Левит 5
5
5-тӥ ЛЮКЕТ
1«Кин ке но тазьы сьӧлыказ ке: карган куараез кылӥз, ачиз адӟиз яке кылӥз, яке тодӥз, но нокинлы но со сярысь ӧз вера, соку со мурт сьӧлыкез ас вылаз басьтоз. 2Яке кин ке тодытэк кыӵе ке кырсь маке борды йӧтӥськиз – кырсь пӧйшурлэн шӧй бордаз яке кырсь пудолэн шӧй бордаз, яке кырсь нюж кыстӥськыса ветлӥсьлэн шӧй бордаз, соку та мурт саптаськоз, янгыш луоз. 3Адями бордысь потэм кырсь борды кин ке йӧтӥськиз ке, котькыӵе кырсь маке со мед луоз, со саптаськоз, нош со та сярысь ӧз тоды, берло гинэ тодӥз, озьы ке но со янгыш. 4Кин ке но малпаськытэк кылыныз мар ке но уродзэ яке ӟечсэ лэсьтыны кыл сётӥз ке, котькыӵе уж со мед луоз, нош адямиос малпаськытэк кыл сёто, со дыре адями ужлэсь кыӵе луонзэ уг тоды вал, нош бӧрысь со тодӥз ке, со уж понна та адями янгыш каремын луоз. 5Кудӥныз ке но таӵе ужен со янгыш луэмын ке, лэсьтэм сьӧлыксэ ватытэк ӧпкельыса вераз ке, 6та лэсьтэм сьӧлыкез понна, янгышлэсь мозмытскон понна Кузё-Инмарлы сюро векчи пудоосыз пӧлысь ыжез яке кечез курбон мед ваёз, соку священник сое сьӧлыкезлэсь сузялоз. 7Нош солэн моӵез ӧвӧл ке ыжез яке кечез курбон сётыны, сьӧлыкаса янгыш луэмез понна кык кыр дыдык яке кык пинал гурт дыдыкъёсты курбонлы мед ваёз, одӥгзэ сьӧлык понна курбон мед сётоз, нош мукетсэ тылын сутӥськись курбон мед кароз; 8соосты со священник доры мед ваёз, соку [священник] сьӧлык понна ваем тылобурдоез курбон мед сётоз, йырзэ чырты бордысьтыз мед тӥялтоз, но медаз ишкалты; 9та сьӧлык понна сётэм курбон тылобурдолэн вирыныз курбон сётон ӝӧклэн борддор бордаз вирен мед пазялоз, нош кылемзэ вирзэ курбон сётон ӝӧклэн выжыяз мед кисьтоз: та сьӧлык понна сётэм курбон; 10нош мукетсэ тылобурдоез пуктон-косонъя тылын сутӥськись курбон мед кароз; тазьы священник та адямиез лэсьтэм сьӧлыкезлэсь сузялоз, солэн сьӧлыкез куштӥськоз. 11Нош солэн моӵез ӧвӧл ке кык кыр дыдыкъёсты яке кык пинал гурт дыдыкъёсты курбон сётыны, соку лэсьтэм сьӧлыкез понна ефа#5:11 ефа – 30-40 литр тэрись сосуд чабей пызьлэсь дасэтӥ люкетсэ сьӧлык понна курбонлы мед ваёз; со вылэ вӧй медаз кисьты, со вылэ ливан-ладан но медаз поны, уго та сьӧлык понна сётӥськись курбон; 12сое священник доры мед ваёз, нош священник быдэс кырым пызез буре вайыны мед басьтоз но курбон сётон ӝӧк вылын, Кузё-Инмарлы сӥзьыса, сое мед сутоз: та сьӧлык понна сётэм курбон; 13тазьы священник сое кудаз ке но таӵе учыре сюрыса лэсьтэм сьӧлыкезлэсь сузялоз но, солэн сьӧлыкез куштӥськоз; нош [кылемзэ] салам нянез кадь ик священник аслыз мед басьтоз».
14Кузё-Инмар Моисейлы тазьы вераз, тазьы шуиз: 15«Кин ке йыруж лэсьтӥз ке, янгышаса Кузё-Инмарлы сӥзёнозэ аслыз кариз ке, со янгышез понна ыж уллёысьтыз чылкыт-шектэм такаез Кузё-Инмарлы мед ваёз, тон дунъялод, кӧня азвесь сӥкльёс, вӧсяськон скинияысь сӥкльлэн секталаеныз мертаса, ваёно такаезлэн дуныз луыны кулэ – янгыш лэсьтэм понна курбон луоз со. 16Священной ужлы пумит сьӧлыкамез понна тыронзэ мед берыктоз, со вӧзы эшшо витетӥ люкетсэ мед ватсалоз на, сое священниклы мед сётоз, янгыш уж понна курбонлы ваем такаез курбон сётыса, священник со муртэ сьӧлыкезлэсь сузялоз, солэн сьӧлыкез куштӥськоз. 17Кузё-Инмарлэн курон-косонъёсызлы пумит кин ке тодытэк сьӧлыказ ке, кулэтэм-ярантэм уж лэсьтӥз ке, янгыше сюриз ке, ас вылаз сьӧлыкез нуоно луоз, 18соку со янгыш ужез понна священник доры чылкыт-шектэм такаез курбон сётыны мед ваёз, – кыӵезэ со вайыны кулэ, тон дунъялод, – солэсь тодытэк лэсьтэм янгышсэ, курон-косонэз сӧрыса лэсьтэм ужзэ, священник ӵошкатоз, солэн сьӧлыкез куштӥськоз. 19Та Кузё-Инмар азьын янгыше сюрем понна ваем курбон».
Actualmente seleccionado:
Левит 5: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016