2 KORINTUS 3
3
Manfamyan-manfamyan ro asas ḇeḇaḇoya
3:1-18
1Inja roi ḇeradine fyasna imnis nkosandik mankun nko werke? Roḇa nkofandun syap sanandik faro naek srar mko, roḇawer sanandik ro naek srar mko raris snonkaku ḇesesya sḇefandun raya? 2Syap sanandik nkoḇedi isoine naek srar mankundaw, ḇefas ro nkosnesna ma snonkaku oser-oser iwasya ma ifawi. 3#Kel. 24:12; Yer. 31:33; Yeh. 11:19, 36:26Mankunsi smam mboi naek srar mkomnis Kristus syap fyas, ma fyarem fankune. Syap ani ḇyeḇefas kuker fara esḇa, ḇape kuker Allah Rur ḇyedi ḇekenemya; ḇyeḇefas ro karufasḇa kako, mboi ro snonkaku sisnesna.
4Nkokofen rarirya snar kakyar nkoḇena faro Allah snar Kristus. 5Roi oso isya ro nko ḇaḇeri ḇefrur fa nkomsik fankofrur fararur ine, ḇape Allah i ḇeḇuk masasik ani maḇe nko. 6#Yer. 31:31Iso ḇefrur fankomsik ma nkoḇe manfamyan faro asas ḇebabo oso; asas ḇeḇeknam ro Allah Rur ḇyedi, mboi ro sasoser-sasoser ḇefasḇa. Snar sasoser ḇefasna nari nbuk raro, mboi Allah Rur ḇyedi kada ḇyuk kankenem.
7 #
Kel. 34:29
Rofyor asas nari ḇeḇuk raroya ḇyeḇefrur ma ḇyeḇepaikir ro karui, Allah baba ḇyena nasnai kuker sanapnaper. Sananai ani isnaperbos kaku isof kawasa Israel simku fa smam Moses ḇarpon ḇyediḇa, rofyor sananai ani ipromes fawawasya. Inja rofyor asas nari ḇeḇuk raro ani ḇyeḇefrur ma ḇyeḇeseḇen kuker sanapnaper ḇeba kaku, 8rarirya fararur asas Allah Rur ḇyedi ḇyukya, ḇyeḇeseḇen kuker sanapnaper ḇesyadibos kaku ḇeri wer. 9Rofyor ḇakḇuk asas ḇeḇuk samamyai faro snonkaku isnaper kaku, rarirya ḇakḇuk asas ḇeḇuk faro snonkaku iḇye kaḇer kuker Allah isnaperbos kaku wer. 10Nari kokofen mboi rosai ḇesnaper ro ḇepon iwara, isnaper werḇa kwar snar sanapnaper ḇero baboine. 11Rofyor roi ḇekain kawanba oso isnaper, rarirya roi ḇekain fyoroya nari isnaper syadi wer.
12Snar nkona kakyar imnis ine, eḇedari nkawos masasik rarirya. 13#Kel. 34:33Nkomnis raris Mosesḇa, ḇerup ḇarpon ḇyedi kuker mar ḇerup insa kawasa Israel smam awer Manseren sananai ḇyedi ḇeḇe ḇepromes fawasbur ḇarpon ḇyedi. 14Swaruser sena neḇerup kwar. Ma isof ro ras ine kako kakara sena neḇerup kaker kuker mar ḇerup rofafisu siwasya syap-syap ro asas ḇekwar ani. Mar ḇerup ani ḇyeḇeḇas monda rofyor snonkakusya sḇeoser kuker Kristus. 15Baboine kako, rofyor siwasya Moses syap ḇyena, mar ḇerup ani isya ryup kaker kakara sena. 16Ḇape rofyor snonkaku oso kyaḇer wer faro Allah, mar ḇerup ani kako ḇyeḇekanow bur ḇarpon ḇyedi. 17Inja, Manseren kokara rodine isoine Rurya. Ma romoḇsai Manseren Rur ḇyedi isya roya moḇ ani ḇaḇemkeya isya kako. 18Ḇarpon koḇena kam neḇerupḇa kuker mar ḇerup. Komnis fanin smam faswef kuker sanapnaper ro Manseren Yesus. Rarirya koḇe ḇefadwer pdef fakomnis i; faḇaḇye muma kosnaper syadi snar sanapnaper ḇerama ro Rur, Manseren koḇedi.
Actualmente seleccionado:
2 KORINTUS 3: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión