KULAVA 6
6
Luximbi lwavaNajili
1Kaha Yehova ahanjikile kuli Mose ngwenyi,
2Hanjika kuli vana vaIsalele uvambulile ngwove, Cipwe lunga cipwe pwevo, kaci nge mwaxika kuxika cimwe cakuliyila, kuxika kupwa #6.2 Ou wakulihandwila kuli Yehova.Najili, nakulihandunwina kuli Yehova,
3akalihandunune kuvinyo nakuwala wausasu. Kanda akanwa vinyo vingangaminako, cipwe wala wausasu ungangamina. Kanda akanwa mwemwe wamihako yavinyoko, cipwe kulya mihako yavinyo yituta, cipwe yaumu.
4Makumbi akulihandununa cenyi osena kanda akalya cakumuvinyoko, cipwe mikoswa, cipwe viyau.
5Makumbi akuxika cenyi cakulihandununa osena, poko yayembe kanda yikahita kumutwe wenyiko, palanga nomu nawatamo makumbi kana akulihandunwina kuli Yehova. Apwenga wajila. Jikambu jakumutwe wenyi akajiseze jikasuhwe tuhu.
6Makumbi osenaze mwalihandunwina kuli Yehova kanda akapandama kumujimba wamufuko.
7Kanda akalipihisa hali iseko, cipwe hali naye, cipwe hali ndumbwenyi walunga, cipwe hali ndumbwenyi wapwevo, omu navafwa, mwomwo kulihandunwina cenyi kuli Yehova cili hamutwe wenyi, xikaho.
8Najilila Yehova hamakumbi akulihandununa cenyi osena.
9Kaci nge mutu mwafwa cakukasumuka kwakamwihi nenyi, kaci nge mwalipihisa mutwe wakulihandununa cenyi, akatewule kumutwe wenyi napoko yayembe halikumbi lyakumutomesa. Akatewule halikumbi lyamucitanu naavali.
10Halikumbi lyamucitanu naatatu akanehe tutela vavali, cipwe vana vamayembe vavali, kuli kapilixitu, kucikolo cambalaka yakuliwanyina.
11Kapilixitu akahane umwe kupwa wana wahaxili, namukwavo kupwa wana wakulumba, nakumulingila cakufwika xili, mwomwo avulumunanga hamufu. Akajilike mutwe wenyi halikumbi lize.
12Makumbi akulihandununa cenyi akawahandunwine kuli Yehova. Akanehe mwanamukoko wacizamba wamwaka umwe kupwa wana wahakuhingika. Oloze makumbi aze akulivanga nawaholoka tuhu, mwomwo kulihandununa cenyi capihyanga, xikaho.
13Elu lukiko luximbi lwaNajili, omu nawatamo makumbi akulihandununa cenyi. Vakamunehe kucikolo cambalaka yakuliwanyina.
14Kaha akanehe wana wenyi kuli Yehova, mwanamukoko wacizamba wamwaka umwe wakuzeneka katenga, kupwa wana wakulumba, namwanamukoko wacipwevo wamwaka umwe wakuzeneka katenga, kupwa wana wahaxili, namukoko wacizamba wakuzeneka katenga kupwa mawana akulweza keke,
15namutonga wajimbolo jakuzeneka cimbalwila, jimbolo jawunga wakusalulula vanahingunwina lyehi maji, najimbolo jakuzeneka cimbalwila jakuwavisa maji jajilelu, nawana wajo wakulya namawanajo akuhingununa.
16Kapilixitu akavipandamise kuli Yehova, akahane wana wenyi wahaxili, nawana wenyi wakulumba.
17Akahane nawa mukoko wacizamba uze kupwa cimuna wakuvatula wamawana akulweza keke kuli Yehova, nauze mutonga wajimbolo jakuzeneka cimbalwila. Kapilixitu akahane wana wawo wakulya nawa nawana wawo wakuhingununa.
18Uze Najili akatewule kumutwe wakulihandununa cenyi kucikolo cambalaka yakuliwanyina, akambate jikambu jakumutwe wakulihandununa cenyi akajihake hakakahya kali muxi yacimuna wakuvatula wamawana akulweza keke.
19Kapilixitu akambate livoko lyayauze mukoko wacizamba lyakuteleka, nambolo yakuzeneka cimbalwila yimwe kumutonga, nambolo yakuzeneka cimbalwila yayilelu yimwe, akavihake hamavoko aNajili, omu mwamanyisa kutewula kumutwe wakulihandununa cenyi.
20Kaha kapilixitu akavihungise kupwa wana wakuhungisa kumeso aYehova. Vikiko vyajila vyakapilixitu, napambo lyakuhungisa nalihinji lyakuzundula hamwe. Hakukumisa vyumevi, kaha uze Najili himwanwa vinyo.
21Elu lukiko luximbi lwaNajili uze mwaxika, lwamawanenyi mwahana kuli Yehova hakulihandununa cenyi, akuhakilako kuvyuma vize mwahasa kuwana. Nge mwaya kuxika cenyi mwaxika, ngoco mumwakalinga mwaya luximbi lwakulihandununa cenyi.
Kukisula cavapilixitu
22Yehova ahanjikile kuli Mose ngwenyi,
23Hanjika kuli Alone nakuli vana venyi ngwove, Ngoco munamukisula vana vaIsalele. Muvamba ngwenu,
24Yehova amiwahisenga, amilamenga.
25Yehova amimunyikenga meso enyi, amitetelenga.
26Yehova andulenga meso enyi amitale, amihanenga kuunda.
27Ngoco vahake lijina lyami hali vana vaIsalele, kaha nanguvawahisa.
Actualmente seleccionado:
KULAVA 6: LUE70
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Luvale Bible © Bible Society of Zambia, 1970.