لوکا 1
1
بُنگێج
1بازێن مردمێا جُهد کرتگ که هما واکیَه که مئے نیاما#1:1 نیاما، بزان میانا، درنیاما، تها، تۆکا. بوتگ‌اَنت، اِشانی کِسّهان یکجاه بکنت، 2انچۆ که اِنجیلئے ائولی هِزمتکاران گۆن وتی چمّان دیستگ‌اَنت و رَندا په ما سر کرتگ‌اَنت. 3گڑا او شرپدارێن تیۆپیلُس! من هم شَرّیا پَٹّ و پۆلے کرتگ و پئیسله کرتگ که اشان په تئو په رِد و بند نبشته بکنان، 4تانکه تئو پکّاییا بزانئے که تئیی گپتگێن تالیم راست اَنت.
یَهیائے پێدا بئیگئے پێشگۆیی
5یَهودیَهئے دَمگئے بادشاه هیرودیسئے زمانگا زَکَریا نامێن دینی پێشواے هست‌اَت که چه اَبیائے دینی پێشوایانی ٹۆلیا#1:5 ٹۆلی، بزان رُمب. اَت. آییئے جَن هم چه هارونئے نَسل و پَدرێچا#1:5 پَدرێچ، بزان نَسل، چُکّ و اۆبادَگ. اَت و نامی اِلیزابِت اَت.
6آ دوێن هُدائے چمّان پهرێزکار اَتنت و هُداوندئے سجّهێن هُکم و رهبندانی سرا په بێمئیاری زِندِشَ گوازێنت. 7بله چُکِّش نێست‌اَت، چێا که اِلیزابِت سَنٹ اَت و دوێنانی اُمر هم مزن اَت.
8یکّ رَندے که زَکَریائے ٹۆلیئے هزمتکاریئے باریگ اَت و آ، هُدائے بارگاها#1:8 بارگاه، بزان دێم، دَربار، هُزور. دینی پێشوایی کنگا اَت، 9گۆن دینی پێشواییئے رسمانی رَندگیریا زَکَریا لاٹری و کُرَه‌کَشّیئے#1:9 لاٹری و کُرَه‌کشّی بزان چِک و پُشت، تَرّ و هُشک. سرا گچێن کنگ بوت که هُداوندئے مزنێن پرستشگاها برئوت و سۆچکی دوتّ بدنت. 10وهدے زَکَریا سۆچکی دوتّ دئیگا اَت، اے دگه سجّهێن مردم ڈنّا دْوا کنگا اَتنت.
11اَناگت#1:11 اَناگت، بزان یَبّرا، اَچانَک، ناگهان. هُداوندئے پرێشتگے زَکَریائے دێما زاهر بوت. پرێشتگ بۆسۆچی کُربانجاهئے#1:11 بۆسۆچی کُربانجاه، بزان جاگه یا دَرپے که آییئے سرا یا تها سۆچکی دوتَّ دئینت. راستێن نێمگا اۆشتاتگ‌اَت. 12گۆن پرێشتگئے گِندگا زَکَریا بَه مَنت#1:12 بَه مانگ، بزان سکّ هئیران بئیگ، بُه بئیگ. و آییئے دلا تُرسے کپت. 13بله پرێشتگا گۆن آییا گوَشت: ”او زَکَریا! متُرس. تئیی دْوا مَنّگ بوت، تئیی جَن اِلیزابِت مردێن‌چُکّێئے سرا چِلّگَ بیت و باید اِنت تئو آییئے ناما یَهیا بکنئے. 14آ په تئو شادِه و وشّیَ کاریت و چه آییئے بوتنا بازێنے هم شادانَ بیت، 15چێا که آ، هُداوندئے چمّان مزنێن مردمے بیت. باید اِنت شراب#1:15 پاکێن کتابئے تها هر جاگه که شرابئے لبز آتکگ، اِشیئے مانا چه انگورا جۆڑ بوتگێن شراب اِنت که اِنگرێزیا ”wine“ گوشگَ بیت. و دگه هنۆش و بێسار کنۆکێن چیزّ منۆشیت. آ، ماتئے لاپا هم چه هُدائے پاکێن روها#1:15 هُدائے پاکێن روه، بزان روه‌اُلکُدُس. پُرَّ بیت. 16بازێن بنی اِسراییلیێئے دلا دێم په آیانی هُداوندێن هُدایا تَرّێنیت. 17آ گۆن اِلیاس نبیئے روه و کُدرتا چه هُداوندا پێسرَ کئیت، تانکه پتانی دلان چُکّانی نێمگا بتَرّێنیت و نمَنّۆکان پهرێزکارانی هِکمتئے نێمگا چَهر بدنت و اے پئیما په هُداوندا کئومے تئیار بکنت.“
