2 KORINTUS 13
13
Ananun ḇepupes
13:1-10
1 #
Ul. 17:6, 19:15 Ine rarwan ḇeḇekior nari yarakaki naek srar wer. Sfas ro Refo radine, “Wawos (parakara) oso kyaku rofyor kosma saksi risuru roba kior.” 2Snonkaku ḇefrur sasar ro ḇepon iwara kwar ma snonkaku ḇesesya kam, yaḇuk swarepen ḇepon farosi kwar rofafisu yarakaki naek srar ro rarwan ḇeḇesuruya. Insape, rofafisu yaḇinkwan ro naek srar, yaḇuk swarepen wer insa rofyor yaramufa wer, snonkaku oso ḇaḇeri rosi nari ikfisḇa ro samamyaiya. 3Nari naek srar mkosma fasasna kaku ḇeri Kristus dawawos kuker sḇayo ayedi. Rofyor Kristus fyasna papoik ḇyedi faro mko, papoik ḇyedi syambraḇ kaku, rarirya fyasna papoik ḇyedi rofandu naek srar. 4Mboi rofafisu ḇyeḇepai ro aprop, syambraḇ ḇa, ḇape snar Allah papoik ḇyedi baboine ikenem. Nko kako nkosambraḇ ḇa, snar nko ḇeoser kuker Kristus ro kankenemya, ḇape rofyor nkoisya ro ḇarpon mkoḇedi, nko kako nkosambraḇ fnoḇek Kristus snar Allah papoik ḇyedi.
5Indo naek srar mkomnasenbir mankun mko ma mkokukeḇ kaku ḇeri naek srar mkoisya mkokenem imnis kankarem kakyar mkoḇena faro Kristus! Nari naek srar mkofawi mboi Yesus Kristus isya ro fandu mko! – mboi rofyor naek srar kakyar mkoḇena nkakuḇari. 6Yakyar naek srar mkofawi nkoine nkodworen kaku ro manasnasenya. 7Nkonadi mufaḇe Allah insa imarisen ifnoḇek naek srar famkofrur sasar awer. Mboi nkofasnaḇa nkoine nkofawi nkofrur posa fararur nkoḇena, ḇape insa naek srar mkofawi Allah rosai imarisen na – imnis raris nkoḇefromo, ḇape roi osoḇa! 8Snar nari nkofrur roi osoḇaḇeri ḇemnisḇa ḇesampum Allah marisen ḇyena; nkokada nkoso Allah marisen ḇyena. 9Nkoryaḇ rofyor nkosambraḇ ḇa, mboi naek srar mkosambraḇ. Nkonadi warek naek srar insa mkokenem mnis. 10Eḇedari yafas syap ine ḇepon rofyor aya isya ḇaim rofandu naek srar mko. Rarirya, rofyor yarafa kwar, nari yafasna pakakrek faro mkoḇa kuker papoik Manseren ḇyukma ḇeaya. Papoik ani ḇyeḇeḇuk fa nkoḇuki ḇyawes naek srar mko, mboi nkoḇuki kyakokḇa.
Aroo
13:11-13
11Ḇarpurya, naek srar, iḇye mkoryaḇ, ma mkoḇesewar mkokenem mnis. Mko kram farkarkor ḇeḇor ayena. Iḇye naek srar mkoḇe sne oser ma mkokenem kuker aski. Allah ḇesaswar syadi ma ḇeḇeknam aski ani nari ryowus naek srar mko.
12Mkokofen arooyae ma faḇyee imnis naek srar Kristen.
Allah kawasa ḇyesi kam sfarem aroo mufa ḇenaek srar.
13Manseren Yesus Kristus ḇyeḇok naek srar, ma Allah iswar naek srar. Iḇye Allah Rur ḇyedi ryowus naek srar mko kam kada!
Ro nu, Paulus ma Timotius
Actualmente seleccionado:
2 KORINTUS 13: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión