Левит 6
6
6-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Кин ке Кузё-Инмар азьын сьӧлыказ ке, йыруж лэсьтӥз ке, матысь муртэз азьын солэн ваньбур пӧлысьтыз марзэ ке утьыса возьыны басьтэмез яке дораз возьыны кутэмез, яке лушкамез понна танӥськиз ке, яке матысь муртсэ ӧрекчаз ке, 3яке ыштэм арбериез шедьтӥз но ӧй шедьты шуыса танӥськиз ке, маке понна ӧрекчаськыса кыл сётӥз ке, кызьы лэсьто адямиос но кызьы та пыр соос сьӧлыкало, – 4сьӧлыкаса янгыш луэ бере, соку со мае лушказ, мед берыктоз, мае талаз, мед берыктоз, мар солы утьыны сётэмын вал, мед берыктоз, ыштэм арбериез шедьтӥз ке, мед берыктоз; 5яке маке сярысь ӧрекчаськыса ”таиз мынам” шуыса кыл сётыса оскытӥз ке, быдэс дунзэ мед сётоз, янгышам понна курбон сётон нуналэ, со вӧзы эшшо вить люкет ватсаса, кузёезлы мед берыктоз; 6аслаз янгышез понна Кузё-Инмарлы янгышам понна сётӥськись курбонэз священник доры ыж уллёысь чылкыт-шектэм такаез мед ваёз, кыӵезэ тон вайыны косод, сыӵезэ мед ваёз; 7священник сое Кузё-Инмар азьын сьӧлыклэсь сузялоз но, мар гинэ со уз лэсьты, ваньмыз, маин со янгыше усиз, куштӥськоз». 8Соку Кузё-Инмар Моисейлы тазьы вераз, тазьы шуиз: 9«Ааронлы но солэн пиосызлы таӵе курон-косон сёт: ”Тани тылын сутӥськись курбон сётонлэн законэз: тылын сутӥськись курбон быдэс уй, ӵукнаозь курбон сётон интыын мед улоз, курбон сётон интыын тыл но [кысылытэк] мед ӝуалоз; 10священник етӥн мертчанлэсь куэм дӥськутсэ мед дӥсялоз, мугор вылаз етӥнлэсь куэм улдэремзэ мед дӥсялоз но, курбон сётон ӝӧк вылэ тылын сутӥськись курбон сётэм бере люкаськем пенез басьтыса, курбон сётон ӝӧк вӧзы мед поноз; 11вылысьтыз дӥсянзэ мед кылёз но мукетсэ мед дӥсялоз, пенез станлэн сьӧраз чылкыт интые мед поттоз; 12нош курбон сётон ӝӧк вылын тыл мед ӝуалоз, медаз кысы; ӵукналы быдэ священник, со вылэ пу тырыса, мед эстӥськоз но тылын сутӥськись курбон со вылэ мед тыроз, тупаса улонлы сӥзьыса сётэм курбон пудолэсь кӧйзэ но со вылын мед сутоз; 13курбон сётон ӝӧк вылын ялан тыл мед ӝуалоз, медаз кысылы.
14Тани курбонлы нянь сётонлэн законэз: [священникъёс] Ааронлэн пиосыз сое Кузё-Инмар азе курбон сётон инты доры вайыны кулэ; 15саламлы ваем пӧлысь [священник] кырыменыз чабей пызь, вӧй, курбон сётыны ваем вылэ понэм ливанэз-ладанэз мед басьтоз, сое курбон сётон ӝӧк вылын мед сутоз: та ческыт зын поттон, Кузё-Инмар азьын буре ваён; 16нош кылемзэ Аарон но солэн пиосыз мед сиёзы; солэсь юмал нянь мед пыжозы но святой интыын, вӧсяськон скиниялэн азбараз, мед сиёзы; 17чырсатыса сое пыжыны уг яра. Тае Мон соослы Мыным ваем курбонъёс пӧлысь люкетлы сётӥсько. Та быдӟым святыня, сьӧлык понна ваем курбон кадь ик, янгыш уж понна ваем курбон кадь ик. 18Ааронлэн выжыысьтыз вань пиосмуртъёс сое сиыны быгато. Та Кузё-Инмарлы ваем курбонъёс пӧлысь тӥляд выжыостылы пумтэм вапумъёс ӵожелы сётэм люкет. Ваньмыз со борды йӧтӥськем дун-чылкыт луоз”».
19Соку Кузё-Инмар Моисейлы тазьы вераз, тазьы шуиз: 20«Тани Ааронлэн но солэн пиосызлэн вӧйын зырӟыса пуктон нуналазы Кузё-Инмарлы ваем саламзы: ефа чабей пызьлэсь дасэтӥ люкетсэ ялан сётӥськись курбон сётыны кулэ, солэсь ӝыны люкетсэ – ӵукна, ӝыны люкетсэ – ӝыт; 21таба вылын вӧй пӧлын со пыжемын луыны кулэ; кызьы саламлы ваем нянез тӥяса люкыло, озьы ик тае но, вӧй пӧлын пыжемзэ, кусокен тӥялляса вай; Кузё-Инмар азьын ческыт зын поттонлы сое вай; 22Ааронлэн пиосыз пӧлысь солэн интыяз зырӟыса пуктэм священник тае быдэсъяны кулэ: та Кузё-Инмарлэн пумтэм вапумъёслы сётэм пуктон-косонэз. Со ваньмыз сутэмын луыны кулэ; 23священниклэн вань ваем салам нянез сутэмын луыны кулэ, сиыны кулэ ӧвӧл».
24Соку Кузё-Инмар Моисейлы тазьы вераз, тазьы шуиз: 25«Ааронлы но солэн пиосызлы шу: ”Тани сьӧлык понна курбон сётонлэн законэз: кытын тылын сутӥськись курбон пудоез вандо, со интыын ик сьӧлык понна сётӥськись курбон пудоез но Кузё-Инмар азьын вандыны кулэ; та быдӟым святыня; 26сьӧлык понна курбон сётӥсь священник сое сиыны кулэ; сое дун-чылкыт интыын, вӧсяськон скиниялэн азбараз, сиыны кулэ; 27мар гинэ солэн сӥль бордаз йӧтӥськиз, ваньмыз дун-чылкыт луоз, солэн вирыз дӥськут вылэ пазяськиз ке, пазяськем интызэ святой интыысен миськы; 28сюй горшокын со пӧзьтэмын вал ке, со горшокез пилёно; ыргон пуртыын пӧзьтэмын ке вал, соку та пуртыез сузяно, вуэн миськоно; 29священникъёслэн выжызы пӧлысь вань пиосмуртъёс сое сиыны быгато: та [Кузё-Инмар азьын] быдӟым святыня; 30нош сьӧлык понна курбон сётэм пудолэсь вирзэ вӧсяськон скинияе, вӧсяськон интыын сузяськон сямез ортчытыны пыртӥзы ке, соку со курбон пудолэсь сӥльзэ сиыны уг яра; сое тылын сутоно”».
Actualmente seleccionado:
Левит 6: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016