لوکا 2
2
ایسّا مَسیهئے پێدائِش
1هما رۆچان، رومئے بادشاه کئیسَر#2:1 کئیسر رومئے بادشاهانی لَکَب بوتگ، هچّ بادشاهئے جندئے نام نبوتگ. رومئے هر بادشاه کئیسر گوَشگ بوتگ. آگوستوسا هُکم دات که سَرجمێن مُلکا#2:1 اَسلیگێن یونانی نبشتانکَ گوَشیت: ”سجّهێن جهان“. مردم‌شماری ببیت. 2اے ائولی مردم‌شماری اَت و آ وهدا کْویرینیوس سوریَهئے والی اَت. 3هرکَس په وتی نامئے نبشته کناێنگا وتی پت و پیرُکی شهرا شت.
4ایسُّپ هم چه جَلیلئے شهر ناسِرَها در کپت و یَهودیَهئے شهر بئیت‌لَهِما شت، هما شهر که بازێن وهدے پێسر اۆدا داوود بادشاه پێدا بوتگ‌اَت. ایسُّپ بێها چه داوودئے پَدرێچا اَت، پمێشکا په وتی نامئے نبشته کناێنگا اۆدا شت. 5ایسُّپا وتی دِشتار مَریَم هم گۆن اَت که چُکّێا اُمێتوار اَت.
6همے وهدا که آ بئیت‌لَهِما اَتنت، مَریَمئے چِلّگ بئیگئے ماه و رۆچ سَرجم بوتنت و 7مردێن‌چُکّێئے سرا چِلّگ بوت که آییئے ائولی چُکّ اَت. مَریَما وتی نُنُّک گُدێا پَتات و کدیمدانێئے#2:7 کدیمدان یکّ مزنێن درپے که آییئے تها پس و گۆکانی وراکان مانَ کننت و دێما دئینت. تها واپێنت، چێا که په آیان مهمانجاها جاگه نێست‌اَت.
په شپانکان پرێشتگانی مِستاگ
8هما هَند و دَمگا لهتێن شپانک هست‌اَت که شپا گیابانا وتی رمگِش نِگهپانیَ کرت. 9هُداوندئے پرێشتگے آیانی دێما زاهر بوت و چارێن نێمگان هُداوندئے شان و شئوکتئے رُژنایی دْرپشگا#2:9 درَپشگ، بزان شَهم جنَگ، جلَشکَگ. لگّت. آیان سَکّ تُرست. 10بله پرێشتگا گوَشت: ”متُرسێت، منا په شما مِستاگے گۆن اِنت که په سجّهێن کئوما مزنێن شادمانیے کاریت. 11داوودئے شهرا مرۆچی په شما رَکّێنۆکے پێدا بوتگ که هُداوندێن مَسیه#2:11 مَسیه، بزان هُدائے هما گچێن کرتگێن بادشاه. اِنت. 12اِشیئے پَجّاه آرگئے نشانی اِش اِنت که شما کدیمدانێئے تها گُدێا پَتاتگێن نُنُّکے گندێت.“
13اَناگت آسمانی پرێشتگانی لشکرے هُدایا نازێنانا آ پرێشتگئے کِرّا آتک. گوَشتِش:
14”شان و شئوکت بُرزێن اَرشئے هُدایا بات و
زمینئے سرا سُهل و اێمنی
هما مردمان برسات
که هُدا چه آیان وشّ و رَزا اِنت.“
15وهدے پرێشتگان آ اِشت و آسمانا شتنت، شپانکان وت‌مان‌وتا گوَشت: ”بیاێت بئیت‌لَهِما رئوێن و هما کار که بوتگ و هُداوندا مارا هال داتگ، آییا وتَ چارێن.“ 16گڑا په اِشتاپی شتنت و مریَم و ایسُّپِش در گێتکنت و نُنُّکِش کدیمدانئے تها دیست. 17نُنُّکئے گِندگا رَند، شپانکان اے چُکّئے بارئوا هرچے که چه پرێشتگان اِشکتگ‌اَت، مردم سَهیگ کرتنت. 18آ سجّهێنان که شپانکانی هبر اِشکت، هئیران و هَبَکّه منتنت. 19بله مَریَما اے سجّهێن هبر وتی دلا داشتنت و اِشانی سرا باز پِگر و هئیالیَ کرت. 20شپانکان هرچے که اِشکتگ و دیستگ‌اَت، په آیان هُدایا سِپَت و سَنا کنان پِر ترّتنت، چێا که اے سجّهێن هما ڈئولا اَتنت که گۆن آیان گوَشگ بوتگ‌اَت.
مزنێن پرستشگاها ایسّائے آرگ
21هشتمی رۆچا، وهدے نُنُّکئے سُنّت کنگئے وهد آتک، آییئے نامِش ایسّا کرت، هما نام که ماتئے لاپا کپگا پێسر پرێشتگا پِر کرتگ‌اَت.
22وهدے مات و چُکّئے چِلَّگ‌شۆدیئے وهد هلاس بوت، موسّائے شَریَتئے رَندگیریا ایسُّپ و مَریَما ایسّا اورشَلیمئے مزنێن پرستشگاها آورت که آییا هُداوندئے بارگاها پێش بکننت، 23اَنچُش که هُداوندئے شَریَتَ گوَشیت: ائولی هر مردێن‌چُکّ باید اِنت په هُداوندا نَدریگے هساب کنگ ببیت.#2:23 دَررئو 13:2، 12. 24په کُربانیگ کنگا هم آتکنت، تانکه هما ڈئولا که هُداوندئے شَریَتا گوَشتگ، ”جُتکے شانتُل#2:24 شانتُل، بزان شاتُل، شاتۆرێن مُرگ. یا دو کَسانێن کپۆت“ هئیرات بکننت.
25آ رۆچان اورشَلیمئے شهرا شَمون نامێن مردے هست‌اَت که پهرێزکار و هُدادۆستے اَت و اِسراییلیانی رَکّێنۆکئے رَهچار اَت و پاکێن روه گۆن آییا گۆن اَت. 26پاکێن روها بشارت داتگ‌اَت، تان وهدے که تئو هُداوندئے مَسیها مگندئے، نمرئے. 27آ گۆن پاکێن روهئے رَهشۆنیا مزنێن پرستشگاها آتک. نون وهدے ایسّائے پت و ماتا په شَریَتئے رسمئے سَرجم کنگا نُنّکێن ایسّا تها آورت، 28شَمونا ایسّا زرت، دستانی دلا داشت، هُدا سَنا و سَتا کرت و گوَشتی:
29”او زۆرمندێن هُداوند! اَنچُش که تئو وت لَبز داتگ، نون وتی کسترا
چه اے جهانا په اێمنی چست کن و وتی گوَرا ببر،
30چێا که من گۆن وتی چمّان اے نجات دیستگ
که چه تئیی نێمگا اِنت و
31تئو سجّهێن کئومانی دێما زاهر کرت.
32آ په دگه کئومان الهامی رُژنے و
په تئیی اِسراییلی کئوما پَهر و شانے بیت.“
33وهدے ایسّائے پت و ماتا آییئے بارئوا شَمونئے اے هبر اِشکتنت، هئیران بوتنت. 34شَمونا په آیان نێک‌دْوایی کرت و گۆن چُکّئے مات مَریَما گوَشتی: ”هُدایا اے چُکّ راه داتگ که په بازێن اِسراییلیێا گاری و بێگواهیئے سئوَبساز ببیت و په بازێنێا نجاتئے سئوَبساز. اے چُکّ نشانیے بیت، بله اِشیئے هلاپا گپَّ بیت. 35همے پئیما بازێنێئے دلئے راز پاشکَ بنت. او مَریَم! تئو بلاهێن اندۆهے گندئے که زَهمئے ڈئولا تئیی دلا کَپَّ کنت.“
36همۆدا آشِرئے کَبیلهئے یکّ جنێنے هست‌اَت که نبیے اَت. آییئے نام هَنّه اَت و آییئے پتئے نام پَنوێل اَت. هَنّه سکّ پیر اَت. سورا رَند تان هپت سالا آییئے لۆگواجه زندگ اَت، 37بله رَندا هنّه جنۆزام بوت. نون آییئے اُمر هشتاد و چار سال اَت و آییا چه مزنێن پرستشگاها ڈَنّ پاد اێرَ نکرت. شپ و رۆچ هُدائے سَنا و سَتاییَ کرت و وتی وهدی په دْوا و رۆچگَ گوازێنتنت. 38همے وهدا آتک، هُدائے شُگری گپت و گۆن هما سجّهێن مردمان که اورشَلیمئے نجاتئے رَهچار اَتنت، اے چُکّئے بارئوا هبری کرت.
