tha arkatê: “Mưnuix tagloh hu mưda dui mưnuix tagloh bihu halei? Ôh njaup bih dwa mưthong lek trun gôk ô? 40#Mat 10:24,25; Yâ 13:16; Yâ 15:20.Anưk xêh ôh hơl gru, min mưyah anưk xêh bihu pathram tal abih, yơ mưca drơh yau gru drei. 41Habar khol hư ƀôh tahla dalam mưta dei ai, bloh gilaic ôh ƀôh gai nư dalam mưta drei? 42Habar hư hu mưda đôm thong dei ai: ‘Xaai lơy, lôi ka dahlak mưk tahla dalam mưta xaai tabiak,’ dok hư, yơ ôh ƀôh gai nư dalam mưta drei? Hơic ra jalan adat baniai, dahlau yatha xang mưk gai nư tabiak truh di mưta drei mek, bloh mưng ƀôh pajip piêh mưk tahla truh di mưta dei ai bihu.
Phun thong boh nhu
(Ma-thi-ơ 7:16-20; 12:33-35)
43Ôh hu phun siam halei gilaic pajiơng boh jhak; ôh hu phun jhak halei gilaic pajiơng boh siam; 44#Mat 12:33.kaywa iơk boh yơ thau phun. Ôh thei pek boh hara libik rôm darôi, hai nạn pek boh nho libik rôm darôi nhal. 45#Mat 12:34.Mưnuix siam kaywa tian đung kabha siam mưng mưnưk kabha siam; ra jhak kaywa tian đung kabha ag bloh pajiơng kabha ag; kaywa bak lamak dalam tian nan ka pabah mưng đôm tabiak.
Dwa urang darap thang
(Ma-thi-ơ 7:24-27)
46Habar khol hư iêu Ita: ‘Pô, Pô!’ bloh ôh ngak tui panôic Ita bican? 47Mưca Ita brei ka khol hư thau urang halei mưrai tom Ita, pang kadha Ita thong ngak tui yơ drơh yau thei. 48Urang nan drơh yau tha urang dêh darap thang, kôic trun biak jalam bloh darap canar var ngok patau. Tuk ia xwa jêh tagôk, ghol ia đôic har drak tamư thang nan lijang ôh yuh mưgei bihu, kaywa thang krung hu darap biak kardak. 49Min thei pang panôic Ita bloh ôh ngak tui yơ drơh yau tha urang dêh darap thang ngok tanưh bloh ôh hu canar var. Tuk ghol ia đôic har drak tamư, thang nạn binhêt gok jalơh thong rugi trak damak.”
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Bible Society Vietnam. All rights reserved.