Mitengo 25
25
Gukhozela Bhahali-Peyori ni gukhathala ga Fineya
1Avbo va na Israyeli va nga bani va vbahide tigoni ga Sitimi,#25:1 Sitimi khu gupwani «acácia», gidhoropana gi ranwago mambe malanga pwani Abheli Sitimi, mapanini ya Mowabhi, vbafuvbi ni tsongo wa Joridhani. Va na Israyeli na va gu wona Litigo nya Gisambanyo va nga vbweta gu bela umo, va di vbweta gu velegelana va tala, khavbo avbo va di tutumela guya khozela vanungungulu nya livelego va tidwago pwani Vabhahali. Khigyo gi nga va gira va ghoha khu guhambana ni Nungungulu wawe. vathu va di bhaya ni vanyamahegyane va na Mowabhi. 2Avo va di ndrindredzela vathu umo nya miphaso ya vanungungulu vawe; khu guralo, vathu va na Israyeli va di hodza dzimhamba dzodzo, va wuya va khidzimela vanungungulu vawe, va va girela miphaso. 3Va na Israyeli va diya dzi tshanganisa ni Bhahali-Peyori, khu guralo Pfhumu Nungungulu a di wugela va na Israyeli.
4Khavbo avbo, Pfhumu Nungungulu a di embela Mosi, khuye: “Tombanisa vathangeli vatshavbo nya vathu va na Israyeli, u va tshwedzisa mbeli ga Pfhumu Nungungulu, mulihanini, vafa na va gu wonwa khu vatshavbo va na Israyeli, mwendro saye Pfhumu Nungungulu a na bosa likhulo laye.”
5Khavbo avbo, Mosi a di embela valamuli va Israyeli, khuye: Muthu ni muthu a na songe vathu vaye va nga dzi tshanganisago ni Bhahali-Peyori.
6Khu guralo, gu dita moyo nya sanana sa Israyeli, a resa ga vandriyaye nyamayi moyo nya Mumedhiyani, na gu wonwa khu Mosi gumogo ni tshangano watshavbo wa va na Israyeli, avbo tshangano watshavbo wu nga bani wu gu lila vbamwanyatunu nya Tshatsha nya Tshangano. 7Khu guralo, Fineya, mwamana wa Eleyazari, mwamana wa muphasi nya mhamba Aroni, na mu wone a di khuga vbatshanganotunu, a dzega litshari laye, 8a di landra mwama yoyu tshatshani gwaye aya va paya va vavili gumogo khu vbagirumbutunu, Muisrayeli ni nyamayi wule. Khu guralo, wu di vbela tungu vbakari ga va na Israyeli. 9Vathu va fudego khu tungu wowo va diri tengo nya magumavili na mana magumi mazana (24.000).
10Khu guralo, Pfhumu Nungungulu a di ganela ga Mosi, khuye: 11“Fineya mwamana wa Eleyazari, mwamana wa muphasi nya mhamba Aroni, ndreyiside hwindzo likhulo langu ga va na Israyeli, kholu a simamide gu yeyedza githawo avbo gwangu vbakari gwawe; khu guralo, kha nya mbembisa va na Israyeli khu likhulo langu. 12Khu guralo, u na mu embela, khuwe: Nyi ngu gira naye gidzumeledzwano nya gurule. 13Gi na khala avbo gwaye; ni ga situgulwana saye, gidzumeledzwano nya wuphasi nya mhamba kala gupindruga, kholu simamide gu yeyedza githawo ga Nungungulu waye, a girela gutsetseledwa nya sighoho sa na Israyeli.”
14Lina la Muisrayeli yoyu a nga songwago ni nyamayi nya Mumedhiyani a diri uye Zimiri, mwamana wa Salu, muthangeli nya lihundzu la na Simiyoni. 15Lina la nyamayi nya Mumedhiyani yoyu a songidwego, a diri uye Kosibi, nyamahegyane wa Suri, muthangeli nya lihundzu la na Medhiyani.
16 Pfhumu Nungungulu a di engedza a embela Mosi, khuye: 17“Dhumelani Vamedhiyani mu va mbembisa; 18Kholu avo va mu sengedzede khu mano yawe, kha nga olu va mu kanganyisidego khu mahungu ya Peyori ni ya Kosibi, nyamahegyane wa muthangeli wa Vamedhiyani, uye a songidwego khu litshigu lile nya tungu, owu wu manegidego khu kotani ya Peyori.”
Actualmente seleccionado:
Mitengo 25: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.