LEBITIKOS 25
25
Ka snem Sabbaton bad ka snem jubili
1U Trai u la kren ruh ha u Moses, ha u lum Sinai u da ong, 2#Eks. 23:10,11.“To kren ha ki khun Israel, bad to ong ha ki, ‘Haba phin wan sha ka ri ïa kaba ngan ai ha phi, ynda kumta, to ai ba ka khyndew kan shongthait ka Sabbaton ïa U Trai. 3Hynriew snem men bet ïa ka lyngkha jong me bad hynriew snem men khyllad ïa ka brisoh Waiñ jong me, bad men ïoh ïalum ïa ka jingmih jong ka; 4te ha ka snem ka bahynñiew kan long ka Sabbaton ka jingshongthait ïa ka khyndew, ka Sabbaton ïa U Trai; men ym bet ïa ka lyngkha jong me, bad men ym khyllad ïa ka brisoh Waiñ jong me. 5Wat ot ïa kaba mih hi, bad wat ïakheit ïa u soh jong u dieng soh Waiñ jong me ïa uba mem shym la khyllad: naba ka long ka snem ka jingshongthait ïa ka khyndew. 6Hynrei, ka jingmih ka jong ka Sabbaton ka khyndew kan long ka jingbam ïa phi: ïa me, bad ïa u shakri jong me bad ïa ka shakri jong me, bad ïa u nongbylla jong me bad ïa u nongwei uba shong basa bad me; 7ïa ki jingri jong me ruh, bad ïa u mrad uba don ha ka khyndew jong me, kan long ka jingmih jong ka baroh ban bam.
8“ ‘To kheiñ ïa me ruh hynñiew Sabbaton ki snem, kata ka long hynñiew sien hynñiew snem; bad ki sngi jong kita ki hynñiew Sabbaton ki snem kin long ha me sawphew khyndai snem. 9Ynda kumta, men phah put ïa ka turoi ka jubili ha u bnai u bahynñiew bad ha ka sngi bashiphew jong uta u bnai; ha ka sngi bashiphew jong uta u bnai ha ka sngi ka jingpynïasuk, to put ïa ka turoi lyngba ïa ka ri baroh kawei. 10Bad to pynkyntang khuid ïa ka snem ka basanphew, bad to pynbna ïa ka jingpyllaitluid ha ka ri ïa ki khun ki hajar jong ka baroh: kan long ka jubili ïa phi; bad to ai ba uwei uwei baroh un leit phai pat sha la ka jong ka khyndew, bad uwei uwei baroh un leit phai pat sha la ka jong ka ïing. 11Ka snem ka basanphew kan long ka jubili ïa phi; wat bet, bad wat ot ïa ka jingmih jong ka, kaba mih hi; bad wat ïakheit ïa ki soh jong u dieng soh Waiñ jong ka, ïa uba ym shym la khyllad. 12Namar ka long ka jubili; to ai ba kan long ka bakyntang ïa phi: phin bam ïa ka jingmih jong ka na ka lyngkha hi.
13“ ‘Ha kane ka snem jubili phin leit phai pat uwei uwei baroh sha la ka khyndew. 14Haba phin die kaei kaei ha la u paramarjan, lane haba phin thied na ka kti u paramarjan, wat ïaban paralok hi. 15To thied na u paramarjan jong me katba kum ki snem ba la lah naduh ka jubili, bad to ai ba u ruh un die ha me katba kum ka jingkheiñ ki snem ki jingmih. 16Men kyntiew ïa ka dor jong ka haba bun ki snem, bad men nang pynpoh ïa ka dor jong ka haba duna ka jingkheiñ ki snem; naba u die ha me katba kum ka jingkheiñ ki jingot. 17Bad wat ïaleh jubor paralok hi; hynrei, men sheptieng ïa U Blei jong me: naba nga long U Trai U Blei jong phi.
18“ ‘To phin leh ïa ki hukum jong nga, bad to sumar ïa ki jingbishar jong nga bad to leh ïa ki; ynda kumta, phin ïoh shongsuk ha ka ri. 19Ka khyndew ruh kan sei soh bha, bad phi ruh phin ïoh bam kdang, bad phin ïoh shongsuk ha ka. 20Te lada jia ba phin kylli, “Kaei ngin bam ha ka snem ka bahynñiew? Ha khmih, ngin ym ïoh bet, bad ngin ym ïoh ïalum ïa ka jingot jong ngi!” 21Ynda kumta, ngan hukum ïa ka jingkyrkhu jong nga halor jong phi ha ka snem ka bahynriew, bad kan sei soh kat ban dap lai snem. 22Te ha ka snem ka baphra phin bet, hynrei, phin bam na ka jingmih barim haduh ka snem ka bakhyndai; haduh ban da mih ki soh jong ka, phin bam na ka barim. 23Ïa ka khyndew yn ym lah die duh; naba ka khyndew ka long ka jong nga: naba phi long tang ki nongwei bad ki nongwan hap ha nga. 24Bad phin ai ïa ka ban pyllait pat ïa kata ka khyndew ha ka ri ka jingïoh pateng jong phi baroh.
25“ ‘Lada u para jong me un kylla duk, bad ba un leit die noh ïa kaei kaei ba u don, bad lada wan u kur jong u ïa ka ban pyllait ïa kata, ynda kumta, un ïoh pyllait pat ïa kaba u para jong u, u la die noh. 26Hynrei, lada u briew um don ïano ïano ruh ïa ka ban pyllait ïa kata, bad lada jia ba u hi un lah kot ïa kaba dap biang ban pyllait ïa ka; 27te un kheiñ ïa ki snem naduh ba u la die, bad un buria pat ïa kaba tam ha uta u briew ha uba u la lah die noh ïa kata; kumta, un ïoh phai pat sha la ka bynta. 28Te lada um lah kot ïa kaba dap biang ban siew ïa u, ynda kumta, kata ïa kaba u la die kan sah ha ka kti jong uta uba la thied ïa ka haduh ka snem jubili: bad ha ka jubili kan lait noh, u ruh un phai pat sha la ka bynta.
29“ ‘Bad haba u briew u die noh ïa ka ïingshong briew hapoh ka shnong ba la ker kynroh, te un ïoh hok ban pyllait ïa ka hapoh ka shi snem biang naduh ka jingdie jong ka; hapoh ka shi snem un lah ban pyllait pat ïa ka. 30Bad lada yn ym pyllait pat ïa ka hapdeng ka shi snem, ynda kumta, kata ka ïing kaba hapoh ka shnong ba la ker kynroh kan sah trai ha uta uba la thied ïa ka, bad ha ki khun ki ksiew jong u pateng la pateng: kata kan ym lait noh ha ka jubili ruh. 31Hynrei, ïa ki ïing jong ki shnong kiba khlem ker kynroh ïa ki, yn kheiñ kum ki lyngkha: lah ban pyllait pat ïa ki, bad kin ïohlait ha ka jubili. 32La kumta ïa ki shnong ki Lebi, ïa ki ïing ki shnong kiba dei trai ha ki, ki Lebi ki lah ban pyllait ha kano kano ka por. 33Bad lada u briew u da thied na ki Lebi, ynda kumta, kata ka ïing ïa kaba u la die, bad ka shnong ka jingïoh pateng jong u, kan lait noh ha ka jubili: naba ki ïing ki shnong ki Lebi ki long ka bynta jong ki hapdeng ki khun Israel. 34Hynrei, ka lyngkha kaba harud ki shnong jong ki, yn ym lah ban die noh; naba ka long ka bynta jong ki junom.
35 #
Deu. 15:7-11. “ ‘Bad haba u para jong me u kylla duk, bad lada ka kti jong u ka duh bor bad me; to kyrshan ïa u: kum u nongwei lane uba shong basa un ïoh shong bad me. 36#Eks. 22:25; Deu. 23:19,20.Men ym shim na u lymne ka sut lymne ka jingmyntoi; hynrei, to men sheptieng ïa U Blei jong me: bad to ai ba u para jong me un ïoh im lem bad me. 37Wat buh sut ïa ki sbai jong me ha u, lymne wat ai ïa ka jingbam jong me ha u, ïa ka ban pynmyntoi ïa lade da ka. 38Nga long U Trai U Blei jong phi, uba la ïalam ïa phi na ka ri Ijipt, ïa ka ban ai ha phi ïa ka ri Kanaan, ïa ka ban long U Blei jong phi.
39 #
Eks. 21:2-6; Deu. 15:12-18. “ ‘Bad haba u para jong me uba bad me u kylla duk, bad la die ïa u ha me; men ym leh bor ïa u ban shakri ïa me kum u mraw: 40to ai ba un long bad me kum u shakri babylla, bad kum u nongwei, un long lem bad me; un shakri ïa me haduh ka snem ka jubili: 41ynda kumta, un lait noh na phi, bad ki khun jong u lem bad u, bad un ïoh leit wan noh sha la ïing, bad hadien kata, un leit phai pat sha ka jingïoh pateng ki kpa jong u. 42Naba ki long ki shakri jong nga, ïa kiba nga la ïalam noh na ka ri Ijipt: wat ai ba yn die noh ïa ki kum ki mraw. 43Men ym long u kynrad uba leh eh halor jong u; hynrei, men sheptieng ïa U Blei jong me. 44Te u mraw jong me, bad ka mraw jong me, to men thied ïa kita na ki Jentil kiba shong baroh sawdong ïa me; napdeng jong ki men thied ïa ki mraw shynrang bad kynthei. 45Phi lah ban thied ïa ki ruh na ki khun ki nongwei kiba wanhap ha phi, bad na ki ïing jong kita kiba hapdeng jong phi, ïa kiba la kha ha ka ri jong phi: bad kin long ki jong phi. 46Phin ïoh ruh ïa ki kum ka bynta ban hiar pateng ïa la ki khun hadien jong phi: kin long ki mraw jong phi junom: hynrei, shaphang ki para jong phi kiba ki khun Israel, phin ym ïaleh jubor paralok hi.
47“ ‘Bad haba u nongwei lane uba wanhap ha me u la riewspah, bad u para jong me u la kylla duk hajan jong u, katba u leit die noh ïa lade ha uta u nongwei uba wanhap ha me, lane ha kiba dei kur ïa uta u nongwei, 48haba la lah die noh ïa u, lah ban pyllait pat ïa u; uwei na ki para jong u, u lah ban pyllait pat ïa u, 49lane u kñi jong u, lane u khun u kñi jong u, u lah ban pyllait pat ïa u, lane uwei u kur bajan jong u na ka ïing jong u hi, u lah ban pyllait pat ïa u; lane lada u don bor u lah ban pyllait hi ïa lade keiñ. 50Bad un ïakheiñ bad uta uba la thied ïa u, naduh ka snem ha kaba la die ïa u haduh ka snem ka jubili: bad ka dor ka jingdie jong u kan long katba kum ka jingkheiñ kita ki snem; kan kheiñ ha u kum ka jingshakri u shakri babylla. 51Lada dang sah bun snem, to ai ba un siew kumta keiñ ïa ka dor ka jingpyllait jong u na ki sbai da kiba la thied ïa u. 52Te lada dang sah tang khyndiat snem haduh ka snem ka jubili, haba yn ïakheiñ bad u, to ai ba un siew ïa la ka jingpyllait katba kum kita ki snem jong u. 53Kum u shakri babylla shi snem shi snem un long bad u: bad un ym leh trai khlieh halor jong u ha khmat jong me. 54Lada yn ym ïoh pyllait pat ïa u hapdeng kita ki snem, te un ïohlait noh ha ka snem ka jubili, ma u, lem bad ki khun jong u. 55Naba ki khun Israel ki long ki shakri jong nga; ki shakri jong nga ki long ïa kiba nga la ïalam noh na ka ri Ijipt: Nga long U Trai U Blei jong phi.’ ”
Actualmente seleccionado:
LEBITIKOS 25: KHB
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
The Bible Society of India