JINGKHEIÑ 11
11
U Trai u kular ban ai doh ïa ki Israel
1Te kita ki briew, ki la long kum kiba ïakren khñium ba pynsngewsih ha ki shkor ki jong U Trai: te U Trai u la ïohsngew ïa kata, bad ka jingbitar jong u ka la meh lep; te ka ding ka jong U Trai, ka la wiang hapdeng jong ki, bad ka la thang duh ïa ka rmiang ka jaka shong dara. 2Kita ki briew te, ki la kyang jam ha u Moses; bad haba u Moses u la duwai ha U Trai, ïa ka ding la pynlip noh. 3Te u la khot kyrteng ïa kata ka jaka “ka Taberah”: naba kata ka ding jong U Trai ka la ing hapdeng jong ki.
4 #
1 Kor. 10:6. Te uta u paidbah baïakhleh uba don hapdeng jong ki, u la kwah kangar eh ïa ka doh: ki khun Israel ruh ki la ïaphai pat, bad ki la ïam pat, bad ki la ïapan, “Uei ban ai doh ïa ngi ban bam? 5Ngi ïakynmaw ïa ki dohkha ba ngi la ju bam ei ha ka ri Ijipt, ïa ki sohkhia, bad ïa ki sohkhia pdang, bad ïa ki jhur lik, bad ïa ki piat, bad ïa ki rynsun: 6hynrei mynta, ki mynsiem jong ngi ki tyrkhong noh; ba ym don ei ei ruh em, tang kane ka manna ha khmat jong ngi.”
7 #
Eks. 16:31. Te kata ka manna, ka la long syriem kum ki symbai musla koriander, bad ka rong jong ka kum ka rong Bdellium. 8Kita ki briew ruh, ki la ju leit kylleng kylleng, bad ki la ju ïalum ïa ka, bad ki la ju tylliat ïa ka ha ki mawtylliat, lane ki la ju dung ïa ka ha ki thlong, bad ki la ju shet ha ki pliang, ïa ka ban thaw kpu da ka: te haba mad ïa ka, ka la long kumba mad ïa ka umphniang bathymmai. 9#Eks. 16:13-15.Te haba ka umjer ka la hap halor ka jaka shong dara mynmiet, kata ka manna, ka ju hap halor jong ka ruh.
10U Moses te, u la ïohsngew ïa kita ki briew ba ki da ïaïam ha la i kur i kur baroh, uwei pa uwei u briew ha la ka jingkhang ka ïingjaiñ: bad ka jingbitar U Trai ka la meh lep eh shikatdei; u Moses ruh u la sngewsih. 11U Moses te u la ong ha U Trai, “Balei ba me la pynjynjar ïa la u shakri? Balei ruh ba ngam shym la shem ka jingisynei ha khmat jong me, ba me la buh ïa ka jingkit jong kine ki briew baroh halor jong nga? 12Long ma nga ba la pun ïa kine ki briew baroh? Long ma nga ba la pynkha ïa ki, ba me ong ha nga, ‘To bah kynthup ïa ki ha la ka shadem, kumba u kpa uba ri khun, u kynthup ïa i khunlung iba dang buiñ, sha kata ka ri ïa kaba me la kular da ka jingsmai ha ki kpa jong ki?’ 13Nangno ma nga ngan ïoh doh, ban ai ha kine ki briew baroh? Namar ki ïam ha nga, ki da ong, ‘To ai doh ha ngi ïa ka ban bam.’ 14Marwei ngam lah ban bah ïa kine ki briew baroh, naba ka kham khia eh ïa nga. 15Te lada me leh bad nga kumne, lada nga la shem ka jingisynei ha khmat jong me, nga kyrpad, to shu pynïap noh ïa nga, ba ngan ym ïohi ïa ka jynjar jong nga.”
