Левит 26
26
26-тӥ ЛЮКЕТ
1«Асьтэлы идолъёс, сульдэръёс эн лэсьтэ, асьтэ доры йыбыртъян юбоос эн пуктылэ, туспуктэм изъёсты но, соос азьын йыбыртъяны малпаса, асьтэ музъем вылэ эн пуктылэ, уго Мон тӥляд Инмарды Кузё-Инмар. 2Суббота нуналъёсме уте, вӧсяськон интыме сӥлы каре: Мон Кузё-Инмар. 3Мынам пуктон-косонъёсыя тӥ улӥды ке, курон-косонъёсме утиды ке, соосты быдэсъяды ке, 4ас дыраз Мон тӥледлы зор сёто, соку музъем будэм емышъёссэ сётоз, бусыысь писпуос емышсэс сётозы; 5ю кутсанды виноград октон дырозь кыстӥськоз, виноград октонды кизён дырозь кыстӥськоз, кӧтты тырымон нянь сиыса улоды, музъем вылады кышкатэк улоды. 6Музъем вылады тупаса улон лэзё, изьыны выдӥды ке, нокин но уз люкеты; сьӧсь пӧйшуръёсты музъем вылысьтыды улляло, меч музъемды пыр уз ортчы. 7Тушмонъёстэс уллялоды, меч улады соос погралозы. 8Тӥляд вить муртты сю муртэз уллялоз, сю муртты дас сюрс муртэз уллялоз; тӥляд азяды, меч улэ, тушмонъёсты погралозы. 9Шорады учко [но тӥледыз бакель каро], емыш сётӥсесь каро, йылэто тӥледыз, тӥледын сӥзён-косон пыр кылдытэм кусыпме юнматыса возё. 10Вужзэ, кылем ар сиёндэс сиёды, вылез вуэм понна вужзэ куштоды. 11Тӥ пӧлы улон юртме пукто, Мон тӥледыз синазькыль уг кары. 12Тӥ пӧлтӥ ветло, тӥляд Инмарды луо, нош тӥ Мынам калыке луоды. 13Мон тӥляд Инмарды Кузё-Инмар, Египет музъемын тӥ ляльчиос медад луэ шуыса, тӥледыз отысь поттӥсь, зӥбеттылэсь жильыоссэ пыргытӥ но, йырдэс вылэ ӝутытыса, тӥледыз отысь поттӥ. 14Нош Мынэсьтым верамме санэ ӧд ке понэ, вань та курон-косонъёсме ӧд ке быдэсъялэ, 15Мынэсьтым пуктон-косонъёсме кулэтэм кариды ке, Мынэсьтым законъёсме синазькыль кариды ке, Мынэсьтым сӥзён-косонме сӧрыса, вань курон-косонъёсме ӧд ке быдэсъялэ, 16соку Мон тӥледлы тазьы каро: тӥ доры шугадӟон лэзё – куасьмыса, пӧсекъяса висёнъёс – соосын сэрен синъёсты лябӟозы, лулды курадӟыса катьтэммоз; юнме гинэ кидысъёстэс кизёды, тушмонъёсты юдэс сиёзы. 17Тӥ шоры учки ке, соку тӥ тушмонъёсты азе усьылоды, тӥледыз адӟемпотостэм карисьёс тӥледын кузёяськыса улозы; нокин но тӥ сьӧры ӧз ке но уйиськы, бызьыса кошкоды. 18Эшшо озьы ке но Мынэсьтым веранме санэ ӧд ке понэ, соку Мон тӥледыз сьӧлыкъёсты понна сизьым пол золгес вӧсь каро. 19Вылтӥяськон вог сямдэс тӥяло, инбамдэс корт кадь каро, музъемдэс ыргон кадь каро. 20Кужымды юнме быроз, музъем вылады номыр но уз буды, музъем вылысьтыды писпуос емыш уз сётэ. 21Эшшо [та бере] но Мыным пумит мынӥды ке, Мынэсьтым верамме кылзэмды ӧз ке поты, соку Мон сьӧлыкъёсты понна тӥледыз эшшо сизьым полэс жугыто на: 22тӥ вылэ луд пӧйшуръёсты лэзё, соос тӥледыз нылпитэк кельтозы, пудоостэс быдтозы, тӥледыз кулэстозы, озьы сюресъёсты тырттэм кылёзы. 23Эшшо та бере но ӧд ке тупатске, Мыным пумит мынӥды ке, 24соку Мон но, [вожме поттыса], тӥледлы пумит карисько, сизьым полэс сьӧлыкъёсты понна тӥледыз вӧсь каро, 25сӥзён-косонме тӥямды понна пунэм берыктӥсь мечез тӥ вылэ лэзё; нош тӥ городъёсады ватӥськиды ке, соку тӥ вылэ сьӧдчер лэзё, соку тӥ тушмон киулэ сётэмын луоды; 26адямилы кынар сётӥсь нянез тӥ пӧлысь быдто; дас кышномуртъёс тӥлесьтыд няньдэс одӥг гурын пыжозы но няньдэс, весэн мертаса, сётъялозы; тӥ сиёды, нош кӧтты уз тыры. 27Эшшо та бере но Мынэсьтым