ROMA 1
1
1Pabukat kau ngaangai', aku i Paulus, ulipon ri Jisus Kristus am rasul ondo' pinili' am piniau ri Aki Kapuuno' mampabala' ra Tanou Moonsoi Nano.
2Tanou Moonsoi no binantu' noyo ri Aki Kapuuno' ra nabi-nabi Nano ra galing i am pinabatik noyo ra Buuk Kitab. 3Tanou Moonsoi no mantunung ra baal ru Anak ri Aki Kapuuno', ioginio Tuhan takau i Jisus Kristus. Maya' ra papag Nano ra tana' ti, Io no sangulun anak ru raja' Daut; 4kaa' maya' ra papag Nano ra suruga', nampakito i Aki Kapuuno' ra Io no Anak Nano, am ralalom ru kuasa' maayo binayag Io intor ra kapatayan. 5Ralalom ru inggalan Nano noyo tinimpok taaki' ri Aki Kapuuno' raki' kandoi masauk ra rasul, koson mangandoi aku ri Kristus am magibit ra ngaangai' ulun mangintopot am gumagaya' Riso. 6Akau pana ondo' soroi ra Roma piniau niayuk ri Aki Kapuuno' masauk ra ulun mangintopot ri Jisus Kristus.
7Ginio ra nanulis aku ra surat ti ramuyun ngaangai' ra Roma ondo' tagamin ri Aki Kapuuno' am ondo' piniau noyo masauk ra ulun Nano.
Gama' ru Ama' takau i Aki Kapuuno' am i Tuhan Jisus Kristus manaak ramuyun ra barakat am pabansayan.
Pakiasian ra paringkuanangan
8Pagulu ti, ralalom inggalan ri Jisus Kristus, maringkuanang aku ri Aki Kapuuno' sabap ra pangintapatan min ri Jisus Kristus raino mapandayan noyo ru ulun ra titikop ru tana' ti. 9-10I Aki Kapuuno' noyo sasi' ra atan ondo' raguon kutu motopot. Io no i Aki Kapuuno' ondo' pangandayan kuno ra sotopot-topot ru guang ra mampasaboi ra Tanou Moonsoi intor ra Anak Nano. Moonong ra aku makiasi' karaan takamin am makitaak ri Aki Kapuuno' ra poongoyon No aku ramuyun maya' ra kasagaan Nano. 11Ginio ra moogot aku toojo muma' ramuyun am niayuk magapu ramuyun ra barakat ru Ambiluo ri Aki Kapuuno' ra mapaikang ra guang mino. 12Arati' kuno ragitio, pagikangon takau rondo' am bokon ru pangintapatan takau ri Jisus.
13 Pabukat kau ngaangai', masaga' aku makapandai kau ra ingkula' noyo aku pangatang mongoi ramuyun, kaa' masalok mokoondo' ayuk mongompong raki'. Moogot aku magibit ra ulun ra intok mino mangintopot ri Kristus, mogondo' ra ulun sala' ka Jaudi ra intok ra bokon. 14Musiti' aku mampabala' ra Tanou Moonsoi ra ngaangai' bansa': ilo ondo' makasopan am niayuk ondo' kolondo' sopan, am ilo ondo' nakasikul am niayuk ondo' kolondo' sikul. 15Ginio ra aku gumogot mampasaboi ra Tanou Moonsoi ramuyun ondo' mamagun ra bandar Roma.
Kuasa' ru Tanou Moonsoi
16 Ginio ra mangintopot aku toojo ra Tanou Moonsoi ti mampakito ra kuasa' ri Aki Kapuuno' mamayag ra ngaangai' ulun ondo' mangintopot ri Jisus, kasaa' ra ulun ru Jaudi am niayuk ra bansa' ra bokon. 17 Sabap ra Tanou Moonsoi no manulu' ra ati kulaan i Aki Kapuuno' am ulun mobonsoi saguli' – ginio masauk ralalom ru mangintopot ri Aki Kapuuno', intor ra talimpuun suku' ra pupus no. Koson niayuk tinulisan ra Buuk Kitab, “Ulun ondo' mangintopot saboi mobonsoi saguli' ri Aki Kapuuno', ulun no topot-topot maayag.”
