Левит 27
27
27-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Израиль пиослы тазьы вераса шу: кин тынад дунъетэдъя лулзэ Кузё-Инмар дорын ужаны сӥзьыса сётэ, 3кызь аресысен куатьтон аресозь вуэм пиосмурт тынад пуктэм дунъетэдъя витьтон азвесь сӥкль луыны кулэ, вӧсяськон скинияысь сӥкльлэн секталаеныз мертаса; 4кышномурт понна пуктэм дунъетэд куамын сӥкль луыны кулэ; 5вить аресысен кызь аресозь вуэм пиосмуртлы тынад дунъетэд кызь сӥкль луыны кулэ, нош кышномуртлы – дас сӥкль; 6нош одӥг толэзьысен вить аресозь вуэм пи понна тынад дунъетэд вить азвесь сӥкль мед луоз, нош таӵе арлыдъем ныл понна тынад дунъетэд куинь азвесь сӥкль мед луоз; 7куатьтон но солэсь бадӟымгес арлыдо пиосмурт понна тынад дунъетэд дас вить азвесь сӥкль мед луоз, нош кышномурт понна – дас сӥкль. 8Нош со куанер ке, тынад дунъетэдъя сётыны уг ке быгаты, соку сое священниклы мед возьматозы, священник сое мед дунъялоз: кыл сётӥсь муртлэн кӧня тырыны кужымез вань, сое лыдэ басьтыса, священник сое мед дунъялоз. 9Нош Кузё-Инмарлы сӥзем пудо курбонлы вайыны ярамон ке, мае сёто Кузё-Инмарлы, со ваньмыз дун-чылкыт луыны кулэ: 10сое вошъяны-берыкъяны кулэ ӧвӧл, ӟечсэ уродэныз воштоно ӧвӧл яке уродзэ ӟеченыз воштоно ӧвӧл; нош кин ке пудоез пудоен ик воштӥз ке, кыкез ик пудоез святыня луоз. 11Нош Кузё-Инмарлы сӥземез кырсь пудо ке, кудзэ Кузё-Инмарлы курбон уг сёто, соку со пудоез священниклы возьматыны ваёно, 12священник дунъялоз: умой-а, урод-а со; священниклэн сётэм дунъетэзъя луыны кулэ; 13кин ке сое берен, дун тырыса, басьтыны ӧдъя ке, тынад пуктэм дунъетэд вӧзы витетӥ люкетсэ эшшо мед ватсалоз на. 14Кин ке аслэсьтыз корказэ Кузё-Инмарлэн святой ваньбурез пӧлы сётэ ке, священник дунъет сётыны кулэ: ӟеч-а со, урод-а со, – кызьы священник дунъялоз, озьы ик луоз; 15сӥзиськем мурт аслэсьтыз корказэ берен басьтыны малпаз ке, тынад дунъям дуныд вӧзы вить люкет азвесь мед ватсалоз на, соку та солэн коркаез луоз. 16Аслаз бусыысьтыз аназэ кин ке но Кузё-Инмарлы сӥзиз ке, тон сое дунъя кизем юэз лыдэ басьтыса: одӥг хомер кизем йыды понна витьтон азвесь сӥкль тыроно; 17юбилей арысен кутскыса кин ке но бусызэ сӥзе ке, тынад дунъетэдъя ик сое берен басьтон дуныз мед луоз; 18юбилей ар бере кин аслэсьтыз бусызэ сӥзе, соку священник со понна тыроно азвесез, юбилей ар вуэмлэсь азьвыл аръёсты лыдэ басьтыса, лыдъяны кулэ, тынэсьтыд дунъям дундэ кулэстыны кулэ; 19сӥзиськем мурт бусызэ берен басьтыны малпаз ке, со тынад дунъям дуныд вӧзы витетӥ люкетсэ азвесь мед ватсалоз на, соку со музъем со кие кылёз. 20Нош со, дун тырыса, бусызэ берен ӧз ни ке басьты, со бусыез мукет муртлы вузазы ке, сое берен басьтыны уг ни луы: 21юбилей аре со бусы сое басьтӥсьлэн киулысьтыз кошкоз но Кузё-Инмарлэн святой ваньбурез луоз, кыл сётыса сӥзиськем мактал; священниклэн киулаз со сётэмын луоз. 22Нош кин ке но аслэсьтыззэ ӧвӧл, басьтэмзэ музъемез Кузё-Инмарлы сӥзиз ке, 23соку священник солэсь дунзэ, юбилей арозь кылем дырез лыдэ басьтыса, лыдъяны кулэ; кӧня тыр басьтэм бусыез дунъямын луиз, со дунэз со нуналэ ик та адями, Кузё-Инмарлы сётӥськись святой салам-кузьым та шуыса, сётыны кулэ; 24нош юбилей арын бусы музъемзэ вузам муртлэн кияз нош ик вуоз. 25Вань дунъёсыд вӧсяськон скинияысь сӥкльлэн секталаеныз мертаса сётэмын мед луозы, одӥг сӥкльын кызь гера луыны кулэ. 26Пудо пӧлысь нырысь вордскемъёссэ нокин но Кузё-Инмарлы медаз сӥзьы, малы ке шуоно нырысь вордскемъёс сӥзьытэк но Кузё-Инмарлы сётэмын луыны кулэ: ош-а со, сюро векчи пудо-а со, – соос Кузё-Инмарлэн. 27Нош нырысь вордскемез кырсь пудоос пӧлысь ке, соку кузёез сое, тынэсьтыд дунъям дундэ тырыса, аслыз басьтыны кулэ, со вӧзы витетӥ люкетсэ ватсаны кулэ на; кузёез сое, дун тырыса, аслыз ӧз ке басьты, соку сое тынад дунъям дуныдъя ик вузано. 28Нош кыл сётыса вань сӥзиськемъёсыз, адямилэн аслаз ваньбурез пӧлысь кыл сётон пыр сӥзиськыса Кузё-Инмарлы сётэмъёсыз, – адямиез-а, пудоез-а, аслэсьтыз бусызэ-а со сӥзиз, – сое вузаны уг яра, берен но басьтыны уг яра: кыл сётыса вань сӥзиськемъёс – со Кузё-Инмарлэн быдӟым святыняез; 29адямилэн кыл сётыса сӥзиськемъёсыз, дун тырыса, берен уг ни басьтӥсько – соос быдтэмын луыны кулэ. 30Музъемлэн поттэм вань емышезлэн дасэтӥ люкетэз, музъемысь кидысъёслэн но, писпуысь емышъёслэн но дасэтӥ люкетсы – со Кузё-Инмарлэн: со – Кузё-Инмарлэн святыняез; 31кин ке но аслэсьтыз дасэтӥ люкетсэ, дун тырыса, берен басьтыны мылкыд кариз ке, солэн дуныз вӧзы витетӥ люкетсэ мед ватсалоз на. 32Сюро таза пудо пӧлысь, сюро векчи пудо пӧлысь дасэтӥ люкетэз, ваньмыз, мар потэ пудоос лыдъяку пудо возьмасьлэн бодыез пыр, котькудзэ дасэтӥ пудоез Кузё-Инмарлы сӥзёно; 33копаськыса-эскерыса улоно ӧвӧл, ӟеч-а, урод-а со, вошъяны но сое кулэ ӧвӧл; кин ке но сое воштӥз ке, воштэм пудоез но, воштосэз но святыня луозы; дун тырыса, соосты берен басьтыны уг ни луы».
34Та Кузё-Инмарлэн Сӥнай гурезьысен Моисейлы сӥзьыса израиль пиослы сётэм курон-косонъёсыз.
Actualmente seleccionado:
Левит 27: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016