ROMA 2
2
Ukum ri Aki Kapuuno'
1 Pabukat kau ngaangai', intor raginio, makakau' kau kia mononsol ra ulun bokon? Kolondo' sasaban min amon ru ukumin kau. Sabap ra amon ru mononsol kau ra ulun bokon kaa' akau galama' pana nogondo' niayuk makasala, akau galama' migukum. 2Mapandayan takau ukum ri Aki Kapuuno' no motopot ra mangukum Io ra ulun ondo' mambaal koson raginio. 3Kaa' pabukat kau ngaangai', sotopot no akau pana makasala ra baal-baal koson risilo ondo' inakim min. Indos min kia ra kalo ukumin kau ri Aki Kapuuno'? 4Kapoam kalo lioon min i Aki Kapuuno' ondo' mataau kaga', maayo guang am mataan. Napandayan min noyo ra mataau i Aki Kapuuno' no ramuyun sabap ra masaga' Io ra tumalikur kau intor ra tula. 5Kaa' akau mailo raguin am mokotog ulu! Intor raginio mampagaai kau po ra bagat ru ukum min ra Orou Pupus no, ioginio paat i Aki Kapuuno' mampaintalang ra sangit am ukum ondo' mabanis. 6 Sabap ra moonong ulun balasin ri Aki Kapuuno' maya' ra binaal nano. 7Ilo ondo' masalok mambaal ra moonsoi, ioginio malansan ra katulayan, urumat am kaayagan mantilayun intor ri Aki Kapuuno', ilo noyo aniin No ra kaayagan motopot am mantilayun. 8Kaa' ilo ondo' masalok maguyum ra kasingkatan galama', manginggi' ri Aki Kapuuno' am poyo gumagaya' ra kalaatan, ilo no kasangitan am ukumin ri Aki Kapuuno'. 9Ginio ra moonong ulun ondo' mambaal ra kalaatan no maimbolo' am makakapaganan; kasaa' ulun ru Jaudi am niayuk sala' ka Jaudi. 10Kaa' moonong ulun ondo' mambaal ra moonsoi aniin ri Aki Kapuuno' ra katulayan, urumat am kaansayan; kasaa' ra ulun ru Jaudi am niayuk sala' ka Jaudi. 11 Sabap ri Aki Kapuuno' kalo mampili' ra ulun ondo' akimin Nano.
12Ulun sala' ka Jaudi kolondo' ra Ukum ri Musa, makatula ilo am mapuso kaa' kalo ukumin ilo maya' ra Ukum ri Musa. Kaa' ulun ru Jaudi mokoondo' ra Ukum ri Musa, makatula ilo am ukumin niayuk maya' ru Ukum no. 13Sala' ka ilo ondo' mangkirongog ayuk ra Ukum ri Musa no mobonsoi saguli' ri Aki Kapuuno', kaa' ilo ondo' mambaal no. 14Ulun sala' ka Jaudi kolondo' ra Ukum ri Musa, kaa' paat ra suguton nilo panusuban ru Ukum no maya' ra bolos ru guang nilo galama', ginio mampakito ra ilo makapandai ra atan motopot am kalo motopot. 15Baal nilai ti mampakito ra panusuban ru Ukum no soroi ra guang nilo. Bolos ru guang nilo poyo mapaintutun ra baal raginio, sabap ra pangkaraan nilo sanganuan mononsol am poyo sanganuan manaung risilo. 16Ginio ra, maya' ra Tanou Moonsoi ondo' posoboyon kuno, gitio noyo sauk nano ra Orou Pupus no; ralalom inggalan ri Jisus Kristus mangakim i Aki Kapuuno' ra ngaangai' ondo' nasibuni ra guang ru ulun.
Ulun ru Jaudi am Ukum ri Musa
17Raino ati kulaan ramuyun? Kamin, “Akai ulun ru Jaudi.” Lumansan kau ra Ukum ri Musa am lumimbau ra akau ulun ri Aki Kapuuno'. 18Migigila' kau ra Ukum no bagu makapandai kau ra kasagaan ri Aki Kapuuno' am ati kulaan mampili' ra motopot. 19Mangintopot kau ra akau ti koson ra mangingitang ra ulun bolou am koson ra sinda risilo ondo' ralalom kalandaman. 20Mampatanda' kau ra ulun sasambungon am mangingila' kau niayuk ra ulun kolondo' guang. Mangintopot kau ra intor ra Ukum ri Musa ti mokoowot kau ra ngaangai' kapandayan am pangilaan motopot. 21Mangila' kau poyo ra ulun ra bokon, kaa' akau galama' kalo gumagaya' ra pangilaan no. Ilaan min, “Pai' pantakou,” kaa' akau boo galama' mantatakou. 22Ilaan min, “Pai' lapau,” kaa' akau boo galama' lumapau. Salaan min ilo ondo' sumamba ra sinungkalalaing, kaa' akau galama' mongoi pantakou ra sasambayangan nilo. 23Lumimbau kau ra akau mokoondo' ra Ukum ri Musa, kaa' akau galama' mampakauyu' ri Aki Kapuuno' ra kalo gumagaya' kau ra susuban Nano. 24 Sabap ra tinulisan noyo ra Buuk Kitab, “Sabap ra paliso min ulun ru Jaudi, inggalan ri Aki Kapuuno' asabin ru ulun sala' ka Jaudi.”
25Amon ru gumagaya' kau ra Ukum ri Musa, sunat mino mokoonong. Kaa' amon ru kalo gumagaya' kau ra Ukum no, sunat mino kolondo' boo onong ramuyun. 26Amon ru sangulun sala' ka Jaudi, ondo' kalo sinunatan, gumagaya' ra Ukum ri Musa, apuon io ri Aki Kapuuno' koson ra ulun sinunatan noyo. 27Sonsolon kau ru ulun kalo sinunatan, sabap ra kabalu' pana mokoondo' kau ra Ukum ri Musa am niayuk sinunatan noyo, kalo gumagaya' kau ra Ukum no. Kaa' ilo ondo' kalo sinunatan no, gumagaya' niayuk ra Ukum ri Musa no. 28Sabap ra ilo ondo' sotopot no karaan ra ulun ru Jaudi, sala' ka ilo ayuk ondo' piawon ra ulun ru Jaudi. Ilo ondo' sotopot no karaan ra ulun sinunatan, sala' ka ilo ayuk ondo' toojo sinunatan. 29 Kaa', ulun ondo' sotopot no ulun ru Jaudi, ioginio ulun ondo' guang nano nakai' ra ulun ru Jaudi. Sunat ra sotopot no, ioginio guang ondo' kinulau ru Ambiluo ri Aki Kapuuno', am sala' ka ondo' tinulisan ra Ukum no. Am poyo sala' ka ulun, kaa' i Aki Kapuuno' galama', ondo' mongompor ra ulun koson raginio.
Currently Selected:
ROMA 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.