16U Trai te u la ong ha u Moses, “To lum lang ha nga ïa ki hynñiewphew ngut na ki tymmen basan ki Israel, ïa kiba me tip hi ba ki long ki tymmen basan jong u paidlang, bad ki rangbah halor jong ki: to wallam ruh ïa ki ha Ka Tabernakl ka jingïaseng, ba kin ïaïeng hangta lem bad me. 17Naba ngan wan hiar, bad ngan kren ha me hangta: bad ngan shim na kata ka mynsiem kaba don ha me, bad ngan buh ïa ka ha ki: kumta kin ïabah lem bad me, ïa ka jingkit jong kine ki briew, ba men ym bah marwei ïa ka. 18Namar kata, men ong ha u paidbah, ‘To phin pynkhuid ïa lade hamar lashai, te phin ïoh bam doh: namar phi la ïam lynñiar ha ki shkor U Trai, phi da ong, “Uei u ban ai doh ïa ngi ban bam? naba ngi la long suk ha ka ri Ijipt”: namar kata, U Trai un ai doh ïa phi, bad phin ïoh bam ruh. 19Te phin ïabam ym tang shi sngi, lymne ar sngi, lymne san sngi, lymne shiphew sngi, lymne tang arphew sngi ruh; 20hynrei, baroh ki sngi shi bnai, ha ban da ka mih noh na ki thliew khmut jong phi, bad ba phi sngewjli ïa ka: namar ba phi la ñiewbeiñ ïa U Trai uba don hapdeng jong phi, bad ba phi la ïam lynñiar ha khmat jong u, phi da ong, “Balei ba ngi la wan mih noh na ka ri Ijipt?” ’ ” 21U Moses te u la ong, “Kine ki briew, ba nga don hapdeng jong ki, ki long hynriewspah hajar ki rangbah; me te me la ong, ‘Ngan ai doh ïa ki, ban bam baroh ki sngi shi bnai.’ 22Yn pynïap noh ne em ïa kita ki kynhun ki langbrot, bad ki masi ha ki, ba kin kdang? Yn ïalum lang ne em ïa ki dohkha ka duriaw baroh ha ki, ïa ka ban pynkdang ïa ki?” 23Te U Trai u la ong ha u Moses, “La pynlyngkot ne em ïa ka kti jong U Trai? mynta men ïohi ïa ka ktien jong nga kan jia long ha me ne em.”
Ki tymmen basan ki ïathuhlypa
24U Moses te u la mih shabar, bad u la ïathuh ïa kita ki ktien ki jong U Trai ha kita ki briew: bad u la lum lang ïa kita ki hynñiewphew ngut ki tymmen basan jong kita briew, u la buh ruh ïa ki baroh sawdong Ka Tabernakl. 25U Trai te u la wan hiar ha uta u lyoh, bad u la kren ha u, bad u la shim na kata ka mynsiem kaba la don ha u, bad u la ai ha kita ki hynñiewphew ngut ki tymmen basan: te haba kata ka mynsiem ka la shong sah halor jong ki, ki la ïathuhlypa, ki la wai noh ruh.
26Hynrei, ar ngut na kine ki briew, ki la sah ha kaba shong dara, ka kyrteng uwei ka la long “u Eldad”, bad ka kyrteng uta uwei pat, “u Medad”: te kata ka mynsiem ka la shong sah halor jong ki: namar ki la long na kita ïa kiba la thoh, hynrei, kim shym la leit mih noh sha Ka Tabernakl: pleng ki la ïathuhlypa ha kata ka jaka shong dara. 27Te uwei u samla u la phet, u la ïathuh ruh ha u Moses, bad u la ong, “U Eldad bad u Medad ki ïathuhlypa keiñ ha kata ka jaka shong dara.” 28Bad u Joshua u khun u Nun, u shakri u Moses, uwei na ki samla jong u, u la ïathuh u la ong ruh, “Ko Moses kynrad jong nga, to khang ïa ki.” 29U Moses te u la ong ha u, “Me sngewpihuiñ na ka bynta jong nga? A ban da ki briew baroh ki jong U Trai kin long ki nongïathuhlypa, bad ba U Trai un buh ïa U Mynsiem jong u halor jong ki!” 30Bad u Moses u la leit noh sha kata ka jaka shong dara, ma u, bad kita ki tymmen basan ki Israel.
U Trai u phah ïa ki 'iar khiar
31Te ka lyer na U Trai, ka la mih noh, bad ka la wallam ïa ki 'iar khiar na ka duriaw, ka la pynhap ruh ïa ki, hajan kata ka jaka shong dara, kumba shi sngi lynti sha kawei ka liang, bad shi sngi lynti sha kawei pat ka liang, baroh sawdong kata ka jaka shong dara, te ki la dap kumba ar pruh nalor ka khyndew. 32Uta u paidbah te, u la mih noh baroh shi sngi ha kata ka sngi, bad baroh kata ka miet, bad baroh shi sngi lashai ruh, bad ki la ïalum ïa kita ki 'iar khiar: te uta uba la lum kham khyndiat eh ruh, u la lum shiphew homer: bad ki la thad ïa ki ïa lade hi baroh sawdong kata ka jaka shong dara. 33Te katba kata ka doh ka shu dang don hapdeng ki bniat jong ki, bad haba ym pat shym la ktha ïa ka, ka jingbitar U Trai ka la meh lep pyrshah ïa kita ki briew, bad U Trai u la shoh ïa kita ki briew da ka jingïapthem kaba jur eh. 34#1 Kor. 10:6.Bad u la khot kyrteng ïa kata ka jaka “Kibroth-hattaabah”: naba la tep hangta ïa kita ki briew kiba la kwah kangar ïa ka doh. 35Na Kibroth-hattaabah, ki briew ki la leit mih noh haduh Haseroth; bad ki la shong ha Haseroth.
Actualmente seleccionado:
JINGKHEIÑ 11: KHB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
The Bible Society of India