18زَکَریایا چه پرێشتگا جُست کرت: ”من چۆن بزانان که اے گپّ راست اِنت؟ من پیر آن و منی جَن هم مزن‌اُمر اِنت.“ 19پرێشتگا پَسّئو#1:19 پَسّئو، بزان جواب. دات: ”من جِبراییل آن و هُدائے بارگاها اۆشتۆک آن. انّون رئوان دئیگ بوتگان که گۆن تئو هبر بکنان و ترا اے مِستاگا#1:19 مِستاگ، بزان وشّێن هال، بشارت. بدئیان. 20بچار، تان هما رۆچا که اے کار نبوتگ، تئو گُنگَ بئے و هبر کرتَ نکنئے، چێا که تئو منی اے هبر که په وهد راست و سرجمَ بنت، باور نکرتنت.“
21همے وهدا، مردم ڈنّا زَکَریائے اِنتزار و وَدارا#1:21 ودار، بزان انتزار، رهچاری. اَتنت. هئیران اَتنت که آ چێا مزنێن پرستشگاها اینکدر مَهتل بوتگ. 22وهدے زَکَریا ڈنّا در آتک، آییا گۆن مردمان هبر کرت نکرت. گڑا زانتِش که آییا پرستشگاها اِلهام و شُبێنگے بوتگ، چێا که آییا گۆن مردمان اِشارهَ کرت، نَتوانتی هبر بکنت.
23زَکَریا چه هِزمتکاریئے هلاسیا رَند وتی لۆگا پِر ترّت. 24چیزّے وهدا رَند، آییئے جَن اِلیزابِتئے لاپ پُرّ بوت و تان پنچ ماها دێمگیر بوت و چه لۆگا درَ نکپت. 25آییا گۆن وت گوَشت: ”اے کار هُداوندا په من کرتگ. اے رۆچان آییئے نِزر په من نێک بوتگ و مردمانی چمّان اے بےاِزّتی‌ای چه من دور کرتگ.“
ایسّا مَسیهئے پێدائِشئے پێشگۆیی
26-27شَشمی ماها هُدایا وتی پرێشتگ جِبراییل جَلیلئے دَمگئے ناسِرَه نامێن شهرێا، مَریَم نامێن نِشتگێن جنکّێئے کِرّا راه دات که آییئے هبرسِندی گۆن ایسُّپ نامێن مردێا بوتگ‌اَت. ایسُّپ چه داوودئے نَسل و پَدرێچا اَت. 28پرێشتگ مَریَمئے کِرّا آتک و گوَشتی: ”سلامتی په تئو. تئو هُدائے رهمتانی ساهگا ائے و هُداوند گۆن تئو گۆن اِنت.“ 29چه اے هبرئے اِشکنگا مَریَم باز پرێشان بوت و دلا گوَشتی: ”اے ڈئولێن هال و هئوال کنگئے مانا چے اِنت؟“ 30پرێشتگا گوَشت: ”او مَریَم! متُرس، چێا که هُدائے رهمتان تئیی سرا ساهێل کرتگ. 31نون تئو لاپ‌پُرَّ بئے و ترا مردێن‌چُکّے بیت، و تئو باید اِنت آییئے ناما ایسّا بکنئے. 32آ، مزنێن مردمے بیت و بُرزێن اَرشئے هُدائے چُکّ زانگَ بیت و هُداوندێن هُدا آییئے پت و پیرُکی بادشاهیا، بزان داوودئے تَهتا آییا بَکشیت. 33آ، آکوبئے پَدرێچئے سرا مُدام بادشاهیَ کنت و آییئے بادشاهی هچبرَ نکُٹّیت.“ 34مَریَما چه پرێشتگا جُست کرت: ”اے چۆن بوتَ کنت. من وه جنێن‌چُکّے آن و هچّ مردێنے منی کرّا نئیاتکگ؟“ 35پرێشتگا پَسّئو دات: ”پاکێن روه تئیی سرا اێرَ کئیت و بُرزێن اَرشئے هُدائے زۆر و کدرت تئیی سرا ساهێلَ#1:35 ساهێل، بزان ساهِگ کنگ. بیت. پمێشکا اے پاکێن چُکّ هُدائے چُکّ زانگَ بیت. 36اِلیزابِت هم که تئیی سیاد اِنت، پیرانسریا په مردێن‌چُکّێا اُمێتوار اِنت. هما که سَنٹِش گوَشتگ، نون شَش ماه اِنت که لاپی پُرّ اِنت. 37چێا که په هُدایا هچّ کارے نبوتنی نه‌اِنت.“ 38مَریَما گوَشت: ”من هُداوندئے مۆلد آن، همے ڈئولا که تئو گوَشتگ، اَنچُش بات.“ رَندا پرێشتگ چه آییئے کِرّا شت.
