Mitengo 24
24
Bhalahama a ngu kategisa Israyeli nyondro nya wuraru
1Bhalahama khu gu wona gukhuye Pfhumu Nungungulu, a ngu salalegiswa khu gu kategisa Israyeli, kha nga vbweta gambe guya wudzisa kha nga dzimbe dzinyondro, aholu a di thendregedza khovbe yaye a khedzisa giwulani. 2Bhalahama, a di khusa maho a wona va na Israyeli na va ghovide khu dzinyangwa dzawe. Khavbo avbo, Liphuvbo la Nungungulu li di tshiga vbatshani gwaye. 3A di ganela wuprofeti waye, khuye:
Magana ga Bhalahama, mwamana wa Bheyori,
magana ya muthu nya guwone misihalo;
4magana ya uye a yingisago mahungu
ya Nungungulu,
ya oyu a wonago Nungungulu nya Tshivba Yatshavbo,#24:4 Nya Tshivba Yatshavbo: Khu Gihebheru gupwani Shaddayi.
uye a dzi nogisago,
aholu na ma tulegide maho yaye.
5Idzo yi mburidego khidzo mitshatsha
yago, uwe Jakobe,
ni wulanga u khalago, uwe Israyeli!
6Ya gu anama kha nga mikova,
kha nga lithembwe nya senge vbafuvbi
ni tsongo!
Pfhumu Nungungulu a si yade kha
nga misimbo nya gihengebulo,
kha nga sedhari vbafuvbi ni mati nya gutale!
7Khu sifefeni gwawe gu na khulunga
mati,
ni wulime wawe wu na naganiswa khu mati
nya gutale.
Mufumeli wawe a na khusega guvbindra Agagi,
ni mufumo waye wu na bani wuri ni tshivba.
8Nungungulu duside Israyeli khu Egipito, a mu ningide tshivba nya gufanane ni nyari, Uye a na vbedza mayigo ya valala vaye,
a na pandrelela marambo yawe
a va hekha khu sighalala sawe.
9Uye varamide a vandramela kha
nga nghala nya matune,
a godza nghala nya ngadzi.#24:9 Vambe, khavo: A gu lala a hefemula kha nga nghala nya mathune, kha nga likhamba, khu mani a na tiyelago gu mu wusa?” Wona gambe: Gen 49:9; 12.3.
Khu mani a na gu mu tiyelago? Va na kategiswe avo va gu kategisago,
va vadwa avo va gu valago.
10Khavbo avbo, Bhalaki a di khondra khu likhulo a wugela Bhalahama, a phuphuta mandza; Bhalaki a di embela Bhalahama, khuye: “Eni nyi gu ranede guta vala valala vangu; aholu olu uwe u va kategiside guraru! 11Gasi olu, bwelela gaya gwago. Eni nyi di gu tumbiside gukheni nyi na gu ninga wuzundzo nya wukhongolo; aholu Pfhumu Nungungulu a gu himbedzede gu mana wuzundzo wowo.”
12Bhalahama a di phindrula Bhalaki, khuye: “Ina kha nya embela myango yago u nga yi rumelago gwangu, kheni:” 13Ambari nari gupwani Bhalaki a gu nyi ninga nyumba yaye na yi tade khu parata ni ndralama, eni kha nyi dzi kodzi gu hambanisa guruma ga Pfhumu Nungungulu, gasi gu gira nya sadi mwendro gu gira nyamba sadi, khu gugola gwangu. Iso Pfhumu Nungungulu a nyi embelago khiso basi nyi na gu ganelago. 14Olu nyi ngu bwelela tigoni gwangu; aholu delu nyita gu embela iso si na girwago khu vathu vava omu tigoni gwago khu matshigu ma nga gutago.
Wuprofeti wa Bhalahama. Nyeledzi ya Jakobe
15Bhalahama a di gira wuprofeti waye, a ganela, khuye:
Magana ya Bhalahama, mwamana wa Bheyori,
magana ya muthu nya gowone misihalo;
16magana ya muthu a yingisago mahungu
ya Nungungulu, oyu a gu pimago guti gwa Uye a Khusegidego Ngudzu, uye a wonago Nungungulu nya Tshivba
Yatshavbo, uye a dzi nogisago aholu na ma tulegide maho yaye.
17Eni nyi ngu mu wona, aholu khandri olu, nyi na mu khedza, aholu nasiri khu vbafuvbi;
gu na duga nyeledzi khavbo ga Jakobe ni ndronga nya wufumu khavbo ga Israyeli. Yi na khungumula mihungo ya va na Mowabhi,
yi mbembisa sanana satshavbo sa Seti.
18Edhomi a na fumedwa khuye,
ambari nala waye Seyiri, a na fumedwa
khuye,
Israyeli a na yeyedza tshivba yaye.
19Khu ga Jakobe gu na duga mufumeli,
a na mbembisa avo vatshadego madhoropani.
20Avbo Bhalahama a nga wonago Amaleki
a di mu profeta, khuye:
“Amaleki khuye nya guphele ga mayigo yatshavbo.
Aholu khu mahegiso a na mbembiswa.”
21Avbo Bhalahama a nga wonago Vakheni,
a di ganela wuprofeti waye, khuye:
Nyumba yago yi tiyide,
ni gihaga gyago gi vbahidwe musiwindrini!
22Aholu gihaga gyogyo gi na vbiswa,
Asuri a na gu vbagela a gu yisa
wugumbitunu.
23Bhalahama a di engedza a lola, khuye:
Libango ga uye a na tshalago,
gikhati Nungungulu a na girago esi!
24Valala va nata khu mataro khu Kitimi;
va nata khozisa Asuri,
va mbembisa gambe Ebheri;
aholu avo navo va na mbembiswa.
25Khavbo avbo, Bhalahama a di khuga a bwelela tigoni gwaye, Bhalaki nuye a bwelela khu yaye ndzila.
Actualmente seleccionado:
Mitengo 24: BGG2014
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Gitonga DC Bible © Bible Society in Mozambique, 2014.