39وهدے ایسّائے پت و ماتا هُداوندئے شَریَتئے سجّهێن راه و رَهبند پوره کرتنت، گڑا پِر ترّت و جَلیلا، وتی شهر ناسِرَها آتکنت. 40چُکّ رُست و مزن بوت. چه دانایی و هِکمتا سررێچ اَت و هُدائے رهمتی گۆن اَت.
کَسانێن ایسّا مزنێن پرستشگاها
41ایسّائے پت و مات هر سال سَرگوَزئے ائییدا#2:41 اے ائییدا سَرگوَزئے ائیید پمێشکا گوَشنت که چه مِسریانی چێردستیا اسراییلیانی آزاتیئے وهدا مَرکئے پرێشتگ چه اسراییلی چُکّانی کُشگا سر گوَست. اورشَلیما شتنت. 42وهدے ایسّایا دوازده سال بوت، اے سالا هم شتنت، اَنچۆ که رسم اَت. 43ائییدئے رۆچ که هلاس بوتنت، پِر ترّگئے وهدا ایسّایا اورشَلیما داشت بله مات و پتی سهیگ نه‌اَتنت. 44آیان گوَشت بلکێن کاروانا گۆن اِنت. یکّ رۆچێئے مِنزلا دێما شتنت و نون سهیگ بوتنت که ایسّا گۆن نه‌اِنت. آییئے شۆهازا در کپتنت و چه وتی سیاد و پَجّارۆکان آییئے جُستِش گپت. 45بله ایسّااِش که ندیست، پِر ترّتنت و آییئے شۆهازا اورشَلیما شتنت.
46سئیمی رۆچا آیان ایسّا مزنێن پرستشگاها در گێتک که اۆدا شَریَتئے زانۆگرانی#2:46 شَریَتئے زانۆگر، بزان دینی آلِم و موسّائے شَریَتئے زانتکار. نیاما نِشتگ‌اَت و آیانی هبران گۆش دارگا اَت و چه آیان جُست و پُرس کنگا اَت. 47سجّهێن اِشکنۆک چه آییئے سرپدی و پَسّئوان هئیران اَتنت. 48وهدے ایسُّپ و مَریَما آ دیست، هئیران بوتنت. ماتا گۆن آییا گوَشت: ”او منی چُکّ! تئو چێا گۆن ما چُش کرت؟ من و تئیی پت پرێشان بوتگێن و ما هر جاگه تئیی شۆهازا تَتکگێن.“ 49ایسّایا پَسّئو دات: ”شما چێا منی شۆهازا بوتگێت؟ زانا، شما نزانتگ که من باید اِنت وتی پتئے کرّا ببان؟“#2:49 یا: وتی پتئے کارانی رَندا ببان. 50بله آ ایسّائے اے هبران سرپد نبوتنت.
51ایسّا گۆن آیان پدا ناسِرَها شت و آیانی پرمانبردار اَت. آییئے ماتا اے سجّهێن گپّ وتی دلا داشتنت. 52ایسّا رُدان و چه هِکمتا سررێچ بئیان اَت و هُدا و مردمانی دلا جاگه کنان اَت.
Actualmente seleccionado:
لوکا 2: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.