Mahendo 15
15
Monano wa akuluphiri ohendwa Jerusalemu
1 #
Alaw 12:3
Atʼu fulani ákudza Anitiyokiya kulaa Judea, na achanza kwafunza o akuluphiri kukala, “Mwimwi nimubitʼwetsʼi dza Shariya ya Musa yambavyo. Ela mutsʼiphohenda vivyo, kʼamwidima kutiya.” 2Neno riro richiahenda Pʼaulo na Barinaba alumbane muno na o atʼu okala anafunza vivyo. Ndo vichamulwa kukala Pʼaulo na Barinaba, phamwenga na akuluphiri fulani a kanisa ra Anitiyokiya, ende Jerusalemu, ende akagagombe na ahumwa a Jeso, na vilongozi a kanisa ra kuko gago.
3Atʼu ohumwa kwenda Jerusalemu ásiswa ni o akuluphiri a pho Anitiyokiya, nao achichira na majimbo ga Foinike na Samariya. Ao áambira atʼu a kuko dzulu ya vyokala atʼu a makabila manjine adzimugalukira Mulungu kwa kumukuluphira Jeso, na nguma zizo zichiahamira muno ao akuluphiri osi. 4Na ariphofika Jerusalemu, áphokerwa ni akuluphiri a kuko, ahumwa a Jeso, na vilongozi ao. Ndo nao achiaambira dzulu ya maneno gosi gokala Mulungu udzigahenda kuchirira ao. 5Ela akuluphiri anjine okala ni a chama cha Afarisayo, áima achiamba, “Atʼu a makabila manjine ni seti abitwʼetsʼi, na alagizwe atuwirize vivyo yambavyo yo Shariya ya Musa.”
6Ndo ahumwa a Jeso na vilongozi a kanisa achionana, achigomba dzulu ya neno riro. 7#Mahe 10:1-43Ariphokala áhwala chiwango chire kugomba dzulu ya neno riro, Pʼetero waima achiamba, “Akuluphiri asena, mwimwi munamanya kukala, phapho mwanzo Mulungu wanitsagula mimi kulaa kati yenu, kwa nisumurire Nguma Mbidzo kwa atʼu a makabila manjine. Mulungu wahenda vivyo kwa ao apate kuyisikira, na ayikuluphire. 8#Mahe 10:44; 2:4Mulungu unamanya maazo ga chila mutʼu, na yiye wangʼaza kukala, udziakubali ao kwa kwapʼa Rohowe dza vyohupʼa siswi. 9Siswi na ao Mulungu wahuhwalira sawa. Kwa vivyo, ao áusirwa madambi gao, kwakukala, ámukuluphira nao. 10Ndo kwadze sambi munamuheza Mulungu kwa kwahwika muzigo ubomu o anafunzi? Muzigo uo washinda akare ehu, na hata siswi naswi kʼahwidima kuutsukula. 11Bee ninamwambira mino kukala, vivyo tsʼivyo. Siswi hunakuluphira kukala, Mulungu unahutivya kwa mbazi za Bwana Jeso, na ao nao a vivyo.”
12Pʼaulo na Barinaba nao ásema dzulu ya vyokala Mulungu uhenda dalili na mautʼu-mautʼu ga kwangalaza kuchirira ao ko kwa atʼu a makabila manjine, na atʼu osi pho monanoni achinyamala zizizi kusirikisa. 13Ariphomala kugomba, Jakobo waamba, “Hebu nigombe vichache nami, akuluphiri asena! 14Phapha Simoni Pʼetero usema vivyo arivyo Mulungu waanza kungʼaza unaamanyirira atʼu a makabila manjine, kwa kutsagula anjine ao achikala atʼue. 15Bee, neno riri rinagwa sawa kamare na maneno gogombwa ni agomvi a Mulungu mumo Maandikoni kukala,
‘Bwana Mulungu unaamba,
16 #
Amo 9:11, 12 “Ko hwendako, nindauya nidze nijenge kahiri yiyatʼu nyumba ya Daudi yogwa.
Yiyo nindayijenga kahiri niyiudze dza vyokala.
17Nindagahenda gago kwa hata atʼu anjine osi,
yaani, atʼu a makabila manjine gosi
nirigogaiha akale angu, anitsakule.