Kasalaan ru ngaangai' ulun
18Intor ra suruga' nampaintalang noyo i Aki Kapuuno' ra sangit am ukum Nano ra ngaangai' tula am kalaatan ru ulun, sabap raginio mongompong ra ulun mintutun ra pangilaan motopot intor ri Aki Kapuuno'. 19Mangukum i Aki Kapuuno' risilo sabap ra atan ondo' mapandayan ru ulun intor Riso, napandayan noyo risilo. I Aki Kapuuno' galama' ondo' nanulu' risilo. 20Intor ra tana' ti biningkal, paliso ri Aki Kapuuno' ondo' kalo makito, ioginio ra Io topot-topot i Aki Kapuuno' am kuasa' Nano ra mantilayun, natutunan noyo ru ulun ralalom ru ngaangai' ondo' sinauk Nano. Intor raginio kolondo' sasaban ru ulun. 21 Kabalu' pana nakatutun ilo ri Aki Kapuuno', kalo mangurumat kapoam maringkuanang ilo Riso. Kaa' pamaguangan nilo kolondo' onong am guang nilo ra jajajou no liminondom. 22Indos nilo mapintar ilo, kaa' sotopot no sasambungon ilo. 23 Sala' ka i Aki Kapuuno' ondo' mantilayun sambaan nilo, kaa' sinungkalalaing ondo' tumilu ra ulun mapandai matoi, susuit, bibiag mamuntana' kapoam bibiag manungkama'.
24Ginio sabap ra pinoloso ilo ri Aki Kapuuno' mambaal ra kinibit ru guang nilo ra majaka' saboi babaal nilo ra rondo' am bokon makauyuyu'. 25Pangilaan motopot intor ri Aki Kapuuno' aligin nilo boo ra abau. Maansayan ilo sumamba am mongompor ra atan ondo' sinauk ri Aki Kapuuno' ka i Aki Kapuuno' galama', ondo' sotopot no omporon ra sabuoi-buoi no! Amin.
26Sabap ra pinoloso ilo ri Aki Kapuuno' sumugut ra kinibit ru guang majaka' ti. Ruandu'-ruandu' no kalo boo rumulug ra ungkuyon koson ra kaindalaman, kaa' ilo ti lesbian. 27Ungkuyon pana kalo boo rumulug ra ruandu', kaa' ilo ti homoseksual. Ungkuyon am ungkuyon mambaal ra makauyuyu' saboi balasin ri Aki Kapuuno' maya' ra binaal nilono.
28Sabap ra ulun marara' mangiou ra katapatan ri Aki Kapuuno', pinoloso No pamaguangan nilo lumaat, saboi baalon nilo majaka'. 29Guang nilono napanu' ra kalaatan, mapuka', magingkaut ilo, mampalaat ra rondo' am bokon: mangusolon ilo, makimampatoi, mansasangor, mamparuung, malikokot. Mansunur ilo ra ulun bokon, 30mangilaat ra bokon; masumbung ilo am mailo balain, masisang ri Aki Kapuuno' am lumimbau. Maguyum ilo ra ralan bagu koson mambaal ra malaat am kalo gumagaya' ra ragu ru matuo nilo; 31jajajou ilo, lumungkang ilo am kalo makaasi' ra ulun bokon. 32Nakapandai ilo ra maya' ra ukum ri Aki Kapuuno' ulun ondo' nambaal koson raginio ukumin ra potoyon. Iou pana koson raginio, rayuson nilo ginio am maansayan ilo poyo ra ulun bokon ondo' mambaal koson niayuk raginio.
Currently Selected:
ROMA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.