верамме санэ ӧд ке понэ, Мыным пумит мынӥды ке, 28соку Мон но, вожме поттыса, тӥледлы пумит мыно но сьӧлыкъёсты понна тӥледыз сизьым полэс вӧсь каро, 29пиостылэсь мугорзэс сиёды, нылъёстылэсь мугорзэс сиёды; 30гурезь йыл вӧсяськонъёстэс таркало, йыбыртъян юбоостэс погыртыло; тӥлесьтыд шӧйёстэс пыргытъям сульдэръёсты-идолъёсты вылэ сэрпалляло, Мон тӥледыз синазькыль каро; 31городъёстэс тырттэм кельто, вӧсяськон интыостэс буш кельто, [курбон сётэмдылэсь] ческыт зынзэ уг зынъя; 32музъемдэс тырттэм кельто, со пумысен тушмонъёсты ик паймозы, со музъеме улыны интыяськизы ке. 33Мурт калыкъёс пӧлы тӥледыз пазьго, бӧрсяды мечме кыре потто, соку музъемды тырттэм кылёз, городъёсты куашкатэмын луозы. 34Соку, буш кыльыса вань улон нуналъёсаз, субботаосыз понна, музъем каньылэн улоз; тушмонъёстылэн музъемазы улон дыръяды музъем шутэтскоз, субботаосыз понна аслыз каньыллык басьтоз; 35со музъем вылын улон дыръяды субботаосы шутэтскытэк улэмез понна, музъем буш кыльыса улон дыръяз шутэтскоз. 36Тушмонъёссылэн музъем вылазы улэп кылем адямиостылэн сюлмазы возьдаськон-курдан пырто, куарлэн куалекъяса улэмысьтыз потӥсь куара соосты уллялоз, меч улысь пегӟись кадь бызьыса кошкозы, усьылозы, сьӧразы нокин но уг ке но уйиськы, 37мечлэсь кышкаса пегӟисьёс кадь огзы вылэ огзы канжаськыса усьылозы, соос сьӧры нокин но уйиськыса уг ке но мыны, тушмонъёстылы пумит султыны кужымды уз тырмы; 38мурт калыкъёс пӧлы кулыса быроды, тушмонъёстылэн музъемзы тӥледыз ньылоз; 39нош тӥляд улэп кылемъёсты законлы пумит улэмъёссы понна тушмонъёстылэн музъемъёсазы куасьмозы-шуялозы, атайёссылэн законлы пумит улэмъёссы понна но соос куасьмозы-шуялозы. 40Соку соос асьсэлэн законлы пумит улэмзы сярысь, атайёссылэн сьӧлыкъёссы сярысь ватытэк вералозы, вералозы, кызьы Мыным пумит йыружъёс лэсьтылӥзы, Мыным пумит мынӥзы, 41мар понна Мон но [йыркурен] соослы пумит мынӥ, соосты тушмонъёссылэн музъемазы пыртӥ; соку вог сюлэмзы тэрытсконо луоз, соку соос законлы пумит улэмзы понна шугадӟонъёс чидано луозы. 42Иаковен сӥзён-косон пыр кусып кылдытэмме, Исаакен сӥзён-косон пыр кусып кылдытэмме, Авраамен сӥзён-косон пыр кусып кылдытэмме Мон тодам ваё, музъем сётэмме тодам ваё; 43калык татысь кошкыса музъемез огназэ кельтэм бере аслаз субботаосыз понна музъем огназ кылиз ке, каньылэн улоз, нош калык законлы пумит улэмез понна – Мынэсьтым законъёсме кулэтэм каремез понна, Мынэсьтым пуктон-косонъёсме синазькыль каремез понна – секытлыкъёсты чидано луоз. 44Тушмонъёссылэн музъемазы улыкузы но, израиль пиосты быдтон калэ уг вутты, соосын сӥзён-косон пыр кылдытэм кусыпме уг быдты, соосты синазькыль карыса, кулэтэм карыса, Мон уг улы, уго Мон Кузё-Инмар, соослэн Инмарзы; 45соослы ӟеч карон понна тодам ваё вашкала выжыосынызы сӥзён-косон пыр кусып кылдытэмме, соосты уго Мон калыкъёслэн син азязы Египет музъемысь поттӥ соослы Инмар луон понна. Мон Кузё-Инмар».
46Тани пуктон-косонъёс, интыян-радъянъёс, законъёс, кудъёссэ Кузё-Инмар Сӥнай гурезьысен Моисей пыр Асэныз израиль пиос вискын тупатӥз.
Actualmente seleccionado:
Левит 26: УДМБИБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
(c) Библияез берыктонъя Институт, Хельсинки, 2013; 2016