18Vivyo ndivyo naambavyo mimi Bwana Mulungu,
niriyehenda neno riri rimanyikane hangu pho kare.” ’ ”
19Jakobo waenderera kugomba achiamba, “Kwa vivyo, mimi vivi ninaona, hutsʼiayugeni ao atʼu a makabila manjine amugalukirao Mulungu. 20#Kul 34:15-17; Alaw 18:6-23; Alaw 17:10-16Siswi hata rehu ra kuhenda ni hwaandikireni baruwa hwaambire kukala, atsʼirye vyakurya vyodzilaviwa sadaka kwa milungu ya vinyago, atsʼirye nyama yeyosi yedzishongolwa, ariye kʼamwagirwe milatso, na atsʼizinge. 21Ao naambirwe gago, mana, ni kati ya gago malagizo ga Musa, na gago gáanza pʼindi kusomwa masinagogini mosi chila tsʼiku ya Sabato, na kusumurirwa chila mudzi.”
Baruwa yoandikirwa akuluphiri a makabila manjine
22Ahumwa a Jeso, vilongozi a kanisa na akuluphiri osi áamula kutsagula atʼu fulani kulaa kati yao, na aahume Anitiyokiya, phamwenga na Pʼaulo na Barinaba. Ndo achitsagula Sila na Juda, ariye dzinare rinjine ndiye Barisaba. Atʼu ao airi ákala ni vilongozi kati ya o akuluphiri. 23Achiapʼa baruwa yokala yinaamba vivi:
“Ni siswi ahumwa a Jeso, vilongozi a kanisa na akuluphiri anzienu. Hunamulamusa mwimwi akuluphiri a makabila manjine murio Anitiyokiya, na majimbo ga Siriya na Kilikiya. 24Siswi hwasikira kukala, kuna atʼu anjine olaa kuku kwehu achidza ko kwenu photsʼihumwa ni siswi, na achidzamwangaisha, na achimuyuga maroho na gago gao gogomba. 25Bee siswi hosi kuku hudzonana, na hukaerekezanani hwatsagule atʼu fulani, na hukaahuma adze ko kwenu phamwenga na akuluphiri anziehu hwahenzao, ano Barinaba na Pʼaulo, 26atʼu ario ázinza mazagazi gao kwa dzulu ya dzina ra Bwana wehu Jeso Kʼirisito. 27Kwa vivyo, hunaahuma Sila na Juda ko kwenu, adze akaze kumwambira na mulomo gaga hugaandikago. 28Ndo siswi hudzifunulirwa ni Roho wa Mulungu kukala, hutsʼimuhwike muzigo unjine, na ga halahala ni kwamba: 29tsʼiryeni vyakurya vyodzilaviwa sadaka kwa milungu ya vinyago, tsʼiryeni nyama za nyama odzishongolwa, ario kʼaamwagirwe milatso, na mutsʼizinge. Muchihenda vivi vyodzimwamba, mundakala munahendatʼo, na kalanitʼo.”
30Atʼu okala ahumwa ariphosiswa, ákwenda Anitiyokiya kuriko ákwendahenda monano wa akuluphiri osi na achiapʼa yiyatʼu baruwa. 31Akuluphiri a kuko achiyisomerwa, na achihamirwa muno kwa gago manenoge gáatiya moyo. 32Juda na Sila, ario ákala ni agomvi a Mulungu, ágomba maneno manji kulaa kwa Bwana kwatiya moyo, na kwajenga o akuluphiri. 33Ariphosagala kuko kwa tsʼiku fulani, akuluphiri a Anitiyokiya áasisa, na achiavoyera reri. O nao achiuya Jerusalemu kwa aratʼu okala adziahuma.#15:33 Nakala zinjine zinaonjeza fungu ra 34 dza: Ela Sila waamula kusala kuko. 35Ela Pʼaulo na Barinaba ásala ko Anitiyokiya achifunza, na kusumurira udzumbe dzulu ya Bwana phamwenga na atʼu anjine anji.
Pʼaulo na Barinaba anarichana
36Ariphomala tsʼiku fulani ko Anitiyokiya, Pʼaulo wamwamba Barinaba, “Hinde chila mudzi huriosumurira udzumbe dzulu ya Bwana, hukaalamuse akuluphiri ayaehu, na hwaone endereravyo.” 37Ndo Barinaba achikala unahenza Johana, ariye dzinare rinjine ndiye Mariko, ende naye. 38#Mahe 13:13Ela Pʼaulo kʼahamirirwe ni kwenda na Mariko, ariye pho mwanzo wakala udziaricha jimbo ra Pʼamufuliya, na waricha kuhenda kazi nao. 39Ndo Pʼaulo na Barinaba álumbana phapho hata musindikizowe achirichana. Barinaba achigwirikana na Mariko, achipanda meli achenda Kupuro. 40Pʼaulo naye achimutsagula Sila. Akuluphiri a phapho achialavya kwa Mulungu kwa Mulungu aarinde, na ao nao achiuka. 41Charo chicho, Pʼaulo yiye wachira na ko majimbo ga Siriya na Kilikiya achiajenga akuluphiri.
Actualmente seleccionado:
Mahendo 15: CHIDUR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión