Bilangan 15
15
At Allah ebaget pou wagalom wene
1At Allah en Musa mo’guleselat,
2“Is aphwami Israel a’ge wene mo’gulonto ano re, yuat o. An en o wogontoma eba is ’gwi louwarik, welat, 3An Allah nebaget wusogo e narlogulat, at Allah at wogeik o, oluk, ho’buk ’balogoat pogulat, o’go erlak a’ge weat woknogulat, seni soru oluk wene le’gelak a’ge ano a’ge pam onogola enagai en soruogoluk pogulat, asogo tuok oluk, nebaget pou wom holuk e, e’ben op a’ge hasulat nogola nagai haik en e, lembu sapi de a, kambing domba ya, pou wagalat, 4Gandum e’gen modok opsogo e’gen wokho 2 liter ’gela’ge wokho e zaitun a’bosu 1 liter ’gela’ge negarlok-hegarlok tak a’ge emin woluk an Allah nebaget pou waga lemak o.
5Ye, domba mesigat a’ge de nebaget wusogo e narlogwi a’ge de a, onogola enagai pam wusogo nebaget pou wagai a’ge de a, asogo togulat, no’gwi a’ge anggur a’bosu nebaget lukasogo woknum a’ge ano paget 1 liter emin woluk pou wagalat, 6-7Domba ierak a’ge pam nebaget wusogo woknogulat, gandum e’gen modok opsogo e’gen wokho 5 liter ’gela’ge wokho e zaitun a’bosu 1 liter o’borl pam a’ge ’gela’ge ne’garlok-he’garloktak poluk, no’gwi a’ge anggur a’bosu nebaget lu’gwerak pogulat poluk-poluk pou wom a’ge ano paget 1 liter o’borl pam a’ge ’gela’ge emin woluk, an Allah e’ben op a’ge hasulat, nede aganhan houwagoluk nebaget pou wagalat. 8Ye, at Allah at wogeik o, oluk, ho’buk ’balua a’ge ano hegitsogo an Allah nebaget pou wagai a, nemin hwedik weleik en e, an Allah nebaget wusogo woknogwi a’ge a, asogo togulat, sapi ierak a’ge mesik wusogo e narlogulat, togwi ebano ’gela’ge e narlu agalat de, enagaisogoat wusogo nebaget pou wagai ebano ’gela’ge de pou wagalat togwi holuk e, 9sapi ierak a’ge ano woluk wagalat, gandum e’gen modok opsogo e’gen wogo a’ge 5 liter o’borl pam ’gela’ge wokho e zaitun a’bosu 2 liter ’gela’ge emin ne’garlok-he’garloktak poluk, 10an Allah en e’ben op a’ge hasulat, nede aganhan houwak oluk no’gwi a’ge anggur a’bosu nebaget lukasogo herlelu a’ge paget 2 liter ’gela’ge emin an nebaget pou wagalat, togu lemak o.
11Sapi ierak a’ge de a, domba ierak a kambing a, domba a, an nebaget wusogo woknomul opogulat holuk e, ua a’ge ai ’gela’geat togu lemak o. 12Onuam meren ’gela’ge nebaget wusogo woknogulat, onuam mesigat ano pam e asogo nagat togu lemak o. 13Ye, an Allah is aphwami Israel onowirak a’ge hun-hundomok en nebaget wusogo e narlogulat holuk, e’ben op hasulat, nogola nagai houwak oluk, asogo nagat togu lemak o. 14Is ap ’bok a’ge de a, aphwami mu a’ge mesik de a. Is Israel a’ge ene’gerlakma eba enemin welagai a’ge ebano en an Allah e’ben op a’ge hasulat, nagai houwagoluk nebaget wusogo e narlogwi holuk e, is Israel a’ge en togwi ai ’gela’geat togu lemak o. Is Israel a’ge enemalik dagetil laga lema a’ge ene’gerlakma welat ogo re, hegitsogoat togu lemak o. 15-16#Ima. 24:22Asogo togulom ai re, is Israel odoktak a’ge emin, is ap ’bok a’ge ene’gerlakma oruak a’ge eba emin, an Allah en hegitsogoat nil entasumu re, wene disogo tip, asogo tip, mo’gulentasu legi a’ge yu emin, wene le’gelogo mo’gulentasu legi a’ge emin. Is Israel onowirak a’ge emin, ap ’bok a’ge ene’gerlakma oruak a’ge emin, wene mesigat a’ge yu nagat togu lemak o. Wene yu re, enemalik dagetil laga lema a’ge ebano ogo modok-modok hegitsogo nagat togu lemak, oluk, mo’gulentesi, oluk mo’gulontomup o,” oluk, mo’gulesi.
17Mo’gulesirik, at Allah en Musa mesik emin mo’guleselat, 18“Is aphwami Israel a’ge mo’gulonto ano re, yuat o. An en is o wogonoboluk enebei loma ebano ’gwi louwarik, 19yabuk takpoluk, e’gen ’balogo nouwogoluk, togulat, ado an Allah nebaget poatma re, 20gandum e’gen ikhasulat, naduk ikhasu a’ge an nebaget pogwi ’gela’ge, yabuk togup a’ge e’gen naduk ik houwa a’ge daganogo oroti emin orlogomsogo werakho poluk, an nebaget pou waga lemak o. 21Is emin, eneiyagai ene’balak dagetil laga lema a’ge ebano emin, gandum e’gen naduk daganak a’ge an Allah nebaget modok-modogat pou waga lemak o,” oluk mo’gulesi.
At iak ’belak a’ge eneperlak welat wiak takpoluk, togulom wene
22-23Mo’gulesirik, wene mesik mo’gulontouwak oluk, mo’guleselat, At Allah en wene, disogo tip, asogo tip, oluk, Musa mo’gulosokhwe, mo’gulentesi ano pam en ’bekhit eneiyagai ene’balak pobuk dagetil laga lema hwerli ’berlegat is logon en, wene yu sagalogo paik hwia oluk, opo erlakma en welat, togwi holuk, togulom a’ge re, yuat o. 24Aphwami Israel a’ge we yogunat oruakhwe, is logon en an niak ’belak a’ge eneperlak welat, wiak togwi holuk e, an Allah en e’ben op a’ge tang hasulat, nagai houwak oluk, is Israel a’ge ’berlegat en nebaget wusogo e narlu a’ge sapi ierak a’ge mesik wogwi, gandum agap e’gen wogo a’ge emin, a’bosu nasu a’ge emin, an nebaget herlelik nobo a’ge polik a’ge ano wogulat, ye, onowiak erlagapsogo pouwok oluk, nebaget wusogo woknoum a’ge kambing ierak a’ge mesik wogulat takpoluk nebaget pou wagai holuk. 25Enede ebet erlakma en, wiak togwi a’ge ano, erlagapsogo pouwagoluk, an nebaget wusogo e narlogulat togwi ano a’ge emin, onowiak erlagapsogo pouwagoluk, an nebaget woknoum a’ge emin, woluk wema a’ge is an nebe eiye a’ge en an nemin hwedik tuok oluk wam woluk wagaiam e, onowiak ano, erlagapsogo ukpaigat o. 26At mesik an niak ’belak a’ge ano eperlak welat, wiak tua a’ge ano pam en is aphwami Israel a’ge enemin, is ap ’bok ene’gerlakma welagai a’ge ebano emin enemin ’berlegat wiak enebam agoam e, onowiak erlagapsogo pouwagoluk, an nebaget pou wagaiam e, is ’berlegat onowiak erlagapsogo ukpaigat o.
27 #
Ima. 4:27-31
Ye, ap mesik en an niak ’belak a’ge ano eperlak welat wiak tiselat holuk e, o wiak erlagapsogo pou wagoluk kambing holou tahun mesik tak a’ge holuk, an Allah nebaget poumak o. 28Pou wago holuk, at eperlak welat wiak tua a’ge ano, o wiak erlagap poluk an emin hwedik weleik en e, domba woluk wema a’ge ano ap an nebe eiye a’ge en wam an Allah nil pam nebaget wusogo pasu holuk e, an en o wiak erlagapsogo paik o. 29Wene togulom ano re, is ap Israel onowirak a’ge emin, is ap ’bok Israel a’ge ene’gerlakma welagai a’ge ebano emin, an niak ’belak a’ge eneperlak welat, wiak togwi holuk, togulom a’ge wene tak a’ge ai, akhen-akhen erlak we wene an en egi a’ge aiat togu lemak o.
30Ye, is aphwami Israel onowirak a’ge emin is ap ’bok ene’gerlakma oruak a’ge emin, wiak tigat o, oluk, enede en eberak poluk togwi holuk nak e, at Allah ai miayat opoluk, wiak tagoma re, is onue enari ene’gerlakma en ena’guluak erlagapsogo pogu lemak o. 31Is ap ai re, an Allah mi-miarak nobogulat, disogo tip asogo tip, oluk niak ’belak a’ge sagalogo pogumu re, wiak togwi a’ge o’go is onomuat ena’guluak erlagapsogo pagathorlouwa ani o,” oluk, mo’gulesi.
Agauwa set hwalogo welagai ai a’ge pam en togwi holuk togulom wene
32Is Israel a’ge o leimu welat, hup nogo 6 nogoluk, hubet set hwal horlogwi a’ge agauwa ano a’ge pam ap mesik e kelil nosoma hwiaregisarik. 33Aphwami a’bik odoktak a’ge ebano emin, Musa Harun emin, ene’bek woluk wegesa. 34Woluk wotluk, e’gin ebam po a’ge ano wene owan ’belak erlak welat, ebe herle wusogo poluk oruakma, 35at Allah en Musa mo’guleselat, Ap ai, o sabo Allah owi werikmu en odipmu libotluk, waremagoluk, is aphwami Israel a’ge ’berlek en helep pam damuk-damuk woruak o. 36Oluk mo’gulesimu, at Allah en Musa mo’gulesi a’ge ano hegitsogoat is aphwami odoktak a’ge ebano ’berlegat en Allah owi sabo werikmu ebano en, woluk lip lail legesarik, waremak oluk, helep pam sogou-sagai sogo wusogo pegesa.
Onobogoyum am erledeng togulom wene
37At Allah en Musa mo’guleselat e,
38 #
Ula. 22:12
“Is aphwami Israel a’ge wene mo’gulonto ano re, yuat o. Is emin, eneiyagai ene’balak dak etil laga lema a’ge emin, herle il wibe’gen a’ge pam onosum petne erlil-erlalsogo ’belabil laga lemak o. 39Herle wibe’gen il tak a’ge pam onosum ologun o’gwe erlelik ano re, an Allah enat, disogo tip asogo tip oluk wene tak a’ge ano sagalogo poluk, ap mesik ugwe ukpoluk, yogunat til lasu ai ’gela’ge, is Israel a’ge enede en nasuam, motluk lagalat enil en hogulat holuk, til lagalat togulom ’gela’ge eberak modok welemagoluk erleligatma re, enil en ’gwelakhegeik togu lemak o. 40Enil ’gwelakhegeik togulat, an en, disogo tip asogo tip, oluk wene tak a’ge ano ebesogo opsogo til lagalat togwi holuk e, enaik Allah an nebaget modok degelak a’geat welema o. 41An en e, is enaik Allah weleik oluk, o Mesir en wogonoboluk liplau wegi a’ge an enaik Allah enat egi o, oluk mo’gulesi, oluk, mo’gulontomup o,” oluk mo’gulentesi.
Actualmente seleccionado:
Bilangan 15: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión