2 KORINTUS 2
2
1Iso eḇedari yakara namuk kwar fayarakaki mufa ḇemkoḇa kuker saraurow ḇefrur fafardun mkosnem na. 2Snar rofyor yafrur fafardun mkosnemna, mansei wer nari ḇeḇuk sneprei ḇeaya, imbude snonkaku ansi onoḇa ḇoi mkoiso yafrur fasne ḇefafardunya? 3Iso eḇedari yafas syap ine mufaḇe naek srar mko. Yamewer yarakaki mko, insa rakaki ayedi ifrur fafardun awer aya, snar mko snonkaku ḇeḇuk raryaḇ maḇe aya. Snar yakyar yasma raryaḇ, rarirya naek mkosma raryaḇ kako. 4Yafas mufa ḇemko kuker sne ḇefafardun ma ḇemarḇak ma kuker mkarui ḇeḇor ḇefarsyersyer. Snar ro kakara yedi insa naek mkofafardunḇa, mboi insa naek mkofawi yaswar kaku ḇeri mko kam.
Ḇaḇe payasyos faro ḇesasarsya
2:5-11
5Rofyor snonkaku ono sifrur roi ḇefrur fafardun nanekam kwar, ifrurna maro ayaḇa, mboi naborke roḇa ma naborḇa – insa yapakrek faroi awer – ifrur rarirya faro naek srar mko kam. 6Faro snonkaku ḇerariryasya, samamyai kawasa ḇeborsya ssḇuk faroi imnis kwar. 7Inja naek buk payasyos faroi ma wadifi wer insa fafardun ḇyedi myarḇak mankenem awer. 8Inja yor, insa mkofasna wer faroi mboi kaku ḇeri mkoswari. 9Yafas syap ine mufa ḇemko fa yaḇukmnasen sas rosai mkomarisen mkoso ḇesya kwar ro fasasna ayena. 10Rofyor mkoḇuk payasyos faro snonkaku ḇefrur sasar faro mko rarirya aya kako yakpyos sasar ro snonkaku ani. Snar rosai yapyos kwar – rofyor roi ḇeḇefandun kaku ono naisya faneḇepyos – inja roḇarpon Kristus yaḇuk payasyos faḇei snar naek srar mko. 11Yafrur rarirya insa Ibiris dun awer fafisu faḇyuki duf mko; snar kofawi aw ḇyenaḇa.
Paulus araryof ḇyena ro Troas
2:12-17
12 #
Kis. 20:1
Rofyor yarama ro Troas kuker kakara ma yaḇaryas Ankankinem Ḇeḇye ro Kristus, Manseren ḇyas kwar nyan maḇe aya insa yafararur ro moḇ ani. 13Ḇape yaknonba snar yasrow Titus naek koḇani ro diaḇa. Inja yor snonkaku ḇena ro diasyaḇo yaraḇe Makedonia.
14Ḇape kasumasa mufaḇe Allah, snar fyarkin ko ḇesya kwar fakoso yakyaker ḇaḇefainda Kristus. Allah nyako insa ḇararyas ḇekur Kristus imnis mani spum ḇediref ḇeryer ḇemoḇ nakam. 15-16Snar koine komnis mani spum mamboḇo ḇediref, Kristus ikun ro Allah ḇarpon ḇyedi. Faro snonkaku ḇeraḇe raro, koine komnis dadiref raro ḇemamun; ḇape faro snonkaku nari ḇesma koreri, komnis dadiref mani spum ḇeyun ḇekankenem. Inja, manseiso nari ḇefrur mnis fararur ine? 17Nkomnis raris snonkaku ḇese ḇefrur Allah wos ḇyediḇe roi ḇefarḇyan mondaḇa. Kakara nkoḇena nasren, snar Allah i ḇeḇuk fararur inema ḇenko. Ma Allah mankundi myam mboi nkoḇaryas wos ani imnis manfamyan Kristus.
Actualmente seleccionado:
2 KORINTUS 2: LAIBHW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión