BILANGAN 34
34
Angka parbalohan ni luat i
1Dilehen Tuhan dope tu si Musa 2angka parenta on tu halak Israel, “Santongkin nari masuk ma hamu tu tano Kanaan, luat na giot lehenonKu gabe tano siteanonmunu. Songon on ma parbalohan ni luat i. 3Balok di Selatan marginjang sian Halongonan Zin manopi-nopi parbalohan dohot Edom. Di sabola Habincaran gurat ni parbalohan i mamungka sian ujung ni Selatan ni Laut Mate, 4lalu mangeldok tu Selatan adop Dalan Akrabim, dung i torus tu Zin lalu tu Kades-Barnea sabola Selatan. Sian i mangeldok tu Barat Laut lalu tu Hasar Adar torus tu Asmon. 5Mangeldok ma parbalohan i disi tu rura parbalohan dohot Mesir, marujung di Laut Tonga.
6Laut Tonga do parbalohan ni luatmunu sabola sian Hasundutan.
7Gurat parbalohan di Utara mamungka sian topi Laut Tonga manuju tu Dolok Hor 8sian i tu Dalan Hamat torus tu Zedad 9dohot tu Zifron jana marujung di Hasar Enan.
10Gurat parbalohan di Habincaran, mamungka sian Hasar Enan tu Sefam. 11Sian i torus tu Ribla di Habincaran ni Ain lalu tu angka tor sabola Habincaran topi ni Laut Galilea, 12torus tu Selatan saginjang ni Batang aek Jordan lalu tu Laut Mate.
Songon i ma gurat parbalohan na opat i di luatmu.”
13Dung i didok si Musa ma tu bangso Israel, “On ma tano sijagitonmunu marhite undi, tano na niparentahon ni Tuhan i angkon bagi-bagion tu sambilan satonga marga ni Israel. 14Marga Ruben dohot Gad dohot satonga sian Marga Manase madung dijagit halahi bagian ni halahi jana madung dibagi tano i tu marsasaompu. 15Tano ni halahi, i ma di Habincaran ni Batang aek Jordan paipar-ipar dohot Jeriko.”
Angka pamimpin na disuru mambagi tano i
16Didok Tuhan ma tu si Musa, 17“Angkon Malim Eleasar do dohot si Josua anak ni si Nun na mambagi tano i di tonga-tongamunu. 18Laing todo muse ma sahalak sian ganop marga na gabe pamimpin mangurupi si Eleasar dohot si Josua mambagi-bagihon tano i.” 19-28Angka on ma halak na dung dipili Tuhan:
| MARGA | PAMIMPINNA |
|---|---|
| Juda | si Kaleb anak ni si Jefunne |
| Simeon | si Samuel anak ni si Amihud |
| Benyamin | si Eledad anak ni si Kislon |
| Dan | si Buki anak ni si Jogli |
| Manase | si Heniel anak ni si Efod |
| Efraim | si Kemuel anak ni si Siftan |
| Zebulon | si Elisafan anak ni si Parnak |
| Isakar | si Paltial anak ni si Asan |
| Aser | si Ahihud anak ni si Selomi |
| Naftali | si Padael anak ni si Amihud |
29On ma na nisuru ni Tuhan laho mambagihon tano pusako di tano Kanaan di halak Israel.
Actualmente seleccionado:
BILANGAN 34: LAIAKB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Indonesian Bible Society