Bilangan 16
16
Is ap Korah, Datan, Abiram en enede dain egesa wene
1 #
Yud. 1:11
A’gul onuk Ruben a’ge at Eliab eiyagai Datan, Abiram, e’birek emin, Pelet omlogo On emin, is enebe henagan ai en a’gul onuk Lewi a’ge weiyelak Kehat omlogo Yizhar eba Korah emin enede dain egesarik, 2Musa sebelak pouwok, oluk epegesarik, is Israel a’ge en, nonowene ’balogu lemak o, oluk, onuelak edik enebegesa a’ge modok enaluk welagai a’ge enebe 250 ebano enemin egesarik, 3Musa Harun emin oruakma, ene’bek legesarik, wene yagontogulat, at Allah en is aphwami Israel a’ge ’berlegat enematek pulogo onoboluk, ene’gerlakma eneminat welagoma re, his no paget en at Allah eiyagai odoktak a’ge ebano sebelak onoboluk, nis nage elit, opogu legep? Yogodak heniak u erlakma en moat it o.
4Wene asogo ogwi a’ge ano Musa esa’go hwelegeitik, orogole sogup ’bou tegei. 5-7’Bou otluk, ap Korah is aphwami enemin odoktegisa a’ge ebano mo’gulentasulat, his Lewi a’ge yu, heniak u erlakma en moat ip o. At Allah en at eiyagai at ebaget pulogo pasu a’ge ebano at eragam horoksogo lo obatma re, at Allah en sa edikpesi a’ge e’bek lo obat a’ge re, sa hebarligen agoma hul ene pobi tuogoluk, o sono hubetsogo at Allah en hwiak nontouwama re, hat ap Korah emin, is ap a’bigat henemin wegep a’ge yema enemin, o loruk hubetsogo sogoluak odouk orlok togwi a’ge ano wokho odouk poluk, e’ben op a’ge ano o’borl pam pogu loroguptik, at Allah eragam lagaiam e, ap yuat pulogo edikpegi o, osoam e, ap aiat at Allah en pulogo edikpesi ai o, oluk opouwak o.
8Mo’gulentesirik, Musa en at Korah osi enemin wene mesik emin mo’gulentasulat, his ap Lewi a’ge yu, wene an mo’gulhentasu legi a’ge yu henesa’go opsogo hologu lemis o! 9At Allah owi sabo werikmu ebano yabuk togulat, is Israel a’ge enebaget togulom a’ge eiye welat, togu lorogup en e, is aphwami Israel a’ge ’berlegat oruakhweat de, Israel a’ge enaik Allah en his at pulogo edik honoboluk, at eragam wolom a’ge paget obat epasukhweat de ai re we mia opoluk en ogu legep a? 10His Lewi a’geatma re, at Allah en Lewi a’ge enemin hegitsogoat at eragam honobou wagama oruakhweat de, mi-miarak onoboluk o yogodak ogo is ap Allah eiye a’ge ede aganhan ai henebam oruak a’ge ebano delogo horlouwogoluk en togu legep a? 11Ap Harun ai, sa de oluk en at ebe henebit-henebat takpogu legep no? Ai at henebirap pogu legep erlak o. At e hat Korah emin, is hemin welegep a’ge yema emin, henede mesigarap poluk, at Allah heneminat ogorli tuogoluk, togu legep hegi o,
12asogo mo’gulentesirik, ap Eliab eiyagai Datan Abiram emin wemagoluk, worlentesimu re, “Nis lo nenebit o,” oluk, mo’gulogulat, 13“Gin a’bosu emin, agamu a’bosu emin, ik elaruk ’gela’ge horluk-horuk lebagoma o Mesir eba en woknonoboluk o leimu yemayat waremak oluk nonobou waga ai, mia epegen, yogodak e nonue at eik oluk en oso? 14Gin a’bosu emin, agamu a’bosu emin, ik elaruk ’gela’ge horluk-horluk libagoma eba nenebei loluk, neniabukmu anggur owi yoru a’ge emin, nono’gwiang emin, nis eiye emagoluk woknonoboluk nenebei lo erlak welat, is aphwami ai, enil wiak a’ge ’gela’ge tagenebaik oluk tagoma re, nis lul erlak o,” oluk egesa.
15Mo’gulegisema, at Musa ano olot het a’bigat agarik, at Allah mo’guleselat, an en is onuam keledai mesik-mesik wasulat, is en a’ge mesik wiagap pasulat, tu erlakhweat de, ogumu re, is en hat hebaget wusogo wokhogwi holuk e, wa’gun erlak o, naik.
16Mo’gulesirik, at Musa en Korah ano mo’guleselat, hat emin, Harun emin, is aphwami hemin welegep a’ge emin, ’berlegat loruk hopmu at Allah il pam ebaget po a’ge paget, 17is hemin wegep a’ge enebe hundomok odouk e’gen orlok togwi a’ge enebe hegitsogo 250 wogulat, ye, hat Harun ogo asogoat henebe elitsogo wogulat, takpoluk, ebale ano a’ge pam odouk e’gen orloksogo wik-wok e’ben op a’ge ebano o’borl pam pogu loroguptik, woluk sono hubetsogo at Allah il pam o sabo Allah owi werikmu ano pou manup o.
18Mo’gulentesimu, sono hubet o’gwe is aphwami ebano hundomok-han domok odouk e’gen orlok togwi a’ge ebale ebano wegesarik, odouk emin, e’ben op-op a’ge ebano emin, eba pegesarik, at Allah owi werik a’ge ’godukmu eriano, is Musa Harun emin inlai legesa. 19At Korah en is aphwami at emin Musa Harun emin enebit entegisa a’ge ebano ’berlegat odoktak poluk, at Allah emin hwedik togumu o sabo werik a’ge ’godukmu inegesa a’ge ebano eriano oruakhwe, at Allah atia modok e’bak-’bage sellim-wallim takpesimu is aphwami Israel odoktak a’ge ebano ’berlegat en enil hegesa. 20Enil hogukhwe, at Allah en Musa Harun emin mo’gulentasulat, 21Is aphwami henemin odoksogo welegep a’ge eba re, agauwa yogodak ya pamat erlagapsogo enebaikmu re, enemin wolom erlakma en ’geksogoat wolomup o. 22Oluk mo’gulentesimu at de, at Musa Harun emin en onorogole sogup ’bou otluk, Allah mo’gulogulat, nenaik Allah o. Aphwami enelaluk eiye welegen a’ge hat Allah atma re, ap mesigat wiak tegei pam en aphwami odoktak a’ge yu ’berlegat no’gosogo erlagapsogo enebagun o?
23Egesema, at Allah en Musa mo’guleselat, 24“Is aphwami odoktak a’ge ’berlek ai, at Korah emin, Datan emin, Abiram emin, onowi sobo werikmu eba wolom erlakma en dagansogo momu eba louwak oluk mo’gulentemin o.”
25Oluk mo’gulesimu, is aphwami Israel a’ge onuelak ebano Musa emin Datan Abiram emin oruakma, legesarik,
26At Musa en is aphwami a’bigat odoktak a’ge ebano mo’gulentasulat, is aphwami wiak togwi a’ge yu, is onowiak pam o’go wat enebiselat, heneminat mangno hontouwa no oluk, is en a’ge mesik tenho erlakma en welat, onowi sabo werikmu ebano ukpoluk, geksogo momu eba lit o.
27Mo’gulentesimu, is aphwami ebano at Korah emin, Datan emin, Abiram emin, onowi sabo werikmu ebano ukpoluk, legesema, at Datan Abiram emin. Onugwami emin, enemalik emin, malik wei a’ge emin, onowi saboma ano en libotluk, ’godukmu edikmu, 28At Musa en eselat, “An en taga legi ano re, an nomu nede opoluk taga legi erlak, at Allah enat tin o, osoam tago ano henaluk orogup en e, yogodak ya tu a’ge mo’gulhentaik o. 29Is aphwami yu, we aphwami waragai ’gela’geat waragai holuk nak e, at yu, at Allah en perakpou wom erlak, we omu ede opoluk, mo’gulnentasumu hege o, oluk, nebagup ani o. 30Ye, agauwa yogodak yu pam at Allah en tagokhwe mesik ho erlak a’ge tagalat, ’gwiang yu, emde ’gagalak poluk, is aphwami yema enemin, ena’ge-a’ge emin, ’berlek ebesigat is aphwami waregesarik oruakma enemin welemagoluk, enelaluk ’ga’goat emdema yagat enebiselat tago holuk nak e, is ap yu, at Allah mi-miarak pegesa a’ge ano pam en tagenebasumu hege o, oluk, henaluk ema o.”
31Oluk, wene owan mo’gulentasu oruakma, is aphwami oruakma erianoat ’gwiang emde la tagalat, 32is aphwami ebano, onogulani enemalik enemin, is aphwami Korah emin welagai a’ge emin, ena’ge-a’ge ’berlegat emin, ’berlegat ’gwiang en emdema yagat enebegei. 33Asogo tegei ano re, aphwami enebe emin, ena’ge-a’ge, emin ’berlegat, is aphwami naduk waregesa a’ge oruakma, enemin welemagoluk, enelaluk ’ga’go ’gwiang en emdema yagat enebegeitik, ’gwiang emde hele’gik pesi ano re, aiat o. Ai tegei ano is aphwami Israel odoktak a’ge ene’gerlakma en ena’guluak erlak egesa. 34Ye, is aphwami Israel a’ge eba enemin welagai a’ge ebano en ngai ogwi a’ge enesa’go hwelegisarik, “Nis ogo ’gwiang en emdema yagat nenebisoma no,” oluk, hweiye libegesa.
35Hweiye libagaihwe, at Allah en is aphwami enebe 250 e’ben op-op a’ge e narlogwi a’ge ebano agauwa mesik erligeat-agauwa ai pam odouk magale pam wioksogo erlagap pesi o.
E narlogumu ebale hele’gik wene
36Asogo tegeitik, at Allah en, Musa mo’guleselat,
37“Sogoluak odouk e’gen orlok togwi a’ge hele’gik a’ge ai, modok degelak a’ge asua atma re, is e ne’gei a’ge odouk e’gen oruak a’ge ai, ap an nebe eiye a’ge Harun omlogo Eleazar en orlok taga lemarik, horoksogo eba pasumu no oluk, walekma hwikhai louwak o. 38Hwikhai louwarik, an en takpegi a’ge is aphwami Israel a’ge enaluk aga lemagoluk, is ap wiak tegisa a’ge o’go enebe erlagap pagathwerlegesarik, so’goluak odouk e’gen orlok togwi a’ge pou wegesema oruak a’ge ai, an nilemat e’ben op-op a’ge an nebaget pou wagaiam e, degelogo pegimu re, sagalogo ebagap poluk, nebaget pou wagaimu ebano orlomusogo pou wagoluk mo’gulomup o.” 39-40Is ap Harun eiyagai e’balak dagetil laga lema a’ge ebano a’ge re, erlak we aphwami we a’ge en e’ben op-op a’ge at Allah il pam e narlikpou wagaiam e, is ap Korah osilak enemin wat enebegei ’gela’ge tagonobouwa no oluk, is Israel a’ge enaluksogo eberogu lemagoluk, at Allah en Musa mo’gulesi a’ge ano hegitsogo ap Allah eiye a’ge Eleazar ano en sogoluak odouk e’gen orlok togwi a’ge tembaga a’ge pam hele’gik a’ge is e ne’gesa a’ge ebano en woluk wegesa a’ge ebano odoktak poluk, sagalogo ebagap poluk Allah ebaget pou wagai a’ge ano pam lo’boktak pesi.
Harun en aphwami Israel a’ge enagap delegei wene
41Hubet o’gwe is aphwami Israel a’ge ’berlegat, at Musa Harun emin en at Allah eiyagai a’geat de, wusogo enebegesa a’ge his no! oluk, enebit-enebit tagonoboluk, 42odoktak poluk, Musa Harun emin wene yagontogulat, Allah emin hwedik togumu owi sabo werikmu ebano onorogole edenogo yethogwiam e, o a’gurlok ano o sabo werik a’ge ano pam sobo so’bu agalat, at Allah amolit yebek hasukhwe enil hegesa. 43Hegesarik, at Musa Harun emin eriano pungtak toluk Allah emin hwedik togumu owi sabo werikmu eragam eriano legesema, 44At Allah en Musa mo’guleselat,
45“An en is aphwami odoktak a’ge ai, agauwa mesik erligeat erlagapsogo enebasu legi yuatma re, is welagaimu eba en ukpolugat lit o,” oluk, mo’gulentesimu, Musa Harun emin en Allah erlik tegisa.
46Asogo erlik tegisarik, at Musa en Harun mo’guleselat, “At Allah olot het odouk magale dalobuk lasu ’gela’ge olot het agarik, aphwami Israel a’ge e’gin-pe’gin enebam paigoluk tisoma, odouk e’gen orlok tago a’ge ebale ano hat en waguntik, odouk e’gen odouk mu’gwalogumu en orlok takpoluk, e’ben op a’ge ebano o’borl pam poluk, is Allah emin hwedik tuagoluk, wam wusogo perleneat ti lak o,” oluk, 47mo’gulesimu, at Harun ano Musa en mo’gulesi a’ge hegitsogoat woluk pungtak is aphwami Israel odoktak a’ge ene’gerlakma lagarik, e’gin-pe’gin a’ge ano arat enebam pasukhwe, Allah emin hwedik tuagoluk. Wam wusogo e’ben op a’ge ano e narlegei. 48At Harun ano aphwami waregesa a’ge emin, enelaluk a’ge emin, ene’gerlakma edik welat, e narlik pesi a’ge ano pam e’gin-pe’gin ano ai hwerliat erlagap pesi. 49Ye, at ap Korah emin waregesa a’ge ebano re, ene’gik wenak onobu erlak o. Is aphwami e’gin enebamsogo wat egesa a’ge ebano nak enebe wonogo re, 14.700 aiat o. 50Ye, e’gin-pe’gin ano hwerliat pasuam e, at Musa ano Allah emin hwedik togumu o sabo werikmu ano ’godukmu oruakma Harun ano e’bek laga.
Actualmente seleccionado:
Bilangan 16: Wul
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión