Chhut Âi-khi̍p Ki 25

Vi Sṳn-só Fung-hien

(Chhut Âi-khi̍p Ki 35:4-9)

1Song-chú tui Mô-sî kóng: 2“Ngì oi fûn-fu Yî-set-lie̍t-ngìn hien lî-vu̍t pûn Ngài. Só-yû lo̍k-yi fung-hien pûn Ngài ke lî-vu̍t, ngì-têu chhiu sû hâ-lòi kûi-pûn Ngài. 3Ngì-têu oi chiap-su ke lî-vu̍t he: Kîm, ngiùn, thùng; 4làm-set, chṳ́-set, lâu chhṳ̂m-fùng set ke yòng-mô; mà-sâ; sân-yòng-mô chhiak ke pu-liau; 5ngiam-fùng ke yòng-kú-phì; chhin-chiâng ke phì-liau; kîm-ha̍p-fôn-muk; 6tên-yù; chṳ-chho sṳn-yù lâu hiông ke ngièn-liau; 7fùng-mâ-nó lâu khì-thâ pó-sa̍k, oi nâ-lòi siông chhai thai-chi-sṳ̂ ke yî-fut-tet sṳn-fu̍k lâu hiûng-phài táng. 8Ngìn-mìn oi vi Ngài hí yit-chho sṳn-só, hó pûn Ngài he̍t chhai kì-têu tông-chûng. 9Yû-koân liá sṳn-chong-phùng lâu tî-poi só-yû yung-phín, chhiòn-phu oi cheu Ngài só chṳ́-sṳ ngì ke yong-sṳt lòi chṳ-chho.”

Yok-khui

(Chhut Âi-khi̍p Ki 37:1-9)

10“Oi yung kîm-ha̍p-fôn-muk chho khui-é, khui-é chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn, kô liuk-sṳ̍p liuk kûng-fûn. 11Oi yung sùn-kîm chiông khui-é ke nui-ngoi chhiòn-phu pâu-tén, si-mien oi siông chhṳ́-hìn kîm-piên. 12Oi chu-chho si-chak chhôn kong-é yung ke kîm khiên-é, ôn chhai khui-é ke si-kiok song, yit-phién lióng-chak. 13Oi yung kîm-ha̍p-fôn-muk chho lióng-kî kong-é, yung kîm pâu-tén, 14nâ-lòi chhôn-ko khui-é lióng-phién ke kîm khiên-é. 15Liá lióng-kî kong-é oi sòng-sòng liù chhai khiên-é tú, cho-m̀-tet pâng chhut-lòi. 16Chiông Ngài oi su-pûn ngì siá-tén kie-min ke sa̍k-pán piong chhai khui-é tú.

17“Oi yung sùn-kîm chho yit-ke khui-é koi, chhiu-he su̍k-chhui koi, chhòng yit-pak yit-sṳ̍p kûng-fûn, fat liuk-sṳ̍p liuk kûng-fûn. 18Yu oi yung kîm-é chhùi-chhut lióng-chak kî-lu-pak#25:18 “kî-lu-pak” khon Chhóng-sṳ Ki 3:24., 19ngiàm chhai koi-é táng, yit-thèu yit-chak, sàng-cho koi-é ke yit phu-fun. 20Lióng-chak kî-lu-pak mien-tui-mien, tá-khôi yi̍t-kap, châ-tén khui-é koi. 21Chiông Ngài oi su-pûn ngì siá-tén kie-min ke sa̍k-pán piong chhai khui-é tú, yèn-heu chiông koi-é khièm chhai khui-é táng-kô. 22Ngài oi chhai ke-vi lâu ngì siông-fi, ya oi chhai koi-é táng-kô, tui lióng-chak kî-lu-pak chûng-kiên, chiông Ngài vi Yî-set-lie̍t ngìn-mìn li̍p ke fap-li̍t chhiòn-phu chhòn-pûn ngì.”

Kiûng-chok

(Chhut Âi-khi̍p Ki 37:10-16)

23“Oi yung kîm-ha̍p-fôn-muk chho yit-chông chok-è, chhòng pat-sṳ̍p pat kûng-fûn, fat si-sṳ̍p-si kûng-fûn, kô liuk-sṳ̍p liuk kûng-fûn. 24Oi yung sùn-kîm lòi pâu-tén, pin oi chhai si-mien siông chhṳ́-hìn kîm-piên. 25Chok-è ke chû-vì oi kâ chhit-sṳ̍p ńg kûng-lì fat ke khiông-é, khiông-é oi siông chhṳ́-hìn kîm-piên. 26Oi chu-chho si-chak yung-lòi kông ke kîm khiên-é, ôn chhai chok-è si-kok ke kiok-táng. 27Ôn kîm khiên-é oi vá-khiun khiông-é, pûn kông chok-è ke kong-é chhôn ko-hi. 28Oi yung kîm-ha̍p-fôn-muk chho lióng-kî kong-é, yung kîm pâu-tén. 29Oi yung sùn-kîm chho chok-táng ke phàn-è, vón, lâu kin-sṳ̀n yung ke chiú-fù lâu chiú-pî. 30Chok-è oi piong chhai yok-khui chhièn, chok-táng sòng-sòng pài-tén hien-pûn Ngài ke kiûng-piáng.”

Tên-thòi

(Chhut Âi-khi̍p Ki 37:17-24)

31“Oi yung sùn-kîm chho yit-chho tên-thòi. Tên-chho lâu chhû-é oi yung kîm-é tá-chho; chông-sṳt ke fâ-lúi, fâ-thok, fâ-phan, chhiòn-phu oi chhùi-to yit-te lièn khiung-ha. 32Tên-thòi lióng-phién chhûn-chhut liuk-kî kî-é, yit-phién sâm-kî. 33Tak-kî kî-é yû sâm-lùi fâ, hìn-chhong chhiong hen-fâ, yû fâ-thok lâu fâ-phan. 34Tên-thòi ke chhû-é yû si-lùi fâ, hìn-chhong chhiong hen-fâ, yû fâ-thok lâu fâ-phan. 35Sâm-tui kî-é ke mî-yit tui hâ-poi yû yit-ke fâ-thok. 36Fâ-thok, kî-é lâu tên-thòi, chhiòn-phu oi yung kûi-te sùn-kîm tá chhut-lòi ke. 37Oi vi tên-thòi chho chhit-chán tên, tên-chán oi pûn tên-fó hiong thèu-chhièn cheu. 38Oi yung sùn-kîm chho tên-fâ chién-tô lâu tên-phàn. 39Oi yung sâm-sṳ̍p ńg kûng-kîn ke sùn-kîm chho tên-thòi lâu só-yû yung-phín. 40Oi chu-yi cheu Ngài chhai sân-táng chṳ́-sṳ ngì ke yong-sṳt hi chho.”

Actualmente seleccionado:

Chhut Âi-khi̍p Ki 25: THV12Rdb

Destacar

Copiar