Mahendo 14
14
Pʼaulo na Barinaba ko Ikoniyo
1Pʼaulo na Barinaba ariphokala a Ikoniyo, maneno gákala dza vyokala gákala ko Anitiyokiya. Ao ákwendasumurira neno ra Mulungu ko sinagogini hata Ayahudi anji na atʼu a makabila manjine anji achikuluphira. 2Ela Ayahudi anjine orema kukuluphira, áasunganya atʼu a makabila manjine hata achitsukirwa, kwa aapinge ao ano Pʼaulo na Barinaba. 3Ela hata vivyo, Pʼaulo na Barinaba áenderera kukala kuko tsʼiku nyinji, achigomba udzumbe dzulu ya Bwana Jeso photsʼi woga. Bwana naye achiapʼa widimi wa kuhenda dalili na mautʼu-mautʼu ga kwangalaza na gago gachingʼaza lwazu kukala, udzumbe okala anaugomba dzulu ya mbazize nyinji, wakala ni wa jeri. 4Atʼu a mudzi uo achigavikana maduu mairi. Duu mwenga richiunga mukono Ayahudi, na riro rinjine richiunga mukono o ahumwa a Jeso.
5Musindikizowe, anjine a o atʼu a makabila manjine, Ayahudi phamwenga na abomu ao, áamula kwahendera mai ao ahumwa a Jeso, na kwapiga mawe. 6Ela ao ahumwa a Jeso ágamanya gago, na achichimbirira jimbo ra Lukaoniya. Kuko, achenda midzi ya Lusitira na Deribe, na pʼande za phephi-phephi, 7achenderera kusumurira Nguma Mbidzo.
Pʼaulo na Barinaba ko midzi ya Lusitira na Deribe
8Kuko mudzi wa Lusitira, kwakala kuna mutʼu mumwenga ariye wakala upholoza magulu hangu kuvyalwakwe, na wakala kʼadzangwe kwenenda kamare. 9Ndo Pʼaulo ariphokala unasumurira Nguma Mbidzo, mutʼu yiye wamusirikisa. Pʼaulo naye achimulolatʼo, na ariphoona kukala una kuluphiro ra kwidima kuphozwa, 10wagomba kwa laka ra dzulu achimwamba, “Unuka wime tititi.” Phapho kare, yiye mutʼu wa kupholoza achiunuka, na achanza kwenenda. 11Duu ra atʼu ririphoona gokala gahendwa ni Pʼaulo, raanza kupiga kʼululu kwa chiryomo cha Chilukaoniya kwamba, “Asenani, milungu yidzihutsererera dza adamu!” 12Barinaba ámwiha Zeu, na Pʼaulo achimwiha Herime, kwakukala, wakala ndiye mugomvi. 13Kuhani wa Hekalu ra Zeu,#14:13 Ayunani ákala ana milungu minji. Kati yao yakala ni Zeu na Herime. Zeu wakala ndiye mulungu wao mubomu, na Herime wakala ndiye ahumwaye. ririro rakala ri konze ya o mudzi achireha nzao fulani, na maruwa pho dziyangoni, kwakukala, yiye na riro duu ra atʼu, ákala anahenza aapʼe sadaka o ahumwa a Jeso.
14Ahumwa Pʼaulo na Barinaba ariphosikira gago gokala anahenza agahende, áahula nguwo zao konyesa kukala, ákala kʼaagaenzi. Chisha, achidudula mairo kati-kati ya riro duu ra atʼu na kuno anagomba kwa laka ra dzulu kwamba, 15#Kul 20:11; Zab 146:6“Mwi asena, heka munahenda vino? Siswi kʼahu milungu, hu anadamu dza mwimwi. Sino hudzikudzamusumurira Nguma Mbidzo kwa mupate kuricha kuyabudu yiyi milungu ya ulongo, mugaluke mumwabudu Mulungu ariye moyo. Yiye ndiye yeumba mbingu na itsʼi, bahari na vyosi virivyo mumo. 16Pho pʼindi, Mulungu waaricha atʼu a chila chiryomo ahende ahenzavyo. 17Ela hata vivyo, udzenderera kwafunulira atʼu kukala u kuko kwa kwahendera madzo. Ndo yiye mwimwi unamubitʼira mvula kulaa mbinguni. Ukati wa kuguwa, unamupʼa nyoha, na chisha unamupʼa vyakurya vinji, na unamuhenda muhamirwe.” 18Pʼaulo na Barinaba ágomba gago gosi kwaziza o atʼu atsʼialavire sadaka, ela yakala gagada vivyo ko kwaziza.
19Ela Ayahudi fulani ákudza kulaa Anitiyokiya-Pʼisidiya na Ikoniyo, achidzaahenda atʼu auye upande wao. Ndo achimupiga mawe Pʼaulo hata achimona dza kwamba udzefa, na phapho achimukuruta achimulavya konze ya o mudzi. 20Ela anafunzi ariphokwemuzunguluka, waunuka, achiuya ko mudzini. Kunadzachakwe, yiye phamwenga na Barinaba ákwenda Deribe.
Pʼaulo na Barinaba anauya Anitiyokiya
21Pʼaulo na Barinaba ákwendasumurira Nguma Mbidzo ko Deribe, na achipata anafunzi anji a Bwana. Aripholaa phapho, áchira na Lusitira na Ikoniyo, achiuya Anitiyokiya-Pʼisidiya. 22Midzi yiyo yosi yochirira, áajenga anafunzi akaze kukomala chiroho, na achiatiya moyo aenderere kugagwiririra kinyi gago arigogakuluphira. Ao ákala achiaamba vivi, “Siswi akuluphiri, ni seti huturike muno huchikala kʼahudzangwe kwendaphenya Ufalumeni kwa Mulungu.” 23Pʼaulo na Barinaba átsagula vilongozi kwenye chila kanisa kwa dzulu ya o akuluphiri, achivoya na kufunga, na achiaika tsʼini ya urinzi wa Bwana, ariye ákala anamukuluphira.
24Pʼaulo na Barinaba ariphouka jimbo ra Pʼisidiya, áfika kahiri jimbo ra Pʼamufuliya, 25na achendasumurira udzumbe wa Mulungu mudzi wa Pʼeriga. Aripholaa phapho, ákwenda mudzi wa Ataliya, 26na anauka kuko, achipanda meli achiuya Anitiyokiya, jimbo ra Siriya. Kuko ndiko kuriko, pho mwanzo ákala alaviwa kwa Mulungu, kwa Mulungu aarinde, na aafunulire udzowe kwa dzulu ya kazi yiriyo ákala adziyichimiza phapho.
27Ariphofika ko Anitiyokiya, áhenda monano na o akuluphiri a phapho, achiaambira gosi gokala Mulungu udzigahenda kuchirira ao, na vyokala Mulungu udziavugulira njira atʼu a makabila manjine hata akuluphira. 28Na ásagala kuko na aratʼu anafunzi kwa tsʼiku nyinji.
Actualmente seleccionado:
Mahendo 14: CHIDUR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión