BILANGAN 35
35
Angka kota ni halak Levi
1Di tano na hornop na di Moab, donok tu Batang aek Jordan paadop-adop dohot kota Jeriko, didok Tuhan ma tu si Musa, 2“Pabolkas ma tu bangso Israel, bahaso tano pusako na nijagit ni halahi i, sanga piga kota dohot padang ruput na humaliangna, angkon lehenon ni halahi tu halak Levi, anso maringanan halak Levi i disi. 3Gabe siteanon ni halak Levi ma angka kota i baen inganan ni halahi. Padang ruput humaliangna i ma panjampalan ni pahan-pahanan ni halahi dohot binatang-binatang na asing. 4Bidang ni padang-padang ruput i 450 meter humaliang disuhat sian tembok ni kota i. 5Jadi luat ni halak Levi marrupahon opat sogi, gabe 900 meter ganop topina jana kota di tonga-tonga. 6Tu halak Levi i angkon lehenonmunu onom kota haporusan gabe inganan haporusan ni angka halak na so marsangajo mamunu jolma. Asing sian i angkon lehenonmunu dope tu halak Levi opat pulu dua nari kota, 7dohot padang ruputna. Jadi sude opat pulu salapan ma kota ni halak Levi. 8Bahat ni kota ni halak Levi di ganop luat di Marga Israel angkon ditontuhon mangihutkon godang dohot menek ni ganop luat i.”
Angka kota haporusan
(Pang. 19:1-13; Jos. 20:1-9)
9Disuru Tuhan ma si Musa, 10pabolkaskon tu halak Israel angka hata on, “Dung ditaripari hamu Batang aek Jordan jana dimasuhi hamu tano Kanaan 11angkon tontuhononmunu kota haporusan, anso tarbaen angka halak na so marsangajo mamunu jolma, marlojong tusi. 12Di angka kota na songon i aman halahi, malua sian hosom ni sisolkot ni na tarbunu i. Angke halak na hona tuhas mamunu jolma, nada tola uhumon mate i taran so dipareso parkarona di pangadilan. 13Tontuhon ma onom kota: 14tolu di Habincaran ni Batang aek Jordan, tolu nari di tano Kanaan. 15Gabe kota haporusan ma i di halak Israel dohot di halak na leban na rap dohot hamu santongkin sanga manongtong pe. Sanga ise na mamunu halak na asing na so disangajo, tola do maporus tu angka kota i.
16-18Tapi muda adong sada halak na mamake sinjata bosi, sanga batu sanga hayu pe mamunu halak na asing, madung sala halakna i hara ni na mamunu, ia pe angkon mate uhumon. 19Koum sisolkot ni na tarbunu i, palalu uhuman mate. Muda padumpang ia dohot si pamunu i, dibunu ia ma i.
20Muda magigi sahalak tu na asing, lalu dibunu ia diumban, sanga didanggurkon ia sanga aha tu halak i, 21sanga pe ditenju ia, sala do halakna i hara ni na mamunu, jadi halak i pe angkon niuhum mate. Sisolkot na dumonok tu na nibunu i do mambaen uhuman mate i. Muda marsuo ia dohot na mamunu i, dibunu ia ma i.
22Tapi umpamana, sahalak na so marsangajo mamunu halak na asing na so dihagigihon ia, marhite na mangumban sanga pe na mandanggurkon sanga aha tusia. 23Sanga umpamana sada halak na so pola mangaligi, didabu ia batu na mambaen pola mate halak na asing na so musunia jana nada adong muse maksudnia pasusahon halakna i. 24Di bagasan parkaro na songon i angkon rapot godang do na mandabu uhum tu na mambaen mate i, nada sisolkot ni na mate i na giot mambaloskon. 25Halak na mamunu na so disangajo i, angkon ondingan ni halak na bahat do i sian pamaloson ni sisolkot ni na mate i. Angkon obanon ma halahi mulak tu kota haporusan, inganan haporusannia. Tinggal ma ia disi lopus mate malim godang na di kota i. 26Tapi sugari ma ditinggalkon ia kota haporusannia i, 27hape marsuo dohot sisolkot ni na mate tarbununia i, gabe dibunu ma ia, nada na mamunu ia i. 28Jadi angkon tinggal ia disi lopus mate Malim Godang di kota i, dung i pe anso tola ia mulak. 29Angka paraturan on mangonai do tu hamu, tu pomparanmunu, sanga di dia hamu maringanan.
30Di bagasan parkaro na mamunu, halak na asing, anso tarsalahon ia jana anso tola diuhum mate, angkon adong dua halak sanga lobi manyaksihon i. Hum sahalak saksi nada tuk manyaksihon sanga na tutu na nituhaskon i.
31Sahalak pamunu angkon mate uhuman. Nada tola tobusonnia uhuman i dohot hepeng. 32Muda maporus ma sahalak tu kota haporusan nada tola jagitonmunu hepeng sian ia anso tola ia mulak tu bagasnia taran so mate Malim Godang. 33Muda dibaen hamu songon i, hamu do mangaramuni tano na niingananmunu i. Pamunuon mangaramuni luat, jadi nada adong pangalaho na asing laho paias luat i lobi sian na mambuat hosa ni sipamunu i. 34Ulang ramuni hamu tano na niingananmunu, angke Au do Debata, jana Au maringanan di tonga-tonga ni bangso Israel.”
Actualmente seleccionado:
BILANGAN 35: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society