PINAINTALANG 3
3
Bilin posoboyon ra pasimpungan ulun Kristian ra bandar Sardis
1“Tulisi' koson ragitio ra malaikat ru pasimpungan ulun Kristian ra bandar Sardis:
“Gitio noyo bilin intor Riso ondo' mokoondo' tulu' Ambiluo intor ri Aki Kapuuno' am mampaguut ra tulu' butitin no. Makapandai Aku atan baalon mino. Akau ti maayag rokoon kaa' sotopot no minatoi kau! 2Ginio boo ra karat no am kaikango' saguli' ondo' soroi poyo ramuyun ra kalo poyo matoi toojo. Sabap ra napandayan Ku atan binaal mino kalo poyo matanda' ra pagilangan ri Aki Kapuuno' Kuno. 3 Karaa' atan ondo' inila' ra galing i ramuyun am atan ondo' rinongog min. Gagayaa' noyo gitio am talikur no intor ra tula mino. Amon ru kalo kumarat kau, matong Aku ramuyun koson ra mantatakou no am kalo mapandayan min sanggilan ratangan Kuno. 4“Kaa' mokoondo' intor ramuyun ra bandar Sardis ondo' kalo minaya' mambaal ra tula, ioginio kalo jinamalan kau. Mababaya' kau Raki' am pambayangon kau ra mapulak sabap ra maaya' kau noyo.
5 “Osoi ayuk mangala ra kuasa' ru kalaatan pambayangon Ku ilo ra mapulak, am kalo luluon Ku inggalan nilono intor ra kitab ru Ulun Mokoowot ra Kaayagan Motopot. Giu' ra saang ri Ama' Kuno am ra malaikat-malaikat Nano, iowon Ku ilo ti maamaya' Kuno.
6“Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!”
Bilin posoboyon ra pasimpungan ulun Kristian ra bandar Piladilpia
7 “Tulisi' koson ragitio ra malaikat ru pasimpungan ulun Kristian giu' ra bandar Piladilpia:
“Gitio noyo bilin intor Riso ondo' matulai am motopot, am kunsi' ru raja' Daut soroi Riso; paat ra ukabin No kulobon no, angabin ru osoi ayuk pana kalo maangaban, am paat ra angabin No, ukabin ru osoi ayuk pana kalo maukaban. 8Makapandai Aku atan baalon mino. Makapandai aku ra ikang mino kalo kukula', kaa' minaya' kau ra pangilaan Kuno am gumagaya' kau Raki'. Nangukab Aku ra umpasan min am angabin ru osoi ayuk pana kalo maangaban. 9 Karaan min gitio! Maamaya' ru Tingganai ru riwato am migiangku ra ulun ru Jaudi, ondo' sotopot no sala' ka Jaudi, saukon Ku ilo ti matong ramuyun am sumamba ra saang mino. Bagu no makapandai ilo ra motogom Aku ramuyun. 10Sabap ra kaimbalaan, bagu alungin takamin ra kapaganan maayo ondo' matong mangkinam ra ngaangai' ulun ru tana' ti. 11Kalo boo mabuoi am matong Aku! Alungi' noyo ondo' soroi poyo ramuyun no, maa' raginio kalo matakou ru ulun bokon ampos ru kamanangan mino. 12 Osoi ayuk mangala ra kuasa' ru kalaatan, baalon Ku io ra lugu' ralalom Baloi ri Aki Kapuuno' Kuno, am mantilayun io ra giu'. Patulison Ku riso inggalan ri Aki Kapuuno' am inggalan ru bandar ri Aki Kapuuno', ioginio bandar Jirusalim bagu ondo' tumuun intor ra suruga', intor ri Aki Kapuuno' Kuno. Am inggalan ra nakabagu Kuno niayuk patulison Ku riso.
13“Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!”
Bilin posoboyon ra pasimpungan ulun Kristian ra bandar Laodikia
14 “Tulisi' koson ragitio ra malaikat ru pasimpungan ulun Kristian ra bandar Laodikia:
“Gitio noyo bilin intor Riso ondo' sabiton ra Amin, ioginio sasi' ondo' malansanan am motopot, Io no puun ru ngaangai' ondo' sinauk ri Aki Kapuuno'. 15Makapandai Aku noyo atan ondo' binaal mino. Makapandai Aku ra kalo masalui kapoam malasu' kau. Mumpara' boo bobonsoi no amon ru masalui kapoam malasu' kau! 16Kaa' akau ti momomonor, malasu' kalo, masalui kalo, luaan takamin intor ra kabang Kuno. 17Minindagu kau, ‘Langkaya' aku; kalo nalimusan aku ra atan ayuk pana.’ Kaa' kalo nakapandai kau ra makaasi'-asi' baal mino! Kunsikang kau, nagibabaang am bolou. 18Sabap raginio balain takamin, balio' mas Kuno, mas kopoyo, maa' raginio langkaya' kau! Bayang mapulak pana balio', koson mampasibuni ra nagibabaang kau ra makauyuyu'! Tatapis ra mato pana balio', maa' raginio makakito kau! 19 Sawayon am patandaan ku ngaangai' ondo' tagamin Kuno. Sabap raginio, pirot no am talikur no intor ra tula mino. 20Iningo'! Migor Aku ra kulobon am manitik. Amon ru mokoondo' makaining ra bolos Kuno am mangukab ra kulobon no, mumpos Aku ra baloi nano am mangakan magulung riso, am mangakan io magulung Raki'.
21“Osoi ayuk mangala ra kuasa' ru kalaatan, panturungon Ku io ra sapapa' Ku ra takhta Kuno. Gitio mogondo' ra Aku nangala ra kuasa' ru kalaatan am raino pinaturung Aku ra sapapa' ru Ama' Kuno ra takhta Nano.
22“Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no!”
Currently Selected:
PINAINTALANG 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.