John 3
3
1ဂျူးလူမျိုးခေါ်ဆော်ဒွေထဲမှာ နိကောဒင်ဆိုရိ ခေါ်ဝို ဖာရိရှဲဖွဲ့ဝမ်တယော့လဲ ရှေ့နေလေရယ်။ 2ညစ်ခါမှာ သူဟ ကိုယ်တော်ယေရှုဆီဝို လာပီး “ဆရာ၊ ဆရာဟ ဘုရားရှင်ဆီဟလာဝို သူဖြစ်ကြော ကျော်ဒို့သိပါရယ်။ ဂယ်ရိ ဘုရားရှင်သာ ဆရာနတူတူပါလာဘဲနေဆိုဝါ အယ်မိုမျိုး အံ့ဖွယ်နမိလက္ခဏာဒွေဝို ဟယ်သူမှ ပြုလုပ်နိုင်မှာမုဝ” ဆိုပီး ရှော့တံလေရယ်။ 3ကိုယ်တော်ယေရှုဟ “သင့်ဝို ငါမှန်ပြောရမယ်ဆိုဝါ ဟယ်သူမဆို သစ်တဖန် မွီးဖွားဇာမှေ့ဘဲနဲဆိုဝါ ဘုရားရှင်ရဲ့သာသနာတော်ဝို ဗြင်နိုင်မှာမုဝ” ဆိုပီး ပလန်လည်မိတော်မူလေရယ်။ 4အဲခါမှာ နိကောဒင်ဟ ကိုယ်တော်ဝို “အဲမျိုးဆိုဝါ သက်ကီးနေပီဖစ်ဝိုသူတယော့ဟ ဟဲရာမျိုး ပလန်လည်မွီးဖွားနိုင်မယ်နူး၊ အဲမိုလူဟ မိဝမ်းထဲဝို ပလန်လည်ဝမ်ရော့ပီး နော့ထပ် သစ်တဖန်မွီးဖွားဝို့ဆိုဇာ ဖြစ်နိုင်ရ” ဆိုပီး ရှော့တံလေရယ်။ 5ကိုယ်တော်ယေရှုဟ “သင့်ဝို ငါမှန်ပြောရမယ်ဆိုဝါ ဟယ်သူမဆို ရေနဖစ်ဖစ် ဉာဏ်လင်းတော်နဖစ်ဖစ် သစ်တဖန်မွီးဖွားလာဘဲနေဆိုဝါ ဘုရားရှင်ရဲ့သာသနာတော်ထဲဝို ဝမ်ရော့နိုင်မှာမုဝ။ 6လူသွီးသားနမွီးဖွားလာဝိုသူဟ လူသားမိဖဒွေဆီဟ လာဇာဘဲ့ဖြစ်ပီး ဉာဏ်လင်းတော်ဆီဟ ဘုရားရှင်ရဲ့သားမီးဒွေ လာဇာဘဲ့ဖစ်ရယ်။ 7အဲဂျော့ ‘နန်းနို့ဟ သစ်တဖန် မွီးဖွားဝို့လိုရယ်’ ဆိုပီး နန့်နို့လေဝို ငါပြောဇာဝို အံ့ဩဂေ့ပါန။ 8လေဟ သူလိုရှေ့ရာရပ်ဝိုတိုက်လေရယ်။ အဲမိုလေတိုက်သံဝို လူဒွေကြားရဘေမဲ့ အဲမိုလေ ဟယ်ရပ်ဟလာပီး ဟယ်ရပ်နေရာဝို သွားရယ်ဆိုဇာဝို နန်းနို့သိဂေ့ရ။ ဉာဏ်လင်းတော်အားန မွီးဖွားလာဝိုသူဒွေဟလဲ အဲမျိုးဘဲ့ဖြစ်ရယ်” ဆိုပီး ပလန်လည်မိတော်မူရယ်။ 9အဲနော့ နိကောဒင်ဟလဲ “အယ်မိုဇာဒွေဟ ဟဲမျိုးဖြစ်နိုင်မယ်နူး” ဆိုပီး ကိုယ်တော်ဝို မေးရှော့လေရယ်။ 10ကိုယ်တော်ယေရှုဟလဲ “နန့်ဟ အစ္စရေးလူမျိုးဒွေရဲ့ ဆရာဖြစ်ပီး အယ်မိုဇာဒွေဝို ဟဲဖြစ်ဂျော့ နန်နားလည်သေးရနူး။ 11ကိုယ်တော်ယေရှုဟလဲ “နန့်ဟ အစ္စရေးလူမျိုးဒွေရဲ့ ဆရာဖြစ်ပီး အယ်မိုဇာဒွေဝို ဟဲဖြစ်ဂျော့ နန်နားလည်သေးရနူး။ 12နန့်နို့ဝို အယ်ဘာလောကမှာ ဖြစ်ပျစ်နေဝိုကြောရာဒွေဝို ငါနန်းနို့ဝိုပြောဇာဝိုခါမှာ ယုံကြည်ဘဲနေဆိုဝါ ရွှေ့ဗြို့တော်ရဲ့ကြောရာဒွေဝို ငါဟောပြောမယ်ဆိုဝါ နန်းနို့ငါ့ဝို ဟဲမျိုးယုံကြည်ဂေ့မယ်နူး။ 13ရွှေ့ဗြို့တော်ဟ ဆင်းသက်လာတော်မူဝို လူသားတော်ဘားဟနေလွှဲပီး ဟယ်သူဟမှ ရွှေဗြို့တော်ဝို တက်ရော့နိုင်ဇာမှေ့သေးရ။ 14စဒူးဟ မောရှေဟ လူဒွေဝို တောကန္တာရမှာ ကြေးနပြုလုပ်ရားဝိုဗွှီရုပ်ဝို တိုင်ပေါ်မှာတံရားမျိုး လူသားတော်ဟလဲ လက်ဝါးကပ်တိုင်ပေါ်မှာ သေဝို့တွက် တံရားဇာခံရလိမယ်ဖြစ်ရယ်။ 15အဲမိုမျိုးမှ လူသားတော်ဝို ယုံကြည်လူပေါဒို့ဟ ထာဝရသက်ဝို ရရှေ့ဂေ့လိမယ်ဖြစ်ရယ်။ 16ဟားဖစ်နူးဆိုဝါ ဘုရားရှင်ဟ အယ်ဘာကီးဝို ချစ်မြတ်နိုးတော်မူဂျော့ သူ့ရဲ့ဦးတည်းသောသားတော်ဝို ပေးအပ်ရစ်ဇာဖြစ်ပေမဲ့ ဘုရားရှင်ရဲ့သားတော်ဝို ယုံကြည်ဂေ့ဝိုသူဒွေဟ ပျစ်ပေးဇာခံဂေ့ရဝို့မုဘဲ့န နိစထာဝရသက်ဝို ရဂေ့လိမယ်ဖြစ်ရယ်။ 17ဘုရားရှင်ဟ သားတော်ဝို လူသားဒွေဝိုပြစ်စီရင်ဝို့တွက် အယ်ဘာပေါ်ဝိုစေလွှတ်ဇာမုဘဲန လူသားဒွေဝို ကိုယ်တော်အားန သားတော်ဆီမှတဆင့် ကယ်တံခြင်းခံရဝို့တွက် စေလွှတ်ဇာဖြစ်ရယ်။ 18သားတော်ဝို ယုံကြည်ဝိုသူဒွေဟ ပြစ်စီရင်ဇာခံရဝို့မုရ။ အယ်ဘေမဲ့ ယုံကြည်ဘဲဝိုလူဒွေကလလော ဘုရားရှင်ရဲ့ဘားတည်းသော သားတော်ဝို ယုံကြည်ဘဲတွက်ဂျော့ သူ့နို့ဟ ပျစ်ရားစီရင်ဇာခံရဂေ့လိမယ်။ 19ပြစ်တရားစီရင်ရခြင်း ကြောဟလောအယ်မျိုးဖြစ်ရယ်။ လန်းရော်ဟ အယ်ဘာလောကပေါ်ဝို လာရော့ဘေမဲ့ လူဒွေဟ သူ့နို့ရဲ့ကောဘဲဝိုဒုစရိုက်ဒွေဝို လုပ်ဆော်ဂေ့ဂျော့ သူ့နို့ဟ လန်းရော်ထက် မှော်ဝိုပိုပီးကြိုက်ဂေ့ရယ်။ 20ကောဘဲဝို ဒုစရိုက်ဒွေဝိုပြုလုပ်ဝိုလူဒိုင်းဟ လန်းရော်ဝိုမူးတီးဂေ့ပီး သူ့နို့ပြုလုပ်ရားဝို ကောဘဲဝိုဒုစရိုက်ဒွေဝို ထုဖော်ပြသဇာခံရမှာဝို ကြော့ဂေ့ဂျော့ သူ့နို့ဟ လန်းရော်ဆီဝို လာဂေ့ရ။ 21အယ်ဘေမဲ့ မှန်ကန်ဝိုရာဒွေဝို ပြုလုပ်ဝို့လူဒွေကလလော လန်းရော်ဆီဝို လာရော့ဂေ့လေရယ်။ ဟားဖြစ်နူးဆိုဝါ သူ့နို့ပြုလုပ် လုပ်ဆော်ဇာမှန်ကန်တဲ့ ရာမှန်သမျှဟ ဘုရားရှင်ဟ သူ့နို့ဝိုခွမ့်ပြုထားကြောဝို ခြားလူဒွေရှင်းလင်း ဗြင်နိုင်ဂေ့အော်ဖြစ်ရယ်။ 22အယ်ဘေမဲ့ မှန်ကန်ဝိုရာဒွေဝို ပြုလုပ်ဝို့လူဒွေကလလော လန်းရော်ဆီဝို လာရော့ဂေ့လေရယ်။ ဟားဖြစ်နူးဆိုဝါ သူ့နို့ပြုလုပ် လုပ်ဆော်ဇာမှန်ကန်တဲ့ ရာမှန်သမျှဟ ဘုရားရှင်ဟ သူ့နို့ဝိုခွမ့်ပြုထားကြောဝို ခြားလူဒွေရှင်းလင်း ဗြင်နိုင်ဂေ့အော်ဖြစ်ရယ်။ 23ရေနှစ်မြင်ဂလာယောဟန်ဟလဲ ရှာလိမ်ဗြို့နီး အဲနုန်ရပ်မှာ ရေပေါတွက်ဂျော့ ရေနှစ်မြင်ဂလာပေးနေဇာဝို လူဒွေဟ လာရော့ပီး ယောဟန်ဆီဟ ရေနှစ်မြင်ဂလာခံယူဂေ့လေရယ်။ 24 (အဲခီမှာ ယောဟန်ထော်ကလသေးဘဲဝို ခီဖြစ်ရယ်။) 25အဲနော့ ဂျူးလူမျိုးဒွေရဲ့သန့်စင်ခြင်း မြင်ဂလာဓလေ့ထုံးတမ်းန ပတ်သက်ပီး ယောဟန်ရဲ့ဗြိချို့န ဂျူးလူမျိုးတယော့ဟ ပြိုင်ဂျင်းဂေ့လေရယ်။ 26သူ့နို့ဟ ယောဟန်ဆီဝိုလာပီး “ဆရာ၊ ကေ့ကေ့ပါ၊ ကျော်ဒို့ဂျော်ဒန်ဗြစ်တဖက်ကမ်းမှာ ဆရာနတူရှေ့ခဲ့ဖူးဝိုသူဝို ဆရာမှတ်မိပါလော။ ဆရာဟသူ့ဝိုသိပီး မေရှိယဖြစ်ကြောဝိုလဲ သက်သေခံပေးခဲ့ဖူးဝိုသူဟ ခုခါမှာ လူဒွေဝိုရေနှစ်မြင်ဂလာပေးနေပီး လူဒွေဟလဲ သူ့ဆီဝို သွားနေဂေ့ပါရယ်” ဆိုပီး ရှေ့ာတံလေရယ်။ 27ယောဟန်ဟ “ဘုရားရှင်ဟရွှေဗြို့တော်မှာ ပေးတော်မူဇာမှေ့ဘဲနေဆိုဝါ လူဒွေဟ ဟဲရာဇာဝိုမှ လက်ခံရရှေ့နိုင်မှာမုဝ။   28‘ငါဟ မေရှိယရှင်မုဝ၊ အယ်ဘေမဲ့ ငါ့ဟ သူ့ထက်ရင်ဦးဆုံး စေလွှတ်တော်မူဇာခံရသူဖြစ်ရယ်’ ဆိုပီး ငါပြောရစ်ဝိုကြောဝို နန်းနို့ကိုယ်တိုင်ဘဲ့ ကြားခဲ့ဂေ့ပီဖြစ်ရယ်။ 29ဒို့သမီးဝိုလက်ထက်ဝိုသူဟ ဒို့သားဘဲ့ဖြစ်ရယ်။ ဒို့သားရဲ့သံဝို ကြားခီမှာ ဒို့သားရဲ့နီးနားမှာရပ်နေဝို ဒို့သားရဲ့မိဆွေဒွေဟ ဒိုသားရဲ့သံဂျော့ ရဒိုင်းဝမ်းသာအားရဖြစ်ဂေ့ရယ်။ အဲဂျော့ ငါဟလဲ အဲမိုဝမ်းမြော့ခြင်းနတူ ပလဲ့ဝနေရယ်။ 30ငါ့ရဲ့ရေးပါမှု ပိုပီး နိ့ကလလာမှာဖြစ်ပြီး သူ့ရဲ့ရေးပါမှုဟ ငါ့ထက် ပိုပီး ကီးမြတ်လာမှာဖြစ်ရယ်” ဆိုပီး ပြောလေရယ်။ 31“ဘုရားရှင်ဆီဟ ဝွီးချယ်ခံရဝိုအရှင်ဟ ရာအားလုံးထက် ကီးမြတ်ပေရယ်။ ဘာပေါ်မှလာဝိုသူဟ ဘာကီးနဘဲ့သက်ဆိုင်ပီး ဘာလောကနသက်ဆိုင်ဝို ကြောရာဒွေဝိုဘဲ့ ပြောဆိုတတ်ရယ်။ ဘုရားရှင်ဆီဟ ကြွလာဝိုအရှင်ဟ ရာအားလုံးရဲ့ထက်မှာရှေ့ရယ်။ 32အရှင်ဟ သူဗြင်ခဲ့ဇာဒွေ ကြားခဲ့ဇာဒွေဝို သက်သေခံဘေမဲ့ သူ့ရဲ့သက်သေခံဇာဒွေဝို ဟယ်သူလဲ လက်ခံဂေ့ရ။ 33အယ်ဘေမဲ့ အရှင်ရဲ့ဒန်းဂါးဒွေဝို လက်ခံဝိုဟယ်သူမဆို ဘုရားရှင်ရဲ့ နူ့ကပတ်တော်ဒွေ မှန်ကန်ကြောဝို တည်ပြု လက်ခံဂေ့လူဒွေဖြစ်ရယ်။ 34ဟဲဖြစ်နူးဆိုဝါ ဘုရားရှင်ဟ သူ့ဝို ဉာဏ်လင်းတော်ရဲ့တန်ခိုးတော်ဝို ကန့်သတ်မေ့ဘဲ့ ပေးရားရိတွက်ဂျော့ ဘုရားရှင်စေလွှတ်လိုက်ဝိုအရှင်ဟ ဘုရားရှင်ရဲ့ဒန်းဂါးဒွေဝိုဘဲ့ ဟောပြောတတ်ဂျော့ဖြစ်ရယ်။ 35အဖဘုရားဟ သားတော်ဝို ချစ်မြတ်နိုးတော်မူတွက်ဂျော့ ရာအားလုံးဝို သူ့လက်ထဲဝို ပေးအပ်တောမူလေရယ်။ 36သားတော်ဝို ယုံကြည်လူတိုင်းဟ နိစထာဝရသက်ဝို ရမှာဖြစ်ဂေ့ဘေမဲ့ သားတော်ဝို ငြင်းပယ်ဝိုသူတိုင်းဟ အဲမိုသက်ဝိုမရဘဲန ဘုရားရှင်ရဲ့ ပျစ်စီရင်ဇာဝိုဘဲ့ ခံဂေ့ရလိမယ်ဖြစ်ရယ်” ဆိုပီး ဟောပြောလေရယ်။
Actualmente seleccionado:
John 3: ttpv-rv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.