مَریَم اِلیزابِتئے گِندگا رئوت
39هما رۆچان مَریَم اِشتاپ اِشتاپا راه گپت و یَهودیَهئے کۆهستانی هَند و دَمگئے شهرێا شت. 40اۆدا زَکَریائے لۆگا شت و اِلیزابِتی هال و هئوال کرت. 41اَنچُش که اِلیزابِتا مَریَمئے سلام اِشکُت، نُنُّکا آییئے لاپا سِرّ بست#1:41 سِرّ بندگ، بزان سِٹّ کنگ، سکّ سُرگ. و اِلیزابِت چه پاکێن روها پُرّ بوت. 42گۆن بُرزێن تئوارێا گوَشتی: ”تئو جنێنانی نیاما بَهتاور ائے و بَهتاور اِنت هما چُکّ که تئیی لاپا اِنت. 43من کئے آن که منی هُداوندئے مات منی گِندگا بیئیت؟ 44وهدے تئیی تئیارجۆڑیئے تئوار منی گۆشان کپت، چُکّا چه گَلا لاپئے تها سِرّ بست. 45بَهتاور ائے تئو چێا که باوَرِت کرتگ که هُداوند هما کارانَ کنت که گۆن تئو گوَشتگ‌اَنتی.“
په هُدایا مَریَمئے سَنا و سَتا
46مَریَما گوَشت:
”منی ساه هُداوندا سَتا و سَنا کنت.
47منی ارواه گَلا بال اِنت که هُدا منی رَکّێنۆک#1:47 رَکّێنۆک، بزان نِجات دئیۆک. اِنت.
48چێا که وتی مۆلدئے نِزۆری‌ای چارتگ.
چه اِد و رَند سجّهێن نَسل و پَدرێچ منا بَهتاورَ گوَشنت.
49چێا که زۆرمندێن هُدایا په من مزنێن کار کرتگ،
آییئے نام پاک اِنت.
50آییئے رهم په همایان پُشت در پُشتَ مانیت
که آییئے تُرسِش دلا هست‌اِنت.
51آییا گۆن وتی پُرزۆرێن باسکا مزنێن کار کرتگ و
هما که وتی دلا بازێن پَهرِش#1:51 پَهر، بزان تَکبُّر، گُرور. بستگ، آییا شِنگ و شانگ کرتگ‌اَنت.
52آییا هاکم چه آیانی تَهتان سرشَکون کرتگ‌اَنت و
نِزۆرێن سربلند.
53گُژنَگ گۆن وشّێن چیزّان سێرلاپ کرتگ‌اَنت و
سێرێنی دست هۆرک و هالیگ راه داتگ‌اَنت.
54آییا وتی رهم نَشَمُشتگ و
وتی هِزمتکارێن اِسراییلی کئومی مَدَت کرتگ،
55بزان اِبراهێم و آییئے چُکّ و اۆبادگ#1:55 اۆبادَگ، بزان نَسل و پَدرێچ، چُکّ و نُماسَگ.،
هما پئیما که گۆن مئے پت و پیرُکان لَبزی کرتگ‌اَت.“
56مَریَم سئے ماهئے کِساسا اِلیزابِتئے لۆگا مَنت و رَندا وتی لۆگا پِر ترّت.
یَهیائے پێدائِش
57وهدے اِلیزابِتئے ماه و رۆچ سَرجم بوتنت، آییا مردێن‌چُکّے بوت. 58آییئے چِلّگیئے هال که همساهگ و سیادان سر بوت و اِشکُتِش که هُداوندا آییئے سرا مزنێن رهمے کرتگ، گڑا گۆن آییئے وشّیا هۆر و شریکدار بوتنت.
