RINALATAN 28
28
Giu' ra Malta
1Pakaasak akai ngaangai', bagu napandayan mai intok raginio pulu' Malta. 2Mamagun ra intok ti mongoonsoi ngaangai' ramon. Nangkimait ilo ramon makararang ra apui, sabap ra timinalimpuun noyo rumasam am angin niayuk sumoyob masimu'. 3Nakiluton i Paulus am nampaang ra apui. Ingkual boo sanginan kukuo intor ra apui i sabap ra malasu' kaga' am paninduk boo ra longon ri Paulus. 4Pakakito namagun ra pulu' no ra kukuo i nakatayung ayuk ra kalindu' ri Paulus, pansusunur ilo ra rondo' am bokon, “Maaru' ulun ti sangulun mamamatoi, sabap ra kabalu' pana binayag io noyo intor ra raat, kaa' kalo lair polosoon io maayag ru Dewi Katimpakan.” 5Kaa' tagago' boo ri Paulus kukuo i ralalom ru apui am kolondo' nalimanan no ra atan ayuk ruol. 6Pangkaraan nilai maaru' longon ri Paulus lumanit kapoam matoi io pamuaga'. Nabuoi ilo niayuk naginaa, kaa' kolondo' nasauk riso koson ra pangkaraan nilai. Ginio ra nakulau boo pangkaraan nilai am indagu ilo ra, “Io ti maaru' dewa.”
7Kalo maalur intor ra giu' i, mokoondo' intok ru gabenor ru pulu' i, makainggalan i Pabilus. Io nanguma' ramon ra guang moonsoi, saboi nataluan io tinambului mai ra baloi no. 8Paat ragili niayuk ama' ri Pabilus luluya' marualan, sabap ra natiu' ra salom am makatai' ra raraa'. Ginio ra subol i Paulus ra lamin nano, pakiasi' io, pabantaa' no boo kalindu' nali riso am kababas io boo. 9Ginio boo ngaangai' ulun ondo' marualan giu' ra pulu' i minongoi uma' ri Paulus am ilo ti pana binabas niayuk. 10Nangani' ilo ra masuang tangguang ramon. Paat ra akai masaga' masundoi, ibiti' nilo akai ra kapal ra atan ayuk kuliamos ru pangkiralanan mai.
Intor ra Malta mongoi ra Roma
11Talu ngambulan buoi mai ra giu' i, am iruani' mai pulu' i am sakoi ra rondo' kapal ondo' minapit ra pulu' ti buoi ru bulintok masimu'. Kapal raginio intor ra Aliksandria am giu' ra saang no mokoondo' ruo tuhan sinungkalalaing ondo' ininggalanan niayuk ra “Dewa Magapir”. 12Apit akai ra bandar Sirakusa, saboi nataluan akai ra giu' i. 13Intor ra giu', pasundoi akai po ra bandar Rigium. Io suabon ragili, tumalimpuun magangin intor ra rabugus. Buoi naruaan nakasuku' akai boo ra bandar Putioli. 14Giu' no niayuk nakatuum akai ra kukula' ngaulun Kristian. Nangkimait ilo ramon mayan risilo am saminggu' akai ra giu' i. Kopongo ragili, narayus akai boo ra Roma maya' ra lantur. 15Kaa' ulun Kristian ra Roma nakaining noyo ra tanou intor ramon am minongoi ilo uma' ramon giu' ra ruo pekan ondo' ininggalanan ra Apius am Talu Ngaintok Apitan. Pakauma' i Paulus risilo, naringkuanang io ri Aki Kapuuno' am guang nali pana pinaikang boo.
Giu' ra Roma
16Pakasaboi ra Roma, i Paulus iniou mayan sangulun ra rondo' baloi, kaa' alungin io niayuk ru sangulun saujor.
17Pakasail nataluan, timungo' ri Paulus tingganai-tingganai ru ulun ru Jaudi. Pakatimung ilo, pambala' boo i Paulus, kono, “Pabukat kau ngaangai'! Kolondo' sala kuno ra bansa' takau galama', kapoam kalo minanggal aku ra kaulayan ru kinamatuaan takali. Kabalu' pana koson raginio, rinakop aku niayuk giu' ra Jirusalim am pinataak aku ra ulun ru Roma. 18Kaimumuyi' nilo toojo aku, makaguang ilo mampalabus raki', sabap ra kolondo' noyo kalaatan binaal kuno ra makapangukum ilo raki' ra potoyon. 19 Kaa' minanggal ulun ru Jaudi ragitio, ginio ra nakibisara' aku boo ra Kaisar Roma, kabalu' pana kolondo' panguwan kuno ra bansa' kuno galama'. 20Ginio sabap ra nakiuma' am nakimansunur aku ramuyun. Binangkil aku sabap ra Io ondo' kalansanan ru bansa' ru Israil.”
21Kaa' indagu ilo riso, “Kolondo' surat naapu mai intor ra Judia nambala' koson rirun. Kolondo' sangulun pana minatong intor ra giu' i nagibit ra pambalaan kapoam tanou ra kalaatan muli. 22Kaa' akai pana masaga' mangkirongog ra pangkaraan muno. Sabap ra akai ngaangai' nakaining noyo ra pangilaan ondo' binayaan muno anggalon ra ati ayuk intok.”
23Ginio ra aruo' nilo rondo' orou pangumaan am masuang ulun minatong ra inayanan ri Paulus. Intor ra iosusuab saboi mamai', nampaintutun toojo i Paulus risilo ra Pamarintaan ri Aki Kapuuno'. Mapirot i Paulus mampaintopot risilo ra ondo' tinulisan ralalom Ukum ri Musa am niayuk Kitab ru Nabi-Nabi bala' niayuk intor ri Jisus. 24Mokoondo' intor risilo nangintopot ra atan rinagu ri Paulus i, kaa' mokoondo' niayuk kalo nangintopot riso. 25Nantutuliar am nansasangor ilo boo ra rondo' am bokon intor ra rinagu ri Paulus ragitio, kono, “Motopot toojo rinagu ru Ambiluo ri Aki Kapuuno' ra kinamatuaan mini ondo' pinabala' galing ra Nabi Jisaya, kon Nano;
26 ‘Ongoi no pambala' ra bansa' ragitio:
Mangining kau ayuk, kaa' kalo maratian min;
Monontong kau ayuk, kaa' kalo makito min.
27Mokotog toojo guang ru bansa' ragitio,
sinilong nilo talingo nilai,
am sinilian nilo mato nilai.
Sabap ra amon ru kalo, makito nilo tupo,
am morongog nilo niayuk,
am guang nilo pana matanda',
am sumaguli' ilo boo Raki',
am babason Ku ilo, kon ri Aki Kapuuno'.’ ”
28Pupus no indagu boo i Paulus, “Balain takamin: Raino ti pambalaan ru pamayagan intor ri Aki Kapuuno' pinabala' noyo ra bansa' ondo' sala' ka Jaudi. Ilo ti masaga' mangkirongog.” [29Pakaindagu i Paulus raginii, iruani' ru ulun ru Jaudi intok i am nantataam ilo boo rondo' am bokon.]
30Buoi ruo ngambilor i Paulus minayan ra Roma, giu' ra baloi siniwaan nali. Masaga' io mangapu ra ngaangai' ulun ondo' minongoi uma' riso i. 31Nangila' io risilo ra tanou intor ri Jisus Kristus am Pamarintaan ri Aki Kapuuno'. Kalo nalaa' io am kolondo' niayuk nongompong riso.
Currently Selected:
RINALATAN 28: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.