Лыдпусъёс 1
1
1-тӥ ЛЮКЕТ
1Египет музъемысь потэмзы бере кыкетӥ араз Кузё-Инмар Сӥнай луоё кыр дуннеысен, вӧсяськон скинияысен, кыкетӥ толэзьлэн нырысетӥ [нуналаз], Моисейлы тазьы шуиз: 2«Вань израиль калыкез выжыосынызы, семьяосынызы ӵош, нимын-нимын лыдъялэ, вань пиосмуртъёсты, одӥгзэс но кельтытэк, ваньзэс гожъялэ; 3кызь аресъемъёссэ но, солэсь бадӟымъёссэ но, Израильысь ожмаськыны ярамон муртъёсты, полкен-полкен соосты лыдъялэ – та ужез тон Ааронэн ӵош лэсьты; 4котькуд выжыысь одӥг мурт, аслаз улы-бечеезлэн кузёйырыз, тӥледын ӵош луыны кулэ. 5Тани тӥледын ӵош луоно пиосмуртъёслэн нимъёссы: Рувим выжыысь Шедеурлэн Елицур пиез; 6Симеон выжыысь Цуришаддайлэн Шелумиил пиез, 7Иуда выжыысь Аминадавлэн Наассон пиез; 8Иссахар выжыысь Цуарлэн Нафанаил пиез; 9Завулон выжыысь Хелонлэн Елиав пиез; 10Иосифлэн пиосыз пӧлысь: Ефремлэн выжыысьтыз Аммиудлэн Елишама пиез; Манассиялэн выжыысьтыз Педацурлэн Гамалиил пиез; 11Вениамин выжыысь Гидеонийлэн Авидан пиез; 12Дан выжыысь Аммишаддайлэн Ахиезер пиез; 13Асир выжыысь Охранлэн Пагиил пиез; 14Гад выжыысь Регуиллэн Елиасаф пиез; 15Неффалим выжыысь Енанлэн Ахира пиез. 16Таос луо калыклэн быръем воргоронъёсыз, атайёссылэн выжыысьтызы кивалтӥсь йыръёс, Израильысь сюрс муртъёсын кивалтӥсьёс».
17Моисеен Аарон та нимын-нимын вылӥ верам воргоронъёсты бордазы кутӥзы, 18кыкетӥ толэзьлэн нырысетӥ [нуналаз] соос вань калыкез огазе люказы но соосты выжыен-выжыен, семьяен-семьяен, кызь аресъем пиосмуртъёсты но солэсь бадӟымъёссэ, одӥгзэс но кельтытэк, ваньзэс нимын-нимын гожтӥзы, 19кызьы Кузё-Инмар Моисеез лэсьтыны косӥз. Калыкез лыдъян-ӵотанэз Моисей Сӥнай луоё кыр дуннеын ортчытӥз. 20Израильлэн нырысь вордскем Рувим пиезлэн пиосыз выжыосынызы, улы-бечеосынызы, семьяосынызы ӵош, одӥгзэс но кельтытэк, ваньзы нимын-нимын гожтэмын – вань пиосмуртъёс, кинъёслы кызь яке тросгес арес ини, кинъёс оже мыныны ярамонэсь вал. 21Рувимлэн выжыяз лыдъямын-ӵотамын ньыльдон куать сюрс вить сю мурт. 22Симеонлэн пиосыз выжыосынызы, улы-бечеосынызы, семьяосынызы ӵош, одӥгзэс но кельтытэк, вань пиосмуртъёс, кызь арес тырмемъёс но солэсь бадӟымъёсыз, оже мыныны ярамонъёс – ваньзы нимын-нимын гожтэмын, 23Симеонлэн выжыяз лыдъямын-ӵотамын витьтон укмыс сюрс куинь сю адями. 24Гадлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – ваньзы нимын-нимын гожтэмын, 25Гадлэн выжыяз лыдъямын-ӵотамын ньыльдон вить сюрс куать сю витьтон адями. 26Иудалэн пиосыз выжыосынызы, улы-бечеосынызы, семьяосынызы ӵош, нимын-нимын, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс, 27Иудалэн выжыяз лыдъямын-ӵотамын сизьымдон ньыль сюрс куать сю мурт. 28Иссахарлэн пиосыз выжыосынызы, улы-бечеосынызы, семьяосынызы, [одӥгзэс но кельтытэк – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – ваньзы нимын-нимын гожтэмын, 29Иссахарлэн выжыяз лыдъямын-ӵотамын витьтон ньыль сюрс ньыль сю адями. 30Завулонлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс, 31Завулонлэн выжыяз лыдъямын-ӵотамын витьтон сизьым сюрс ньыль сю адями. 32Иосифлэн Ефрем пиезлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын, 33Ефремлэн выжыяз лыдъямын-ӵотамын ньыльдон сюрс вить сю мурт. 34Манассиялэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс, 35Манассиялэн выжыяз лыдъямын-ӵотамын куамын кык сюрс кык сю адями. 36Вениаминлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс. 37Вениаминлэн выжыяз лыдъямын-ӵотамын куамын вить сюрс ньыль сю адями. 38Данлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы] нимын-нимын гожтэмын – [вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс, 39Данлэн выжыяз лыдъямын-ӵотамын куатьтон кык сюрс сизьым сю адями. 40Асирлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын, 41Асирлэн выжыяз лыдъямын-ӵотамын ньыльдон одӥг сюрс вить сю адями. 42Неффалимлэн пиосыз выжыосынызы, улы-бечеосынызы, семьяосынызы ӵош, [одӥгзэс но кельтытэк, ваньзы – вань пиосмуртъёс,] кинъёслы кызь арес тырмемын ни, солэсь но бадӟымъёсыз, оже мыныны ярамонъёс – нимын-нимын гожтэмын, 43Неффалимлэн выжыяз лыдъямын-ӵотамын витьтон куинь сюрс ньыль сю мурт. 44Тани та Моисеен Ааронлэн, Израильлэн кивалтӥсь йыръёсызлэн – дас кык адямилэн, котькуд выжыысь быдэн одӥг адями вал соос, – лыдъям-ӵотамзы пӧлы пыремъёс. 45Семьяен-семьяен израиль пиос, кинъёслы кызь арес тырмемын ни вал, солэсь но бадӟымъёсыз, Израильлэн ожмаськыны ярамон муртъёсыз, ваньзы лыдъян-ӵотан пӧлы пыризы, 46лыдъян-ӵотан пӧлы ваньмыз-ӧвӧлэз пыриз куать сю куинь сюрс вить сю витьтон мурт. 47Нош левитъёс атайёссылэн выжыенызы ӵош лыдъян-ӵотан пӧлы пыртэмын ӧй вал.
48Соку Кузё-Инмар Моисейлы тазьы вераз, тазьы шуиз: 49«Левитлэсь выжызэ гинэ лыдъян-ӵотан пӧлы эн пырты, израиль пиосын огазьын соосты эн лыдъялэ; 50сӥзён-косонэн скинияез но солэн пушкысьтыз, бордысьтыз вань арбериоссэ левитъёс кие сёт: скинияез но со пушкысь, со бордысь вань арбериосты соос мед нуллозы, скинияын вӧсяськонъёсты мед ортчытъялозы, со котыре станзэс мед пуктозы; 51скинияез мукет интые выжытоно луиз ке, левитъёс сое мед ӝутозы; нош скиниялы кытчы ке дугдоно луиз ке, левитъёс сое мед пуктозы; кин ке но левит луисьтэм мурт со борды йӧтӥськиз ке, виемын луоз. 52Вань израиль пиос котькудзы асьсэлэн станазы дугдыны кулэ, котькудӥз аслаз знамяез вӧзы, аслаз полкез пушкы интыяськыны кулэ; 53нош левитъёс станзэс интыяны кулэ сӥзён-косонэн скиния вӧзы, израиль калык вылэ вожпотон медаз усьы шуыса; левитъёс сӥзён-косонэн скиния дорын возьмаськыса сылозы». 54Израиль пиос тазьы лэсьтӥзы; кызьы Кузё-Инмар Моисей пыр косон сётӥз, озьы ик соос лэсьтӥзы.
Actualmente seleccionado:
Лыдпусъёс 1: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016