59وهدے نُنُّکا هَشت رۆچ بوت، په آییئے سُنّت کنگا آتکنت. آیان لۆٹت که نُنُّکئے ناما پتئے نامئے سرا زَکَریا بکننت، 60بله نُنُّکئے ماتا گوَشت: ”نه، آییئے نام یَهیا ببیت.“ 61مردمان گوَشت: ”تئیی کُٹُم و هاندانا اے نامێن مردم کَسّ نبوتگ.“ 62گڑا آیان چُکّئے پت زَکَریا په اِشاره جُست کرت که تئو وتی چُکّا چۆنێن نامے بندئے؟ 63زَکَریایا نبیسگی دارتَهتَگے لۆٹت و آییئے سرا نِبِشتی: ”چُکّئے نام یَهیا اِنت.“ گڑا سجّهێن مردم هئیران بوتنت. 64هما دمانا زَکَریائے گُنگێن زبان پَچ بوت و هبرا لگّت و هُدائے سَتا و سَنایی بِندات#1:64 بِندات، بزان بُنگێج، شُرو. کرت. 65سجّهێن همساهگان تُرس دلا کپت و سرجمێن یَهودیَهئے کۆهستگا مردم اے سجّهێن چیزّانی بارئوا هبرا لگّتنت. 66هرکَسا که اے هال اِشکت، دائِما اِشیئے هئیالا اَت و گوَشتی: ”اے چُکّ چۆنێن مردمے بیت؟“ چێا که هُداوندئے زۆر و واک آییئے همراه اَت.
ایسّائے پێدائِشئے بارئوا زَکَریائے پێشگۆیی
67گڑا یَهیائے پت زَکَریا چه پاکێن روها پُرّ بوت و پێشگۆیی کرت و گوَشتی:
68”اِسراییلئے هُداوندێن هُدایا سَتا و سَنا بات،
چێا که په وتی کئومئے مَدَت کنگا آتکگ و کئومی رَکّێنتگ.#1:68 رَکّێنگ، بزان نِجات دئیگ، بچّێنگ.
69آییا چه وتی هِزمتکارێن داوودئے لۆگ و هاندانا،
په ما زۆرمندێن رَکّێنۆکے دێم داتگ،
70اَنچُش که بازێن وهدێا پێسر،
چه وتی پاکێن نبیانی زبانا کئولی داتگ.
71آییا مارا چه مئے دژمنانی دستا رَکّێنتگ،
هما که چه ما نپْرتَ کننت، مارا چه آ سجّهێنان رَکّێنتگی،
72مئے پت و پیرُکانی سرا رهمی کرتگ و
وتی پاکێن اَهد و کَرارئے یات و تْرانگی#1:72 ترانگ، بزان یات، هئیال، تَهتال. داشتگ.
73گۆن مئے پت اِبراهێما سئوگندی وارتگ‌اَت،
74که مارا چه دژمنانی دستا برَکّێنیت،
تانکه بے تُرس و بیمّا آییئے هِزمتا بکنێن و
75آییئے بارگاها وتی سَرجمێن زِندا
په پاکی و راستی بگوازێنێن.
76او منی چُکّ!
تئو بُرزێن اَرشئے هُدائے نبی گوَشگَ بئے،
چێا که تئو چه هُداوندئے آیگا پێسر،
آییئے راهان تچک و هموارَ کنئے.
77تانکه آییئے کئوما سرپد بکنئے
که آیانی گناه بَکشگَ بنت و
آیان نجاتئے زانتَ رسیت.
78چێا که چه مئے هُدائے مِهر و رهمتان
چه بُرزێن اَرشا رۆچ په ما ٹِکَّ کنت.
79تانکه همایان رُژنایی ببَکشیت که تهارۆکیا و مَرکئے ساهگا نِشتگ‌اَنت، و
مارا دێم په سُهل و اێمنیئے راها ببارت.“
80آ چُکّ رُدان و پاکێن روهئے برکتا زۆرمند بئیان اَت. اِسراییلیانی نیاما زاهر بئیگا پێسر گیابانانَ مَنت.
Actualmente seleccionado:
لوکا 1: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.