GALATIA 1
1
Aroo
1:1-5
1Ro Paulus, manwawan oso, mboi snar ro snonkakuḇa, ma ro snonkaku osoḇa kako, mboi ro Yesus Kristus ma Allah, Kmaya, ḇeḇawes i kwar rofandu ḇemarsya, 2ma aya kuker naek ḇerowus ayasya kam, faro jemaat-jemaat ro Galatia:
3Saswar-fakamaman ma aski ḇeramaker Allah, Kma koḇedi, ḇerama ro Yesus Kristus.
4Ḇeḇuk mankundi kwar ḇefarsarser snar sasar koḇena, insa fyasparko ro ḇarḇor supswan ine imnis Allah ma Kma koḇedi marisen ḇyedi. 5Sanandik mufaḇe Allah rawo isof fyoro-fyoro! Amin.
Ankankinem Ḇeḇye oser monda
1:6-10
6Yakandor, snar mkowai dokor fasaw bur Allah, ro saswar-fakamaman Yesus ḇeyor mko kwar, ma mkoso ankankinem ḇeḇye oso ḇese, 7Ankankinem Ḇeḇye ḇekakuḇa. Snar snonkaku ono sisya sfarkor ninyan mko ma skara fasoḇo siwararye Ankankinem Ḇeḇye ro Kristus. 8Ḇape iḇye nko roḇaido malaikat oso ro boiyaswa ḇeḇaryas Ankankinem Ḇeḇye oso ḇese bur Ankankakinem Ḇeḇye nkoḇaryas faro mko, nari ḇyeḇefras kada. 9Imnis nkokofen ḇepon kwar, baboine yakofen ḇeoser wer: rofyor snonkaku sisya sḇaryas Ankankinem Ḇeḇye oso ḇese bur, rosai mkosma kwar, nari ḇyeḇefras kada.
10Inja knikine rariso: yasewar snonkaku marisen sena roḇaido yasewar Allah marisen ḇyenake? Yasewar fayun snonkaku sisnesna insa simarisen aya kaker? Rofyor yamarisen yasewar fayun snonkaku sisnesna insa simarisen maro aya, rarirya ido ayaine Kristus manfamyan ḇyedi sayaḇa.
Paulus ḇye manwawan rariso
1:11-24
11Rarirya yaḇuk farkarkor faro naek ayesi mko, mboi Ankankinem Ḇeḇye yaḇukfarkor ani Ankankinem Ḇeḇye ro snonkaku riryaḇa. 12Snar yasma i ro snonkakuḇa, ma snonkakusi ḇefarkor i maḇe ayasyaḇa, mboi yasma i kuker fasasna ro Yesus Kristus.
13 #
Kis. 8:3, 22:4-5, 26:9-11 Snar mkomnaf ḇepon kwar kankenem ayedi ro agama Yahudi: Yafrur kandera Allah jemaat ḇyena kuker pakakrek kaku ma yasewar fayakakok na. 14#Kis. 22:3Ma rofyor ayaisya ro agama Yahudi ayaiso ḇero ḇarpon syadi ro min ḇeḇor ayesi ḇemnis kuker aya rofandu er ayedi, imnis snonkaku ḇemyaren ḇefaduru rari up ayesi.
15 #
Kis. 9:3-6, 22:6-10, 26:13-18 Ḇape rofafisu Allah, ḇekimfir aya randak ro yaḇe ḇeyaḇen ḇaimya ma dor aya kuker saswar-fakamaman ḇyedi, 16imarisen fyasna Rumkun ḇyedi maḇe aya, insa yaḇaryas i rofandu er-er ḇese ḇeḇe Yahudiḇa, rarirya fafisu oso ḇaḇeri fayor kakara ro snonkaku; 17ma yara ḇe Yerusalemḇa kako fayasrow naek ḇeḇe manwawan ḇepon kwar ro aya, ḇape yara ḇesup Arab raimnai yakaḇer wer ḇe Damsyik. 18#Kis. 9:26-30Raimnai, wampasi wambarek rikior posa, yara ḇe Yerusalem fa yarakaki Kefas, ma yeḇeryar ro rum ḇyedi ḇeras samfur seser ririm. 19Ḇape yamam manwawan ḇese ansi oso ḇaḇeri, derer Manseren Yesus naek ḇyedi Yakobus.
20Ro Allah ḇarpon ḇyedi yakofenbos: roi yafas faro mko nane nkaku rarirya, yasrerḇa.
21Ḇarpurya yara ḇesupya fyor Siria ma Kilikia. 22Ḇape jemaat-jemaat ro Yudea smamḇaḇir aya ḇaim. 23Sikada srower monda, iso ḇeponiwara ḇefrur kandera si, knikine ḇyaryas kakyar saiso, imarisen kyakok ani. 24Ma sisandik Allah snar aya.
Actualmente seleccionado:
GALATIA 1: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión